ବିଜେଡି ସାଜିଛି ଲୋକଙ୍କ ସ୍ବର ; ବିଧାନସଭା ବାହାରେ ଓ ଭିତରେ ତୁଲାଉଛି ସଶକ୍ତ ବିରୋଧୀ ଦଳର ଭୂମିକା

ଭୁବନେଶ୍ବର: ବିଜେଡି ସାଜିଛି ଲୋକଙ୍କ ସ୍ବର । ରାଜ୍ୟ ସ୍ବାର୍ଥ ପାଇଁ ଜାରି ରଖିଛି ଲଢେଇ । ବିଧାନସଭା ଭିତରେ ଓ ବାହାରେ ଗଠନମୂଳକ ବିରୋଧୀ ଦଳର ତୁଲାଉଛି ଭୂମିକା । ମହାନଦୀ, ପୋଲାଭରମ, କୋଟିଆ ପରି ରାଜ୍ୟ ସ୍ବାର୍ଥ ପାଇଁ ଜୋରଦାର କରିଛି ଲଢେଇ । କ୍ଷମତା ଥିଲା ବେଳେ ଯେମିତି ସ୍ବର ଉଠାଇଥିଲା ବିରୋଧୀ ଦଳରେ ଥାଇ ମଧ୍ୟ ସେମିତି ସ୍ବରକୁ ଶାଣିତ କରିଛି । ହେଲେ କେନ୍ଦ୍ର ସରକାର ସବୁବେଳେ ରାଜ୍ୟ ସ୍ବାର୍ଥକୁ ଅଣଦେଖା କରିଆସୁଛନ୍ତି ବୋଲି ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ କହିଛନ୍ତି । ୨୪ ବର୍ଷ ପରେ ଓଡିଶା ଶାସନର ପଟ୍ଟ ପରିବର୍ତ୍ତିନ ହୋଇଛି । ହେଲେ ବିଜେଡିର ରାଜନୈତିକ ସଂକଳ୍ପ ଯେମିତି ଥିଲା ସେମିତି ଅଛି । ଆଗକୁ ଦଳ ରାଜ୍ୟ ସ୍ବାର୍ଥ ହାସଲ କରିବା ପାଇଁ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ନିକଟରେ ଗଠନମୂଳକ ଦାବି ଦୋହରାଇବ ।

ସଶକ୍ତ ବିରୋଧୀ ଦଳ ଭାବେ ଦଳ ଦାୟିତ୍ବ ତୁଲାଇବା ସହ ସଂଗଠନକୁ ତୃଣମୂଳସ୍ତରରେ ଅଧିକ ମଜଭୁତ କରିବାକୁ ଫୋକସ କରିଛନ୍ତି ଦଳ ସଭାପତି ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ। ନିକଟରେ ବିଜେଡି ସଂଗଠନର ନବକଳେବର କରିବା ସହ ବିଧାୟକ ଓ ଦଳର ଛାମୁଆ ସଂଗଠନର କର୍ମକର୍ତ୍ତାଙ୍କୁ ଗୁରୁଦାୟିତ୍ବ ଦେଇଛନ୍ତି ନବୀନ। ତୃଣମୂଳସ୍ତରରେ ସଂଗଠନକୁ ଅଧିକ ଶକ୍ତିଶାଳୀ କରିବା ସହ ଲୋକଙ୍କ ସମସ୍ୟା ଦୂର କରିବାକୁ ବିଧାୟକମାନଙ୍କୁ ସୁପ୍ରିମୋ ନିର୍ଦ୍ଦେଶ ଦେଇଛନ୍ତି ।

ନବମ ଥର ନବୀନ ବିଜେଡି ସଭାପତି ହେବା ପରେ ସଂଗଠନକୁ ତୃଣମଳସ୍ତରେ ଅଧିକ ଶକ୍ତିଶାଳୀ କରିବା ସହ ସଶକ୍ତ ବିରୋଧୀ ଦଳ ଭାବେ ଓଡିଶାବାସୀଙ୍କ ସ୍ବର ସାଜିଛି ବିଜେଡି । ଆଗକୁ ପଂଚାୟତ ଓ ପୌର ନିର୍ବାଚନ ପାଇଁ ଦଳ ଏବେଠାରୁ ଗ୍ରାଉଣ୍ଡ ଓ୍ବାର୍ଡ ଆରମ୍ଭ କରିଛି । ୨୦୨୪ ନର୍ବାଚନରେ ଶାସକ ବିଜେପି ଠାରୁ ବିଜେଡି ଭୋଟ ଅଧିକ ପାଇଥିବାରୁ ଦଳ ବିରୋଧୀ ଦଳ ଗୁରୁଦାୟିତ୍ବ ତୁଲାଉଛି ।