‘ଅପରାଧୀଙ୍କୁ ମାଧ୍ୟମ କରି ସରକାର ଗଠନ କରିବାକୁ ଚାହୁଁଛି ବିଜେପି’
ଭୁବନେଶ୍ବର: ମମିତାଙ୍କୁ ନ୍ୟାୟ ନାଁରେ ଗତକାଲି ବିଜେପି କରିଥିବା ଗୁଣ୍ଡାଗିରିକୁ ବିଜେଡିର ନିନ୍ଦା । ହିଂସା ଓ ଅପରାଧୀଙ୍କୁ ମାଧ୍ୟମ କରି ବିଜେପି ସରକାର ଗଠନ କରିବାକୁ ଯୋଜନା କରୁଥିବା ଅଭିଯୋଗ ଆଣିଛି ଦଳ । ବିଜେପିର ଗୁଣ୍ଡାଗିରିକୁ ନେଇ ଏମିତି ବର୍ଷିଛନ୍ତି ବିଜେଡି ବିଧାୟକ ରାଜକିଶୋର ଦାସ ।
ସେ କହିଛନ୍ତି, ହିଂସା ବଳରେ ସରକାର ଗଠନ କରିବାକୁ ଯୋଜନା କରୁଛି ବିଜେପି । ଦଳର ଯୁବ ସଂଗଠନ ଦାୟିତ୍ବ ଜଣେ ଅପରାଧୀଙ୍କୁ ଦିଆଯାଇଛି । ଅପରାଧ ପ୍ରବଣର ମାନସିକତା ରଖୁଥିବେ ବିଜେପି ଯୁବ ମୋର୍ଚ୍ଚା ସଭାପତି ଇରାଶିଷ ଆଚାର୍ଯ୍ୟଙ୍କ ନେତୃତ୍ବରେ ହେଉଥିବା ଆନ୍ଦୋଳନରେ ହିଂସାକାଣ୍ଡ ଘଟିବା ସ୍ବାଭାବିକ । ବିଜେପିର କେନ୍ଦ୍ରୀୟ ନେତୃତ୍ବ ମଧ୍ୟ ହିଂସା ଉପରେ ବିଶ୍ବାସ କରେ । ଉତ୍ତରପ୍ରଦେଶ ଏବଂ ଗୁଜରାଟରେ ବିଜେପି ନେତାମାନେ ଭିଆଉଥିବା ହିଂସାର ଉଦାହାରଣ ଦେଇ ସେ ଏଭଳି ଆକ୍ଷେପ କରିଛନ୍ତି ।
ଓଡ଼ିଶାରେ ପୋଲିସ ବିରୋଧୀଙ୍କ ଶାଳୀନତା ରକ୍ଷା କରୁଥିବା ବେଳେ ବିରୋଧୀ ଦଳର ନେତା ଓ କର୍ମୀମାନେ ଗୁଣ୍ଡାଗିରି କରୁଛନ୍ତି । ବିଜେପି କର୍ମୀଙ୍କ ଆକ୍ରମଣରେ ବହୁ ସାଧାରଣ ଲୋକ ଓ ପୋଲିସ କର୍ମଚାରୀ ଗୁରୁତର ଭାବେ ଆହତ ହୋଇଛନ୍ତି ବୋଲି ସେ କହିଛନ୍ତି ।
