ଶ୍ରୀକ୍ଷେତ୍ରରୁ ଶଙ୍ଖନାଦ, ଓଡ଼ିଶାବାସୀଙ୍କ ପାଇଁ କାମ କରିବାକୁ ସୁପ୍ରିମୋ ନବୀନଙ୍କ ବାର୍ତ୍ତା

ପୁରୀ: ଓଡ଼ିଶା ବିକାଶରେ ବ୍ରତୀ ବିଜେଡି। ସାରା ଓଡ଼ିଶା ପାଇଁ ଉତ୍ସର୍ଗୀକୃତ ବିଜେଡି। କୌଣସି ଜାତି, ଧର୍ମ, ବର୍ଣ୍ଣର ଲୋକଙ୍କ ଉନ୍ନତି ପାଇଁ କାମ କରୁନି। ମାଲକାନଗିରିରୁ ମୟୂରଭଞ୍ଜ, ବରଗଡ଼ରୁ ପୁରୀ ଓଡ଼ିଶା ଓ ଓଡ଼ିଶାର ଲୋକଙ୍କ ପାଇଁ ବିଜେଡି କାମ କରିଆସୁଛି। ଆଉ ୧୨ବର୍ଷ ପରେ ଓଡ଼ିଶା ଗଠନକୁ ଶହେ ବର୍ଷ ପୂରିବ।

ଦେଶରେ ଓଡ଼ିଶାକୁ ହକ୍ ଦେବା ପାଇଁ ବିଜେଡି ପ୍ରତିବଦ୍ଧ। ତେଣୁ ଯେକୌଣସି ସ୍ତରରୁ ପେଶାଦାର ବ୍ୟକ୍ତି ଯାଏଁ ଯୁବପୀଢ଼ି, ବିଶେଷ କରି ମାଆମାନେ ବିଜେଡିରେ ଯୋଗ ଦେଇ ଏହାକୁ ସଶକ୍ତ କରାନ୍ତୁ । ସେମାନଙ୍କ ସହଯୋଗରେ ବିଜେଡି ୨୫ କି ୫୦ବର୍ଷ ନୁହେଁ ଶହେ ବର୍ଷ ଯାଏଁ ଓଡ଼ିଶାର ସେବା କରିଚାଲିବ । ବିଜୁ ଜନତା ଦଳର ୨୬ତମ ଜୟନ୍ତୀ ଅବସରରେ ପୁରୀରୁ ରାଜ୍ୟବାସୀଙ୍କୁ ଏହି ଆହ୍ବାନ ଦେଇଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ ।

୨୫ବର୍ଷ ହେଲା ଓଡ଼ିଶାବାସୀଙ୍କ ଆଶୀର୍ବାଦ ପାଇଁ ଦେଶର ସବୁଠୁ ସଫଳତମ ଆଞ୍ଚଳିକ ଦଳ ଭାବେ ବିଜେଡି ଉଭା ହୋଇଛି । ଏହା ପଛରେ ଅନେକ କାରଣ ରହିଛି। ସେବାକୁ ଏଜେଣ୍ଡା କରି ବିଜେଡି ଆଗେଇ ଚାଲିଛି। ଓଡ଼ିଶାର ସ୍ବାଭିମାନ, ସଂସ୍କୃତି, ଭାଷା ତଥା ସବୁ ବର୍ଗର ଉନ୍ନତି ପାଇଁ ବିଜେଡି କାମ କରୁଛି । ବିଜୁ ପଟ୍ଟନାୟକଙ୍କ ଆଦର୍ଶକୁ ମାଧ୍ୟମ କରି ତାଙ୍କ ଦିଗଦର୍ଶନ ଦେଇଥିବା ରାସ୍ତାରେ ଆଗେଇ ଚାଲିଛି। ବିଜୁ ପଟ୍ଟନାୟକ କେବଳ ନେତା ନଥିଲେ, ସେ ଜଣେ ପ୍ରକ୍ରିୟା ଥିଲେ । ତାଙ୍କର ପ୍ରତ୍ୟେକ ରକ୍ତବିନ୍ଦୁ ଓଡ଼ିଶାର ସ୍ବାଭିମାନ ପାଇଁ ଉତ୍ସର୍ଗୀକୃତ ଥିଲା । ବିଜୁଙ୍କ ଆଦର୍ଶରେ ଏବେବି ଆଗେଇ ଚାଲିଛି ବିଜେଡି।

ସ୍ବଚ୍ଛ ଓ ନିର୍ମଳ ଶାସନ ପାଇଁ ବିଜେଡି ସବୁଠି ଗ୍ରହଣୀୟ ହୋଇଥିବା ବେଳେ ମହିଳା ସଶକ୍ତିକରଣକୁ ପ୍ରାଧାନ୍ୟ ଦେଇଆସିଛି । ମାଆ ମାନଙ୍କର ସଶକ୍ତିକରଣ, ପରିବାର, ରାଜ୍ୟ ତଥା ଦେଶର ସଶକ୍ତିକରଣ। ଏହାର ଉଦାହରଣ ହେଉଛି ମିଶନ ଶକ୍ତି। ୨୦ବର୍ଷ ତଳେ ବିପର୍ଯ୍ୟୟ ମୁକାବିଲାର ସାମନା କରି ପାରୁନଥିବା ଓଡ଼ିଶାର ମୁକାବିଲା ଫର୍ମୂଲା ଏବେ ବିଶ୍ବରେ ପ୍ରଶଂସିତ । ଅନ୍ୟ ରାଜ୍ୟକୁ ଚାଉଳ ପଠାଇବାରେ ଓଡ଼ିଶା ସକ୍ଷମ ।

କୋଭିଡ୍ ସମୟରେ ଟେଷ୍ଟରୁ ଟ୍ରିଟମେଣ୍ଟ ସବୁ ଫ୍ରି କରିବା ସହ ଦେଶକୁ ଅକ୍ସିଜେନ୍ ଯୋଗାଇଥିଲା ଓଡ଼ିଶା । ପ୍ରତିଟି ଜୀବନ ମୂଲ୍ୟବାନ ମନେକରି ଗରିବଙ୍କ ମାଗଣା ଚିକିତ୍ସା ପାଇଁ ହୋଇଛି ବିଏସକେଓ୍ବାଇ ଯୋଜନା । ୫ଟି ଓ ମୋ ସରକାର ଫର୍ମୂଲା ଦେଶ, ବିଦେଶରେ ଆଦର ଲାଭ କରିଛି । ଏସବୁ ପଛରେ କର୍ମୀଙ୍କ ଭୂମିକାକୁ ପ୍ରଶଂସା କରିବା ସହ ସ୍ବପ୍ନର ଓଡ଼ିଶା ଗଠନ ପାଇଁ ଆଗେଇ ନେବାକୁ ନବୀନ ଆହ୍ବାନ ଦେଇଛନ୍ତି ।