ଭୁବନେଶ୍ୱର: ମାନସିକ ଭାରସାମ୍ୟ ହରାଇଛନ୍ତି ବିଜେପି ନେତା। ପଦମପୁର ନିର୍ବାଚନ ସମୟରେ ଅନେକ ବିଭ୍ରାନ୍ତିକର ମନ୍ତବ୍ୟ ଦେଉଥିଲେ। ଆଉ ଏବେ ନିର୍ବାଚନ ହାରିବା ଭୟରେ ପ୍ରଳାପ କରୁଛନ୍ତି। ବିଭିନ୍ନ ପ୍ରସଙ୍ଗ ନେଇ ରାଜ୍ୟ ବିଜେପି ନେତାଙ୍କ ପ୍ରେସମିଟକୁ ନେଇ ବର୍ଷିଛନ୍ତି ବିଜେଡି ମୁଖପାତ୍ର ସ୍ଵୟଂପ୍ରକାଶ ମହାପାତ୍ର।
ଓଡ଼ିଶା ବିଜେପିର କିଛି ନେତା ପ୍ରତିଦିନ ଅଶାଳୀନ ଓ ଅଶୋଭନୀୟ ଆଚରଣ କରୁଛନ୍ତି। ସେ ତାଲିକାରେ ବିଜେପି ନେତା ପ୍ରଦୀପ ପୁରୋହିତ ରହିଛନ୍ତି। ପ୍ରଦୀପ ପୁରୋହିତ ଏଥର ନିର୍ବାଚନ ହାରିବାକୁ ଯାଉଥିବାବେଳେ ଓଡ଼ିଶା ବିଜେପି ମଧ୍ୟ ପରାଜୟ ଆଡ଼କୁ ଯାଉଛି। ଏହା ତାଙ୍କ ସାମ୍ବାଦିକ ସମ୍ମିଳନୀରୁ ଜଣାପଡୁଛି। ସେ ନିଜେ ଆତ୍ମ ସମୀକ୍ଷା କରିବା ଉଚିତ। ଓଡ଼ିଶା ହେଉଛି ଦେଶର ଏକ ମାତ୍ର ରାଜ୍ୟ ଯେଉଁଠି ଚାଷୀଙ୍କ ଆୟକୁ ୨ ଗୁଣା କରାଯାଇଛି। କାଳିଆ ଯୋଜନାରେ ୧୧ହଜାର ୫ଶହ କୋଟି ଟଙ୍କା ୬୪ ଲକ୍ଷ ଚାଷୀଙ୍କୁ ଦିଆଯାଇଛି। କେନ୍ଦୁପତ୍ର ତୋଳାଳିଙ୍କ ପାଇଁ ନିଜସ୍ୱ ଜିଏସଟି ଛାଡ଼ କରିଛନ୍ତି ରାଜ୍ୟ ସରକାର। ହେଲେ କେନ୍ଦ୍ର ସରକାର ୧୮ ପ୍ରତିଶତ ଜିଏସଟି ଲଦି ଦେଇଛନ୍ତି। ଏହାର ଜବାବ ପ୍ରଦୀପ ପୁରୋହିତ ଦେଇ ପାରିବେନି।
ଫସଲ ବୀମା ଅର୍ଥ ଦେବାରେ ପାତରଅନ୍ତର କେନ୍ଦ୍ର କରୁଛନ୍ତି। ରାଜ୍ୟରେ ଚାଷୀଙ୍କୁ ଠିକ୍ ସମୟରେ ସାର ମିଳୁ ନାହିଁ। ୨୦୨୨ ସୁଦ୍ଧା ଚାଷୀଙ୍କ ଆୟକୁ ଦୁଇ ଗୁଣା କରିବା ପାଇଁ କହିଥିଲେ। କୁଆଡେ ଗଲା ସେ ପ୍ରତିଶ୍ରୁତି। ବିଜେପିର ଅନେକ ନେତା ପର୍ଯ୍ୟଟକ ଭାବେ ରାଜ୍ୟକୁ ଆସୁଛନ୍ତି। ସେମାନେ ଏ ବାବଦରେ ଉତ୍ତର ରଖିବା ଉଚିତ। ନିର୍ବାଚନ ଆସିଲେ ଓଡ଼ିଶା ବିଜେପି କୁମ୍ଭୀର କାନ୍ଦଣା କରୁଛନ୍ତି। ଓଡ଼ିଶା ଚାଷୀକୂଳ ବିଜେପିର ନେତାମାନଙ୍କ ଆଚରଣ ଓ ଉଚ୍ଚାରଣ ଜାଣିଗଲେଣି। ଆସନ୍ତା ଜୁନ୪ ତାରିଖରେ ଏହାର ଜବାବ ମିଳିଯିବ ବୋଲି କହିଛନ୍ତି ବିଜେଡି ମୁଖପାତ୍ର ସ୍ଵୟଂପ୍ରକାଶ ମହାପାତ୍ର।
