ସରକାରଙ୍କୁ ଘେରିବାକୁ ନବୀନଙ୍କ ଗୁରୁମନ୍ତ୍ର ନେଲେ ଯୁବ ଓ ଛାତ୍ର କମିଟି ସଦସ୍ୟ

ନନ୍ଦିଘୋଷ ବ୍ୟୁରୋ: ସରକାରଙ୍କ ବିରୋଧରେ ମାଳମାଳ ପ୍ରସଙ୍ଗ । ଏ ସବୁ ବିଧାନସଭା ଭିତରେ ଉପସ୍ଥାପନ କରି ସରକାରଙ୍କୁ ଘେରିବାକୁ ପ୍ରସ୍ତୁତ ହେଉଛି ବିଜୁ ଜନତା ଦଳ । ସଙ୍ଗଠନକୁ ନୂଆ ରୂପ ଦେବା ସହ ସମସ୍ତଙ୍କୁ ନିଜ ଦାୟିତ୍ବ ନିର୍ବାହ କରିବା ପାଇଁ କ୍ଷମତା ଦେଇଛନ୍ତି ସୁପ୍ରିମୋ ନବୀନ ପଟ୍ଟନାୟକ । ଦଳର ଛାମୁଆ ସଙ୍ଗଠନ ବିଧାନସଭା ବାହାରେ ପ୍ରସଙ୍ଗଭିତ୍ତିକ ପ୍ରତିବାଦ କରିବେ । ସରକାରଙ୍କ ବିରୋଧରେ ଜନ ଅସନ୍ତୋଷ ବଢୁଥିବାରୁ ସଙ୍ଗଠନକୁ ଆଗେଇ ନେବାକୁ ରୋଡମ୍ୟାପ ପ୍ରସ୍ତୁତ କରିଛି ବିଜେଡି । ଆଜି ନବୀନ ନିବାସ ଯାଇ ଯୁବ ଓ ଛାତ୍ର ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କ ଠାରୁ ଗୁରୁମନ୍ତ୍ର ନେଇଛନ୍ତି ।

ଦରଦାମ ବୃଦ୍ଧି, ନାରୀ ନିର୍ଯାତନା, ରଥଯାତ୍ରା ବିଭ୍ରାଟ, ଦଳାଚକଟା, ଅନହାର ମୃତ୍ୟୁ, ହଇଜା ମୃତ୍ୟୁ, ବିପର୍ଯ୍ୟସ୍ତ ଆଇନ ଶୃଙ୍ଖଳା ପରିସ୍ଥିତି ପରି ମାଳମାଳ ପ୍ରସଙ୍ଗରେ ଛନ୍ଦି ହୋଇ ପଡ଼ିଛି ବିଜେପି ସରକାର । ବର୍ଷେରୁ ଅଧିକ ସମୟ ଧରି ଶାସନ କରି ଆସୁଛି ଭାରତୀୟ ଜନତା ପାର୍ଟି । ହେଲେ ଦଳ ରାଜ୍ୟବାସୀଙ୍କ ମୂଳ ପ୍ରସଙ୍ଗଠାରୁ ଦୂରେଇ ଯାଇଥିବା ଅଭିଯୋଗ କରିଛି ବିଜେଡି । ନିର୍ବାଚନୀ ପ୍ରତିଶୃତି ପୂରଣ କରିବାରେ ବିଫଳ ହୋଇଛି ବିଜେପି । ରାଜ୍ୟବାସୀ ସରକାରଙ୍କଠାରୁ ଯେଉଁ ଆଶା ରଖିଥିଲେ, ତାହା ଧୂଳିସାତ ହେବାକୁ ବସିଛି । ଏହାକୁ ମୁଖ୍ୟ ପ୍ରସଙ୍ଗ କରି ସଙ୍ଗଠନକୁ ଆହୁରି ସୁଦୃଢ କରିବ ବିଜେଡି । ଅକ୍ଟୋବର ୨ ଗାନ୍ଧୀ ଜୟନ୍ତୀରୁ ଜନସମ୍ପର୍କ ପଦଯାତ୍ରାରେ ବାହାରି ସରକାରଙ୍କ ବିଫଳତାକୁ ଲୋକଲୋଚନକୁ ଆଣିବ ବିଜେଡି ।

ଛାମୁଆ ସଙ୍ଗଠନ ବି ପ୍ରସ୍ତୁତ ହେଲେଣି । ଯୁବ ଓ ଛାତ୍ର କମିଟି ନବୀନ ନିବାସ ଯାଇ ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କ ଠାରୁ ଗୁରୁମନ୍ତ୍ର ନେଉଛନ୍ତି । ଶାସନକୁ ଆସିବା ପୂର୍ବରୁ ଛାତ୍ର ସଂସଦ ନିର୍ବାଚନ କରିବାକୁ ପ୍ରତିଶୃତି ଦେଇଥିଲା ବିଜେପି । ହେଲେ କ୍ଷମତାର ବର୍ଷେ ପରେ ବି କ୍ୟାମ୍ପସରେ ହୋଇ ପାରିଲାନି ଛାତ୍ର ସଂସଦ ନିର୍ବାଚନ । ଚଳିତବର୍ଷ ଛାତ୍ର ସଂସଦ ନିର୍ବାଚନ କରିବାକୁ ସରକାର ଘୋଷଣା କରିଥିଲେ ବି ଏହା ଅନିଶ୍ଚିତତା ଘେରରେ ରହିଛି । ସେତିକି ନୁହେଁ, ବନ୍ଦ ହୋଇଯାଇଛି ନବୀନ ପଟ୍ଟନାୟକ ସରକାରଙ୍କ ସମୟର ନୂଆ ଓ ଛାତ୍ରବୃତ୍ତି । ଆଇନ ଉପରୁ ଭରସା ତୁଟାଇ ଯୁବ ସମାଜ ପଥଭ୍ରଷ୍ଟ ହୋଇ ଅପରାଧ ଆଡ଼କୁ ମୁହାଁଇଲେଣି । ତେଣୁ ଜନକଲ୍ୟାଣ ପାଇଁ ସରକାରୀ ତ୍ରୁଟି ବିରୋଧରେ ଆନ୍ଦୋଳନ କରିବ ବୋଲି କହିଛି ବିଜେଡି ।

ଘରକୁ ଘର ଯାଇ ଜନସଚେତନତା ସୃଷ୍ଟି କରିବ ବିଜୁ ଜନତା ଦଳ । ସମସ୍ତ ଛାମୁଆ ସଙ୍ଗଠନକୁ ଶାଣିତ ଓ ସୁସଙ୍ଗଠିତ କରି ବିଜେଡି ଏହି ଅଭିଯାନକୁ ଆହୁରି ତ୍ବରାନ୍ବିତ କରିବାକୁ ଲକ୍ଷ୍ୟ ରଖିଛି