ICMR ଗାଇଡଲାଇନ୍ ଅନୁଯାୟୀ ହେଉଛି ଟେଷ୍ଟିଂ: ସସ୍ମିତ ପାତ୍ର
ଭୁବନେଶ୍ୱର: କରୋନା ଟେଷ୍ଟ ବାବଦରେ ବିଜେପି ଅଭିଯୋଗର ଜବାବ ରଖିଲା ବିଜେଡି । ପ୍ରତିକ୍ରିୟା ରଖିଲେ ବିଜେଡି ମୁଖପାତ୍ର ସସ୍ମିତ ପାତ୍ର । କହିଲେ ବିଜେପି କରୋନା ମହାମାରି ବେଳେ ମଧ୍ୟ ରାଜନୀତି କରୁଛି । ଓଡ଼ିଶାକୁ ଫେରୁଥିବା ସବୁ ପ୍ରବାସୀ ଶ୍ରମିକଙ୍କ ଟେଷ୍ଟ୍ ପାଇଁ ବିଜେପି ନେତା ପୃଥ୍ୱୀରାଜ ହରିଚନ୍ଦନ କରିଥିବା ଦାବି ଉପରେ ପ୍ରତିକ୍ରିୟା ରଖି ସସ୍ମିତ ପାତ୍ର କହିଛନ୍ତି ଯେ, ବିଜେପି ଦୋମୁହାଁ ନୀତି ଅବଲମ୍ବନ କରୁଛି । ବିଜେପି ଶାସିତ ରାଜ୍ୟଗୁଡିକୁ ୮୦ଲକ୍ଷରୁ ୧ କୋଟି ପ୍ରବାସୀ ଶ୍ରମିକ ଫେରିଛନ୍ତି । ତେବେ ଏହି ସବୁ ରାଜ୍ୟ କଣ ଫେରୁଥିବା ସମସ୍ତ ପ୍ରବାସୀ ଶ୍ରମିକଙ୍କ କରୋନା ଟେଷ୍ଟ କରୁଛନ୍ତି କି ବୋଲି ପ୍ରଶ୍ନ କରିଛନ୍ତି ପାତ୍ର ।
ବିଜେପିର ଦୋମୁହାଁ ନୀତି
ବିଜେପି ଦୋମୁହାଁ ନୀତି ଅବଲମ୍ବନ ସହ ମହାମାରୀ କାଳରେ ରାଜନୀତି କରୁଥିବା ଅଭିଯୋଗ ଆଣି ସେ କହିଛନ୍ତି ଯେ, ରାଜ୍ୟ ବିଜେପିର ନେତା କ’ଣ ବିଜେପି ଶାସିତ ରାଜ୍ୟର ସରକାରଙ୍କୁ ଘରକୁ ଫେରୁଥିବା ସବୁ ଶ୍ରମିକଙ୍କ କରୋନା ଟେଷ୍ଟ ପାଇଁ ଦାବି କରିପାରିବେ କି? ଭାରତରେ ଯେତେବେଳେ ଏପର୍ଯ୍ୟନ୍ତ ୩୦ରୁ ୪୦ ଲକ୍ଷ କରୋନା ଟେଷ୍ଟ୍ ହୋଇଛି ସେତେବେଳେ ଏଭଳି ଦୋମୁହାଁ ନୀତି କାହିଁକି ବୋଲି ସେ ପ୍ରଶ୍ନ କରିଛନ୍ତି ।
ନିଜ ସରକାର କଥା ମାନୁ ବିଜେପି
ବିଜେପିକୁ ସମାଲୋଚନା କରି ସେ କହିଛନ୍ତି ଯେ, ବିଜେପି ଅତିକମରେ ନିଜ ଦଳର ସରକାର ଓ ଏହାର ସ୍ୱାସ୍ଥ୍ୟମନ୍ତ୍ରଣାଳୟ ତଥା ଆଇସିଏମଆର ଗାଇଡଲାଇନକୁ ବିଶ୍ୱାସ କରିବା ଆବଶ୍ୟକ । କରୋନା ଲକ୍ଷଣ ଥିବା ବ୍ୟକ୍ତିଙ୍କ ଟେଷ୍ଟିଂ ପାଇଁ ଗାଇଡ୍ ଲାଇନରେ କୁହାଯାଇଛି । ଯାହା ବିଜ୍ଞାନ ସମ୍ମତ ବୋଲି କହିଛନ୍ତି ସସ୍ମିତ ପାତ୍ର ।
ଓଡ଼ିଶାରେ ପରିସ୍ଥିତି ନିୟନ୍ତ୍ରଣାଧିନ
ଓଡ଼ିଶାରେ ପରିସ୍ଥିତି ନିୟନ୍ତ୍ରଣାଧିନ ରହିଛି ଓ ଆଇସିଏମଆର ଗାଇଡ୍ ଲାଇନ୍ ଅନୁସାରେ ଟେଷ୍ଟିଂ ହେଉଛି ବୋଲି କହିଛନ୍ତି ସସ୍ମିତ ପାତ୍ର ।
ବିଜେପି ବିଜ୍ଞାନ ଉପରେ ବିଶ୍ୱାସ କରୁ
କରୋନା କାଳରେ ବିଜ୍ଞାନରେ ବିଶ୍ୱାସ କରିବା ସହ କେନ୍ଦ୍ର କେନ୍ଦ୍ର ସରକାରଙ୍କ ଗାଇଡଲାଇନ୍ ମାନିବା ଉଚିତ ଓ ମହାମାରୀ କାଳରେ ରାଜନୀତିରୁ ବିଜେପି ଦୁରେଇ ରହୁ ବୋଲି ସେ କହିଛନ୍ତି ।
