ମହାନଦୀ ଜଳ ବିବାଦ ପ୍ରସଙ୍ଗରେ ବିଜେପି ଓ କଂଗ୍ରେସକୁ ବିଜେଡିର ସମାଲୋଚନା, ଦୁଇ ଦଳ ପାଇଁ ପାର୍ଟି ଆଗ,ମାଟି ପଛ

ଭୁବନେଶ୍ବର : ମହାନଦୀ ପ୍ରସଙ୍ଗରେ କଂଗ୍ରେସ ଓ ବିଜେପି ରହିଛନ୍ତି ନୀରବ । ରାଜ୍ୟବାସୀଙ୍କ ସ୍ବାର୍ଥ ପ୍ରତି ଆଖି ବୁଜିଛନ୍ତି ଦୁଇ ଦଳ । ନିଜର ରାଜନୈତିକ ସ୍ବାର୍ଥ ଲାଗି ସର୍ବଦା ତତ୍ପର ଥିବା କଂଗ୍ରେସ ଓ ବିଜେପି ଓଡିଶାବାସୀଙ୍କ ସ୍ବାର୍ଥକୁ କେବେ ବି ଗୁରୁତ୍ବ ଦେଉନାହାନ୍ତି ବୋଲି କହିଛି ବିଜେଡି । ବିଜେଡି ପକ୍ଷରୁ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଦଳର ମୁଖପାତ୍ର କହିଛନ୍ତି- ଓଡ଼ିଶାର ପ୍ରଗତି ଓ ବିକାଶ ମହାନଦୀ ସହ ଜଡ଼ିତ ।

ମହାନଦୀ ଆମ ସମସ୍ତଙ୍କ ହୃଦୟରେ ରହିଛି । ଛତିଶଗଡ଼ ସରକାରଙ୍କୁ ବାରମ୍ବାର ଅନୁରୋଧ କରାଯିବା ସତ୍ତ୍ବେ ସେହି ସରକାର ଓଡିଶାର ଦାବି ପ୍ରତି କର୍ଣ୍ଣପାତ କରିନାହାନ୍ତି । କେନ୍ଦ୍ରମନ୍ତ୍ରୀ ହୁଅନ୍ତୁ ବା ବିଜେପି କର୍ମୀ ବା ନେତା , ଓଡ଼ିଶାର ସ୍ବାର୍ଥ ଲାଗି କେହି ଠିଆ ହେଲେ ନାହିଁ । ଛତିଶଗଡ଼ରେ ବିଜେପି ସରକାର ଥିବାବେଳେ କଂଗ୍ରେସ ନେତାମାନେ ଏଠି ବିରୋଧ କରୁଥିଲେ । ମାତ୍ର ସେଠାରେ କଂଗ୍ରେସ ସରକାର ଗଠନ ପରେ ରାଜ୍ୟରେ କଂଗ୍ରେସ ନେତା ଚୁପ୍ ରହିଛନ୍ତି । ଏଠାରେ କଂଗ୍ରେସ ନେତାମାନେ କୁମ୍ଭୀର କାନ୍ଦଣା କରୁଛନ୍ତି । ମହାନଦୀ ପ୍ରସଙ୍ଗ ଓ ରାଜ୍ୟବାସୀଙ୍କ ଜୀବନଜୀବିକା ଲାଗି ବିଜେଡି ହିଁ ସଂଗ୍ରାମ କରୁଛି । ବିରୋଧୀ ଦଳ ଏଠାରେ ଓଡ଼ିଶାର ସ୍ବାର୍ଥ, ସ୍ବାଭିମାନ ବିରୋଧୀ କାର୍ଯ୍ୟ କରୁଛନ୍ତି । କଂଗ୍ରେସ ଓ ବିଜେପି ଗୋଟିଏ ମୁଦ୍ରାର ଦୁଇଟି ପାର୍ଶ୍ବ । ମତ୍ସ୍ୟଜୀବୀ, ଚାଷୀ, ନଈକୂଳିଆ ଅଞ୍ଚଳବାସୀଙ୍କ ସ୍ବାର୍ଥ ସବୁଠାରୁ ଗୁରୁତ୍ବପୂର୍ଣ୍ଣ ବୋଲି କହିଛି ବିଜେଡି ।