ଆଇନ ଶୃଙ୍ଖଳା ବିଗିଡ଼ିବା ନେଇ ରାଜ୍ୟ ସରକାରଙ୍କ ଉପରେ ବର୍ଷିଲା ବିଜେଡି

ଭୁବନେଶ୍ୱର: ବିଗିଡ଼ିଥିବା ଆଇନ ଶୃଙ୍ଖଳାକୁ ନେଇ ରାଜ୍ୟ ସରକାରଙ୍କ ଉପରେ ବର୍ଷିଛି ବିଜେଡି। ବିଧାୟକ ବ୍ୟୋମକେଶ ରାୟ ଓ ଦେବୀରଂଜନ ତ୍ରିପାଠୀ ଏହି ପ୍ରସଙ୍ଗରେ ବିଜେପି ସରକାରକୁ କଡ଼ା ଭାଷାରେ ସମାଲୋଚନା କରିଛନ୍ତି।  ପ୍ରତିଦିନ ଦୁଷ୍କର୍ମ ହେଉଛି। ଆଇନ ଶୃଙ୍ଖଳା ବିଗିଡ଼ି ଯାଇଛି। ଶାସନ ବ୍ୟବସ୍ଥାକୁ ଅପରାଧୀଙ୍କ ଭୟ ନାହିଁ ବୋଲି କହିଛି ବିଜେଡି।

ରାଜ୍ୟ ସରକାରକୁ ବ୍ୟୋମକେଶ ରାୟ ଚେତାବନୀ ଦେଇଛନ୍ତି, ଆଇନ ଶୃଙ୍ଖଳା ସଜାଡ଼ ନ ହେଲେ ଗାଦି ଛାଡ଼। ନାରୀ ଆଜି ସବୁଠି ଅସୁରକ୍ଷିତ। ଏପରିକି କ୍ୟାମ୍ପସରେ ମଧ୍ୟ ଛାତ୍ରୀମାନେ ଅସୁରକ୍ଷିତ। ଏହାର ପ୍ରତିବାଦରେ ଆଜି ବିଜେଡିର ଛାତ୍ର ଓ ଯୁବ ସଂଗଠନ ସାରା ରାଜ୍ୟରେ ବିକ୍ଷୋଭ କରିଛି। ଏହାକୁ ଅଭୂତପୂର୍ବ ସଫଳତା ମିଳିଥିବା କହିଛନ୍ତି ଦେବୀରଂଜନ ତ୍ରିପାଠୀ। ସମସ୍ତେ ଏଥିରେ ସାମିଲ ହୋଇଥିଲେ। ଆଗକୁ ଯଦି ସ୍ଥିତି ନ ସୁଧୁରିବ, ତେବେ ଦୁର୍ବାର ଆନ୍ଦୋଳନ ହେବ ବୋଲି ସେ ବିଜେପି ସରକାରକୁ ଚେତାଇ ଦେଇଛନ୍ତି।