ରାଷ୍ଟ୍ରୀୟ ମର୍ଯ୍ୟାଦା ସହ କିଶୋରଙ୍କ ଶେଷକୃତ୍ୟ ସମ୍ପନ୍ନ
ଝାରସୁଗୁଡ଼ା: ପଞ୍ଚଭୂତରେ ବିଲୀନ ହେଲେ ବ୍ରଜରାଜନଗର ବିଧାୟକ କିଶୋର ମହାନ୍ତି । ରାଷ୍ଟ୍ରୀୟ ମର୍ଯ୍ୟାଦା ସହ ଶେଷ ହୋଇଛି ଶେଷକୃତ୍ୟ । ଝାରସୁଗୁଡାର ମୁକ୍ତି ଧାମରେ ଶେଷ କୃତ୍ୟ ସମ୍ପନ୍ନ ହୋଇଛି । ଶେଷ ବିଦାୟରେ ସାମିଲ ହୋଇଥିଲେ ହଜାର ହଜାର ଶୁଭେଛୁ ଓ ସମର୍ଥକ । ନିଜର ପ୍ରିୟ ନେତାଙ୍କ ଶେଷ ଝଲକ ପାଇଁ ଲାଗିଥିଲା ଜନ ସମୁଦ୍ର । ପାର୍ଥୀବ ଶରୀରକୁ ଝାରସୁଗୁଡା ଜିଲ୍ଲା ବିଜେଡି କାର୍ଯ୍ୟାଳୟକୁ ନିଆଯାଇଥିଲା ।
ତାହା ପୂର୍ବରୁ ପାର୍ଥିବ ଶରୀରକୁ ମଙ୍ଗଳ ବଜାର ସ୍ଥିତ ବାସଭବନରୁ ନିଆଯାଇ ସହର ପରିକ୍ରମା କରାଯାଇଥିଲା । ବ୍ରଜରାଜନଗର ବିଜୁ ଜନତା ଦଳ କାର୍ଯ୍ୟାଳୟରେ ସାଧାରଣ ଲୋକ ନିଜର ପ୍ରିୟନେତାଙ୍କୁ ଦର୍ଶନ କରିଥିଲେ । ବ୍ରଜରାଜନଗରର ବିଜେଡି କାର୍ଯ୍ୟାଳୟରେ କିଶୋର ମହାନ୍ତିଙ୍କ ଶେଷ ଦର୍ଶନ କରିଛନ୍ତି ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାଶ । ଅପରାହ୍ନରେ ଝାଡ଼େଶ୍ବର ମନ୍ଦିରସ୍ଥିତ ମୁକ୍ତିଧାମ ଠାରେ ପାର୍ଥିବ ଶରୀରକୁ ଶେଷକୃତ୍ୟ କରାଯିବ ।
ଗୁରୁବାର କିଶୋର ମହାନ୍ତିଙ୍କର ଅକାଳ ବିୟୋଗ ହୋଇଥିଲା । ୬୩ ବର୍ଷ ବୟରେ ହୃଦଘାତରେ ଆଖି ବୁଜିଛନ୍ତି ପଶ୍ଚିମ ଓଡ଼ିଶାର ଏହି ଟାଣୁଆ ବିଜେଡି ନେତା । କିଶୋରଙ୍କ ଦେହାନ୍ତ ଖବର ସମଗ୍ର ଓଡିଶା ରାଜନୀତିରେ ଏକ ଅପୂରଣୀୟ ଶୂନ୍ୟ ସ୍ଥାନ ସୃଷ୍ଟି କରିଛି । ଅକାଳରେ ବିୟୋଗ ଖବରକୁ ବିଶ୍ୱାସ କରିବା ସାଧାରଣ ଲୋକଙ୍କ ପକ୍ଷେ ଅସମ୍ଭବ ହୋଇ ପଡ଼ିଛି ।
