ଗାନ୍ଧି ଜୟନ୍ତୀରୁ ବିଜେଡିର ରାଜ୍ୟବ୍ୟାପୀ ଜନସଚେତନତା ଅଭିଯାନ ଆରମ୍ଭ
ଭୁବନେଶ୍ୱର: ଆଜି ଗାନ୍ଧି ଜୟନ୍ତୀ । ୧୮୬୯ ମସିହା ଅକ୍ଟୋବର ୨ ତାରିଖରେ ଗୁଜରାଟର ପୋରବନ୍ଦରରେ ଜନ୍ମ ନେଇଥିଲେ ଜାତୀର ଜନକ ମହାତ୍ମା ଗାନ୍ଧି । ଆଜି ସାରା ଦେଶ ତାଙ୍କର ୧୫୧ ତମ ଜୟନ୍ତୀ ପାଳୁନ କରୁଛି । ଏଥିପାଇଁ ଭୁବନେଶ୍ୱର କଟକ ସମେତ ସାରା ରାଜ୍ୟରେ ଆୟୋଜିତ ହୋଇଛି ସ୍ୱତନ୍ତ୍ର କାର୍ଯ୍ୟକ୍ରମ । କଟକର ସ୍ୱରାଜ୍ ଆଶ୍ରମରେ ଗାନ୍ଧିଙ୍କ ଜନ୍ମ ତିଥି ପାଳନ ପାଇଁ ବିଶେଷ ଆୟୋଜନ ହୋଇଛି । ତେବେ କୋଭିଡ କଟକଣା ଭିତରେ ଶ୍ରଦ୍ଧାସୁମନ ଅର୍ପଣ କରିବେ ରାଜ୍ୟବାସୀ ।
ଅନ୍ୟପଟେ ଗାନ୍ଧୀ ଜୟନ୍ତୀ ଅବସରରେ ଆଜିଠୁ ବିଜେଡିର ରାଜ୍ୟବ୍ୟାପୀ ଜନ ସଚେତନତା ଅଭିଯାନ ଆରମ୍ଭ ହେଉଛି । ନଭେମ୍ବର ୨ ତାରିଖ ପର୍ଯ୍ୟନ୍ତ ଚାଲିବ ଏହି ଅଭିଯାନ । ଏନେଇ ସମସ୍ତ ସାଂସଦ, ବିଧାୟକ ଓ ରାଜ୍ୟସ୍ତରୀୟ କର୍ମକର୍ତ୍ତାଙ୍କୁ ଚିଠି ଲେଖିଛନ୍ତି ସୁପ୍ରିମୋ ନବୀନ ପଟ୍ଟନାୟକ । ମୁଖ୍ୟମନ୍ତ୍ରୀ ନିଜ ପତ୍ରରେ ଲେଖିଛନ୍ତି ଯେ, ୨୦ ବର୍ଷ ଧରି ବିଜେଡି ରାଜ୍ୟବାସୀଙ୍କ ସୁଖଦୁଃଖର ସାଥି ହୋଇରହିଛି ।
କରୋନା ମହାମାରୀର ମାସ୍କ ହିଁ ସୁରକ୍ଷା କବଚ । ଏଣୁ ପ୍ରତି ପଞ୍ଚାୟତରେ ଗ୍ରାମବାସୀଙ୍କୁ ମାସ୍କ ବାଣ୍ଟିବେ ବିଜେଡି କର୍ମକର୍ତ୍ତା। ସଂକ୍ରମଣରୁ ରକ୍ଷା ପାଇବା ପାଇଁ ସଚେତନ କରାଯିବ । ଟେଷ୍ଟିଂରେ ସହଯୋଗ କରି ଚିକିତ୍ସା କରାଇବାକୁ ସଚେତନ କରାଇବା ସହ କୋଭିଡ୍ ଯୋଦ୍ଧାଙ୍କୁ ଉତ୍ସାହିତ କରାଯିବ । ପ୍ଲାଜ୍ମା ଦାନର ମହାନତା ସମ୍ପର୍କରେ ଲୋକଙ୍କୁ ଅବଗତ କରାଯିବ । ନିଜ ନିର୍ବାଚନ ମଣ୍ଡଳୀରେ ‘ଓଡ଼ିଶା ମୋ ପରିବାର’ ସହ ସାମିଲ ହୁଅନ୍ତୁ । ଓଡ଼ିଶାବାସୀଙ୍କ ପାଇଁ ଉତ୍ତର ଦାୟିତ୍ୱ ନିର୍ବାହ କରିବ ବିଜେଡି । କରୋନା ବିରୋଧରେ ସଂଗ୍ରାମ ଜାରି ରହିବ, ଓଡ଼ିଶା ଜିତିବ । ଏହି ମନ୍ତ୍ର ନେଇ କାମ କରିବାକୁ ଆହ୍ୱାନ ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
