ଓଡ଼ିଶାବାସୀଙ୍କ ବିଶ୍ୱାସକୁ ଭରସା କରି ଆଗକୁ ବଢୁଛି ବିଜେଡି : ନବୀନ ପଟ୍ଟନାୟକ

ଭୁବନେଶ୍ବର : ଆଜି ୨୭ ବର୍ଷର ସେବା ଦେଇଥିବା ବିଜୁ ଜନତା ଦଳ ଦେଶର ଏକ ଶକ୍ତିଶାଳୀ ଆଞ୍ଚଳିକ ଦଳ ଭାବେ ପାଳୁଛି ପ୍ରତିଷ୍ଠା ଦିବସ । ଶଙ୍ଖ ଭବନରେ ଆୟୋଜିତ ହୋଇଛି ରାଜ୍ୟସ୍ତରୀୟ କାର୍ଯ୍ୟକ୍ରମ । ବିଜେଡି ପ୍ରତିଷ୍ଠା  ଦିବସ ଅବସରରେ ଅଭିନନ୍ଦନ ଜଣାଇଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ  । ସେ କହିଛନ୍ତି, ବିଜେଡି ଏକ ଶକ୍ତିଶାଳୀ ଆଞ୍ଚଳିକ ଦଳ । ବିଜେଡି ଉପରେ ଲୋକଙ୍କ ଆସ୍ଥା ରହିଛି । ବିଜେଡି ଜନ୍ମ ବେଳେ ଦଳ ସଫଳ ହେବ ନାହିଁ ବୋଲି ବିରୋଧି କହୁଥିଲେ । କିନ୍ତୁ ଓଡ଼ିଶାବାସୀଙ୍କ ସମର୍ଥନରେ ଦଳ ୫ଥର ସରକାର ଗଠନ କରିଛି । ଗତ ୨୪ ବର୍ଷରେ ବିଜେଡି ଓଡ଼ିଶାକୁ ସାରା ଦୁନିଆରେ ଏକ ଶସକ୍ତ ରାଜ୍ୟର ପରିଚୟ ଦେଇଛି । ଓଡ଼ିଶାରେ ଗରିବି କମିବା ସହ ବିପର୍ଯ୍ୟୟ ପରିଚାଳନାରେ ଓଡ଼ିଶା ନୂଆ ପରିଚୟ ସୃଷ୍ଟି କରିଛି । ଓଡ଼ିଶାବାସୀଙ୍କ ଭଲ ପାଇବା ପାଇଁ ବିଜେଡି ଏକ ଶକ୍ତିଶାଳୀ ଦଳରେ ପରିଣତ ହୋଇଛି । ଗତ ନିର୍ବାଚନରେ ଆମେ ପରାଜିତ ହୋଇନାହୁଁ । ବିଜେପି ମିଛ କହି କ୍ଷମତାକୁ ଆସିଛି । ଦରଦାମ ବୃଦ୍ଧିରେ ଲୋକ ଅତିଷ୍ଠ ହୋଇଛନ୍ତି । ଆମ ଭୁଲ ହେଲା ସେମାନଙ୍କ ନକରାତ୍ମକ ପ୍ରଚାରର କାଉଣ୍ଟର କରିପାରିଲୁ ନାହିଁ । ଏବେ ଓଡ଼ିଶାବାସୀ  ବୁଝିଲେଣି ଯେ, ବିଜେପି ମିଥ୍ୟା ପ୍ରତିଶ୍ରୁତି ଦେଇ କ୍ଷମତାକୁ ଆସିଛି । ଗତ ୬ ମାସରେ ରାଜ୍ୟ ବିଜେପି ସରକାରର ବଡ଼ ଉପଲବ୍ଧି ହେଉଛି ଦରଦାମ ବୃଦ୍ଧି । କେବେ ଏହି ସରକାରର କୁମ୍ଭକର୍ଣ୍ଣ ନିଦ ଭାଙ୍ଗିବ ? ବିଜେଡିର ଭବିଷ୍ୟତ ଉଜ୍ୱଳ । ଓଡ଼ିଶାର ହକ ପାଇଁ ଲଢୁଥିବା ଦଳ ହେଉଛି ବିଜେଡି ଲୋକଙ୍କ ହୃଦୟରେ ସବୁଦିନ ପାଇଁ ଅଛି  । ଆଗାମୀ ଶହେ ବର୍ଷ ପାଇଁ ବିଜେଡି ଓଡ଼ିଶାର ସେବା କରିବ ବୋଲି କହିଛନ୍ତି ନବୀନ ।

ଶଙ୍ଖ ଭବନ ସହ ରାଜ୍ୟର ସମସ୍ତ ନିର୍ବାଚନ ମଣ୍ଡଳୀରେ ବି ପ୍ରତିଷ୍ଠା ଦିବସ ପାଳନ କରାଯାଉଛି । ନବୀନଙ୍କ ନେତୃତ୍ବରେ ଗତ ୨୭ ବର୍ଷ ଧରି ଉତ୍ସର୍ଗୀକୃତ ମନୋଭାବ ନେଇ ନିଷ୍ଠାପର ଭାବେ ଜନସେବା ଯୋଗାଇ ଆସୁଛି ବିଜେଡି । ବିଜେଡିକୁ ଆହୁରି ଶକ୍ତିଶାଳୀ କରି ଆହୁରି ଲୋକଙ୍କ ପାଇଁ ସମର୍ପିତ ହେବାକୁ ଶପଥ ନେଇଛନ୍ତି ଦଳୀୟ ନେତା ଓ କର୍ମୀ । ଗତ ୨୭ ବର୍ଷରେ ନବୀନ ପଟ୍ଟନାୟକଙ୍କ ନେତୃତ୍ବରେ ନୂଆ ଓଡ଼ିଶା ଗଠନ ହୋଇଛି ।