ଅର୍ଗସ ଟିଭି ପଦମପୁରରେ ବିଜେପି ପାଇଁ ବାଣ୍ଟୁଛି ଟଙ୍କା, ସିଇଓଙ୍କ ପାଖରେ ଫେରାଦ ହେଲା ବିଜେଡି
ଭୁବନେଶ୍ବର: ବିଜେପି ପ୍ରାର୍ଥୀଙ୍କ ପାଇଁ ଟଙ୍କା ବାଣ୍ଟୁଛି ଅର୍ଗସ ନ୍ୟୁଜ୍ ଚ୍ୟାନେଲ । ଖବର ସଂଗ୍ରହ ନାଁରେ ଲୋକଙ୍କୁ ଟଙ୍କା ବାଣ୍ଟି ବିଜେପିକୁ ଭୋଟ ଦେବାକୁ ପ୍ରବର୍ତ୍ତାଉଛି । ଏହାସହ ନୀରିହ ଗାଁ ଲୋକଙ୍କୁ ଟଙ୍କା ଦେଇ କ୍ୟାମେରା ଆଗରେ ବିଜେଡି ଟଙ୍କା ବାଣ୍ଟୁଥିବା ନେଇ କହିବାକୁ କରୁଛନ୍ତି ବାଧ୍ୟ । ଏମିତି ଅଭିଯୋଗ ଆଣି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କୁ ଭେଟିଛି ବିଜେଡି ପ୍ରତିନିଧି ମଣ୍ଡଳୀ । ଅର୍ଗସ ନ୍ୟୁଜ୍ ଚ୍ୟାନେଲ ପଦମପୁରର ଦୁଇଟି ଗାଁରେ ଟଙ୍କା ବାଣ୍ଟିଥିବା ପ୍ରମାଣ ଦେବା ସହ ତୁରନ୍ତ ଏଠାରେ ଯାଞ୍ଚ କରି କାର୍ଯ୍ୟାନୁଷ୍ଠାନ ନେବାକୁ କରିଛି ଦାବି ।
ବିଜେଡି ପ୍ରତିନିଧି ଦଳର ନିତୃତ୍ବ ନେଇଥିବା ସାଂସଦ ସସ୍ମିତ ପାତ୍ର କହିଛନ୍ତି, ‘ଏକ ସମ୍ବେଦନଶୀଳ ବିଷୟକୁ ନେଇ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କ ପାଖକୁ ଆସିଥିଲୁ । ପଦମପୁର ଉପନିର୍ବାଚନରେ ଗଣମାଧ୍ୟମର ଯେମିତି ଭୁମିକା ରହିବା କଥା ଏକ ନିର୍ଦ୍ଦିଷ୍ଟ ଚ୍ୟାନେଲରେ ଦେଖିବାକୁ ମିଳୁନି । ଅର୍ଗସ୍ ଟିଭି ବିରୋଧରେ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କ ପାଖକୁ ଅଭିଯୋଗ ନେଇ ଆସିଥିଲୁ । ନିର୍ବାଚନ ପ୍ରଚାର ସମୟ ସରିବା ପରେ ଏବେ ବି ଅର୍ଗସ ନ୍ୟୁଜ୍ ଚ୍ୟାନେଲର ୪୦ରୁ ୫୦ ଟିମ୍ ପଦମପୁରରେ ଅଛନ୍ତି । ଏମାନଙ୍କୁ ପଦମପୁରରେ ବିଜେପି ପ୍ରାର୍ଥୀ ପ୍ରଦୀପ ପୁରୋହିତଙ୍କ ପାଇଁ ଟଙ୍କା ବାଣ୍ଟିବାକୁ ଦାୟିତ୍ବ ଦିଆଯାଇଛି । ପଦମପୁର ବ୍ଲକର ବରିକେଲ ପଞ୍ଚାୟତ ସିମନପୁର ଗାଁ, ପାଇକମାଳ ବ୍ଲାକ କଂସରା ପଞ୍ଚାୟତରେ ଅର୍ଗସ ତରଫରୁ ଟଙ୍କା ବଣ୍ଟା ଯାଉଥିବା ତଥ୍ୟ ଦେଇଛୁ । ସେତିକି ନୁହେଁ ଗାଁର ନୀରିହ ଲୋକଙ୍କୁ ଟଙ୍କା ଦେବା ପରେ କ୍ୟାମେରାରେ ବିଜେଡି ଟଙ୍କା ବାଣ୍ଟୁ ଥିବା କହିବାକୁ ବାଧ୍ୟ କରୁଛନ୍ତି ।’
ଆଗକୁ ସେ କହିଛନ୍ତି, ‘ଏକ ଗଣମାଧ୍ୟମ ହୋଇ ବିଜେପି ପ୍ରାର୍ଥୀଙ୍କ ପାଇଁ ଏମିତି କାମ କରିବା ଅତ୍ୟନ୍ତ ଜଘନ୍ୟ । ନିର୍ବାଚନ ସମୟରେ ଏକ ଗଣମାଧ୍ୟମର ଯେତିକି ଟିମ୍ ରହିବା କଥା, ସେତିକିକୁ ଛାଡି ଅତିରିକ୍ତ ଟିମଙ୍କୁ ପଦମପୁରରୁ ବାହାର କରିବାକୁ ଆମେ ଦାବି କରିଛୁ । ଏ ଦୁଇଟି ଗାଁରେ ତୁରନ୍ତ ଯାଞ୍ଚ କରିବାକୁ ଆମେ ଦାବି କରିଛୁ ।’
