ରାଜ୍ୟସଭା ଉପାଧ୍ୟକ୍ଷ ନିର୍ବାଚନରେ ଏନ୍ଡିଏ ପ୍ରାର୍ଥୀ ହରିବଂଶ ନାରାୟଣଙ୍କୁ ବିଜେଡିର ସମର୍ଥନ
ନୂଆଦିଲ୍ଲୀ: ରାଜ୍ୟସଭା ଉପାଧ୍ୟକ୍ଷ ନିର୍ବାଚନରେ ଏନ୍ଡିଏ ପ୍ରାର୍ଥୀ ତଥା ଜେଡିୟୁ ସାଂସଦ ହରିବଂଶ ନାରାୟଣ ସିଂହଙ୍କୁ ବିଜେଡିର ସମର୍ଥନ । ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଘୋଷଣା କରିଛନ୍ତି । ହରିବଂଶଙ୍କୁ ସମର୍ଥନ କରିବା ପାଇଁ ଜେଡିୟୁ ସଭାପତି ତଥା ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ସୋମବାର ପୁଣି ନବୀନଙ୍କୁ ଫୋନ୍ କରିଥିଲେ ।
ସୋମବାର ରାଜ୍ୟସଭା ଉପାଧ୍ୟକ୍ଷ ନିର୍ବାଚନ ହେବାକୁ ଯାଉଛି । ଏନ୍ଡିଏ ପକ୍ଷରୁ ଜେଡିୟୁ ସାଂସଦ ହରିବଂଶ ନାରାୟଣ ପ୍ରାର୍ଥୀ ହୋଇଥିବା ବେଳେ ଆର୍ଜେଡି ପକ୍ଷରୁ ସାଂସଦ ମନୋଜ ଝା ପ୍ରାର୍ଥୀ ହୋଇଛନ୍ତି । ଉଭୟ ସାଂସଦ ବିହାରର ହୋଇଥିବା ବେଳେ ଏବେ ଉପାଧ୍ୟକ୍ଷ ରେସ୍ ଜୋର ଧରିଛି । ରାଜ୍ୟସଭାରେ ୨୪୫ ସଦସ୍ୟ ଅଛନ୍ତି । ଉପାଧ୍ୟକ୍ଷ ପଦବୀ ଜିତିବା ପାଇଁ ୧୨୩ଟି ଭୋଟ୍ ଆବଶ୍ୟକ । ଏନ୍ଡିଏ ପ୍ରାର୍ଥୀ ହରିବଂଶଙ୍କ ପାଖରେ ୧୧୬ଜଣ ପ୍ରାର୍ଥୀଙ୍କ ସମର୍ଥନ ଥିଲା । ଏବେ ବିଜେଡିର ୯ଜଣ ରାଜ୍ୟସଭା ସଦସ୍ୟ ତାଙ୍କୁ ଭୋଟ୍ ରହିଛି । ଏହା କ୍ରମରେ ହରିବଂଶ ଜିତିବା ଏକପ୍ରକାର ନିଶ୍ଚିତ ହୋଇଯାଇଛି ।
ବିପକ୍ଷରେ ଥିବା ଆର୍ଜେଡି ସାଂସଦ ମନୋଜଙ୍କ ସପକ୍ଷରେ ଅଛନ୍ତି ୧୨ରୁ ଅଧିକ ରାଜନୈତିକ ଦଳ । ଏସବୁ ଦଳ ମଧ୍ୟରେ କଂଗ୍ରେସର ୪୦, ବାମଦଳର ୬, ଡିଏମକେର ୭, ଶିବସେନାର ୩, ଏନ୍ସିପିର ୪ ସଦସ୍ୟ ଅଛନ୍ତି । ସେହିପରି ସମାଜବାଦୀ ପାର୍ଟି, ଟିଏମ୍ସି, ପିଡିପି, ନ୍ୟାସନାଲ କନଫରେନ୍ସ ଭଳି ଦଳଙ୍କ ସମର୍ଥନ ହାତେଇବାକୁ ଚେଷ୍ଟା କରୁଛନ୍ତି ମନୋଜ ଝା । ରାଜ୍ୟସଭା ଉପାଧ୍ୟକ୍ଷ ଏକ ସାମ୍ବିଧାନିକ ପଦବୀ ହୋଇଥିବା ବେଳେ, ଜଣେ ରାଜ୍ୟସଭା ସଦସ୍ୟଙ୍କ ହିଁ ଏହି ପଦବୀ ପାଇଁ ନିର୍ବାଚିତ ହୋଇଥାନ୍ତି । ଏପ୍ରିଲ ୯ରେ ରାଜ୍ୟସଭା ଉପାଧ୍ୟକ୍ଷ ଭାବେ ହରିବଂଶ ନାରାୟଣ ସିଂହଙ୍କ କାର୍ଯ୍ୟକାଳ ସରିଯାଇଥିଲା ।
୧୯୬୯ରେ ପ୍ରଥମ ରାଜ୍ୟସଭା ଉପାଧ୍ୟକ୍ଷ ନିର୍ବାଚନ ହୋଇଥିଲା । ଏଥର ୨୦ତମ ଉପାଧ୍ୟକ୍ଷ ନିର୍ବାଚନ ହେବ । ଉପରାଷ୍ଟ୍ରପତି ରାଜ୍ୟସଭାର ଅଧ୍ୟକ୍ଷ ଭାବେ ଗୃହ ପରିଚାଳନା କରିଥାନ୍ତି । ତାଙ୍କ ଅନୁପସ୍ଥିତିରେ ଗୃହର କାର୍ଯ୍ୟ ପରିଚାଳନା ଦାୟିତ୍ୱ ଉପାଧ୍ୟକ୍ଷଙ୍କ ହାତରେ ଥାଏ ।
