ଜେଲ୍ ଫେରନ୍ତା ବିଜେପି ନେତାଙ୍କ ସାମ୍ବାଦିକ ସମ୍ମିଳନୀ ଅତ୍ୟନ୍ତ ଲଜ୍ଜାଜନକ: ବିଜେଡି
ଭୁବନେଶ୍ୱର: ଆଜି ବିଜେପି ପକ୍ଷରୁ ଜଣେ ହତ୍ୟା ଅଭିଯୁକ୍ତ ତଥା ଜେଲ ଫେରନ୍ତା ବ୍ୟକ୍ତି ଇରାଶିଶ ଆଚାର୍ଯ୍ୟ ଗଣମାଧ୍ୟମକୁ ସମ୍ବୋଧନ କରୁଥିବା ଦେଖିବା ପ୍ରକୃତରେ ଲଜ୍ଜାଜନକ ଅଟେ ବୋଲି କହିଛନ୍ତି ବିଜେଡି ମୁଖପାତ୍ର ଚିନ୍ମୟ ସାହୁ । ବିଜେପି ସାମ୍ବାଦିକ ସମ୍ମିଳନୀର ଜବାବ ଦେଇ ବିଜେଡି ମୁଖପାତ୍ର କହିଛନ୍ତି, ଏହା ସ୍ୱାଭାବିକ ଭାବରେ ଆଶା କରାଯାଏ ଯେ ଜଣେ ହତ୍ୟାକାରୀ ଯିଏ କି ଅନେକ ମାସ ଜେଲରେ ବିତାଇଛନ୍ତି । ସିଏ ଜଣେ ମହିଳାଙ୍କ ବିରୋଧରେ ଚାଲିଥିବା ଏପରି ସମ୍ବେଦନଶୀଳ ଜଘନ୍ୟ ଅପରାଧର ରାଜନୀତିକରଣ କରିବାକୁ ଚେଷ୍ଟା କରିବ ।
ଆଜି ବିଜେପି ସାମ୍ବାଦିକ ସମ୍ମିଳନୀରେ ମଧ୍ୟ ଆଉ ଗୋଟିଏ ଉଦାହରଣ ଦେଖିବାକୁ ମିଳିଛି, ଇରାଶିଶ ଆଚାର୍ଯ୍ୟଙ୍କ ଭଳି ବିଜେପି ନେତାମାନେ କିଭଳି ରାଜନୀତିରେ ତିଷ୍ଠି ରହିବାକୁ ଟିଭିରେ ମୁହଁ ଦେଖାଇବା ପାଇଁ ପରସ୍ପର ମଧ୍ୟରେ ପ୍ରତିଦ୍ୱନ୍ଦ୍ୱିତା ଚଳାଇଛନ୍ତି । ଅତ୍ୟନ୍ତ ଘୃଣ୍ୟ ବିଷୟ ହେଉଛି ଓଡ଼ିଶା ବିଜେପି ଜଣେ ଅପରାଧୀଙ୍କ ପାଇଁ ଏତେ ତଳକୁ ଖସିଯାଇଛି ଯେ ଯିଏ ଗିରଫ ହୋଇ ଜେଲରେ ଥିଲେ ସିଏ ଏବେ ଜଣେ ପୀଡ଼ିତାଙ୍କୁ ନ୍ୟାୟ ଦେବାପାଇଁ ଦାବି କରୁଛନ୍ତି ବୋଲି ବିଜେଡି ମୁଖପାତ୍ର କହିଛନ୍ତି ।
