ଧର୍ମଶାଳା ସ୍ବାଧୀନ ବିଧାୟକ ପ୍ରାର୍ଥୀଙ୍କ ବିରୋଧରେ ସିଇଓଙ୍କୁ ଫେରାଦ ହେଲା ବିଜେଡି

ଭୁବନେଶ୍ବର: ଧର୍ମଶାଳାରେ ସ୍ବାଧୀନ ବିଧାୟକ ପ୍ରାର୍ଥୀ ହିମାଂଶ ଶେଖର ସାହୁଙ୍କ ଦାଦାଗିରି । କାର୍ଯ୍ୟାନୁଷ୍ଠାନ ଦାବି କରି ସିଇଓଙ୍କ ନିକଟରେ ଫେରାଦ ହେଲେ ବିଜେଡି ପ୍ରତିନିଧି ମଣ୍ଡଳି । ଗତ ମେ’ ୨୭ରେ ବିଜେଡିର ବିଧାୟକ ପ୍ରାର୍ଥୀ ପ୍ରଣବ ବଳବନ୍ତରାୟ ଓ ସମର୍ଥକଙ୍କ ଉପରେ ସେ ଓ ତାଙ୍କ ସମର୍ଥକ ଆକ୍ରମଣ କରିଥିବା ଅଭିଯୋଗ କରିଛି ବିଜେଡି ।

ଏନଏଚ ୫୩ ନିକଟରେ ଏକ ସ୍କର୍ପିଓରେ ଆସି ହିମାଂଶୁ ଦାଦାଗିରି କରିବା ସହ ବାଇକ ରାଲି ଉପରେ ଗାଡି ଚଢାଇ ଦେଇଥିଲେ । ପ୍ରଣବ ଅଳ୍ପକେ ବର୍ତ୍ତି ଯାଇଥିଲେ । ସେହିପରି ପୋଲିଂ ବେଳେ ଏକ ବୁଥରେ ବି ପ୍ରଣବ ଓ ପିଏସଓଙ୍କ ଉପରେ ଆକ୍ରମଣ ହୋଇଥିଲା । ଏପରିକି ସୁନା ଚେନ ଓ ଟଙ୍କା ମଧ୍ଯ ଲୁଟି ନିଆଯାଇଥିଲା । ସେମାନେ ଧର୍ମଶାଳା ବ୍ଲକରେ ଥିବା କଳ୍ପତରୁ ଫାଉଣ୍ଡେସନ ଘର ଉପରେ ଆକ୍ରମଣ କରିବା ସହ ପ୍ରଣବଙ୍କୁ ଜୀବନରୁ ମାରି ଦେବାର ଧମକ ଦେଇଥିଲେ । ଏନେଇ ଦୃଢ କାର୍ଯ୍ୟାନୁଷ୍ଠାନ ନେବାକୁ ସିଇଓଙ୍କ ନିକଟରେ ଦାବି କରିଛି ବିଜେଡି ।