ମାଲକାନଗିରିରେ ମାଇଲଷ୍ଟୋନ, ବିଜୁ ସ୍ୱାସ୍ଥ୍ୟ କଲ୍ୟାଣ ସ୍ମାର୍ଟକାର୍ଡ ବଣ୍ଟିବେ ମୁଖ୍ୟମନ୍ତ୍ରୀ
ମାଲକାନଗିରି: ବାସ୍ତବ ରୂପ ନେଉଛି ମୁଖ୍ୟମନ୍ତ୍ରୀଙ୍କ ସୁସ୍ଥ ଓଡିଶା, ସୁଖୀ ଓଡ଼ିଶାର ସ୍ବପ୍ନ । ମାଲକାନଗିରି ମାଟିରୁ ଆରମ୍ଭ ହେବ ବିଜୁ ସ୍ବାସ୍ଥ୍ୟ କଲ୍ୟାଣ ଡିଜିଟାଲ କାର୍ଡ ବଣ୍ଟନ କାର୍ଯ୍ୟକ୍ରମ । ସାରା ଦେଶରେ ପ୍ରଥମ ଥର ପାଇଁ ସ୍ବାସ୍ଥ୍ୟ ଚିକିତ୍ସା କ୍ଷେତ୍ରରେ ଓଡିଶା ଆଣିବ ନୂଆ ବିପ୍ଳବ । ହିତାଧିକାରୀଙ୍କୁ ସିଧାସଳଖ କାର୍ଡ ବାଣ୍ଟିବା ପାଇଁ ମାଲକାନଗିରି ଯିବେ ମୁଖ୍ୟମନ୍ତ୍ରୀ । ଏଥିପାଇଁ ସବୁ ପ୍ରସ୍ତୁତି ଶେଷ ହୋଇଛି ।ସ୍ବାସ୍ଥ୍ୟ କ୍ଷେତ୍ରରେ ଜନତାଙ୍କ ପାଇଁ ସବୁଠୁ ବଡ଼ ଯୋଜନା ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା ।
ଆସନ୍ତାକାଲି ଲୋକଙ୍କୁ ବଣ୍ଟାଯିବ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାର ଡିଜିଟାଲ କାର୍ଡ । ଆଦିବାସୀ ଅଧିଷ୍ୟୁତ ମାଲକାନଗିରି ଜିଲ୍ଲାରେ ଶୁଭ ଉନ୍ମୋଚନ କରିବେ ମୁଖ୍ୟମନ୍ତ୍ରୀ । ଜିଲ୍ଲାରେ ସର୍ବମୋଟ 1 ଲକ୍ଷ 55 ହଜାର 823 କାର୍ଡ ବଣ୍ଟନ କରାଯିବ । କାର୍ଡଧାରୀଙ୍କ ପାଇଁ 5 ଲକ୍ଷରୁ 10 ଲକ୍ଷ ଯାଏଁ ସ୍ବାସ୍ଥ୍ୟ ବୀମା ରହିବ । କାଲିମେଳା ବ୍ଲକରେ ସର୍ବାଧିକ 36 ହଜାର 862 ଜଣ ହିତାଧିକାରୀ ଥିବା ବେଳେ ମାଲକାନଗିରି ବ୍ଲକରେ 26 ହଜାର 839, ମାଥିଲିରେ 22 ହଜାର 889, କୋରୁକୋଣ୍ଡାରେ 18 ହଜାର 550, ଚିତ୍ରକୋଣ୍ଡାରେ 16 ହଜାର 788, ଖଇରପୁଟରେ 14 ହଜାର 738, ପଡିଆ ବ୍ଲକରେ 11 ହଜାର 779, ମାଲକାନଗିରି ପୌରପରିଷଦରେ 5 ହଜାର 173 ଏବଂ ବାଲିମେଳା ଏନଏସିରେ 2 ହଜାର 205 ହିତାଧିକାରୀ ଏହି ସୁବିଧା ପାଇବେ ।
ରାଜ୍ୟର ବରିଷ୍ଠ ମନ୍ତ୍ରୀମାନେ ମାଲକାନଗିରି ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି । ଦଳର ସାଙ୍ଗଠନିକ କାର୍ଯ୍ୟକ୍ରମ ସମେତ ମୁଖ୍ୟମନ୍ତ୍ରୀଙ୍କ କାର୍ଯ୍ୟକ୍ରମକୁ ସଫଳ କରିବାକୁ ପ୍ରସ୍ତୁତି ଜାରି ରଖିଛନ୍ତି । ଆସନ୍ତା 21ରୁ 25 ତାରିଖ ମଧ୍ୟରେ ସମସ୍ତ କାର୍ଡ ବଣ୍ଟନ ପାଇଁ ଲକ୍ଷ୍ୟ ରଖାଯାଇଛି । ମୁଖ୍ୟମନ୍ତ୍ରୀଙ୍କ ଗସ୍ତକୁ ନେଇ ପୋଲିସ ବିଭାଗ ପଷରୁ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି ।
