କ୍ରୀଡା ଜଗତରେ ରୁଚି ରଖିଥିବା ପ୍ରତିଭାମାନଙ୍କୁ ସାମ୍ନାକୁ ଆଣିବ ବିଜୁ ପ୍ରିମିୟର ଲିଗ୍ କ୍ରିକେଟ ଟୁର୍ଣ୍ଣାମେଣ୍ଟ
ଖୋର୍ଦ୍ଧା: ମୟୁରଭଞ୍ଜ , କଟକ ପରେ ଏବେ ଖୋର୍ଦ୍ଧାରେ ଆରମ୍ଭ ହୋଇଯାଇଛି ବିଜୁ ପ୍ରିମିୟର ଲିଗ୍ । କ୍ରୀଡା ଜଗତରେ ରୁଚି ରଖିଥିବା ପ୍ରତିଭାମାନଙ୍କୁ ଚୟନ କରିବାକୁ ମୁଖ୍ୟମନ୍ତ୍ରୀଙ୍କ ନୂଆ ପ୍ରୟାସ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶ କ୍ରମେ ଆରମ୍ଭ ହୋଇଯାଇଛି ବିଜୁ ପ୍ରିମିୟର ଲିଗ କ୍ରିକେଟ ଟୁର୍ଣ୍ଣାମେଣ୍ଟ । ଫଳରେ ଖେଳରେ ରୁଚି ରଖୁଥିବା ପ୍ରତିଭାମାନଙ୍କୁ ଚୟନ କରାଯାଇପାରିବ । ଖୋର୍ଦ୍ଧାରେ ରଙ୍ଗାରଙ୍ଗ କାର୍ଯ୍ୟକ୍ରମ ମାଧ୍ୟମରେ ଏହା ଉଦଘାଟନ ହୋଇଛି ।
ରାଜ୍ୟରେ କ୍ରୀଡ଼ାର ପ୍ରସାର ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶ କ୍ରମେ ରାଜ୍ୟ ବିଜେଡି ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାସଙ୍କ ନେତୃତ୍ୱରେ ବିଭିନ୍ନ ସ୍ଥାନରେ ଆରମ୍ଭ ହୋଇଛି ଏହି ବିଜୁ ପ୍ରିମିୟର ଲିଗ୍ । ଖୋର୍ଦ୍ଧାରେ ଏହି ଟୁର୍ଣ୍ଣାମେଣ୍ଟକୁ ରାଜ୍ୟ ସମ୍ପାଦକ ଯୁବ ବ୍ୟପାର ତଥା ଧର୍ମଶାଳା ବିଧାୟକ ପ୍ରଣବ କୁମାର ବଳବନ୍ତରାୟ, ରାଜ୍ୟ ଯୁବ ବିଜେଡ଼ି ସଭାପତି ଡ଼ଃ ବ୍ୟୋମକେଶ ରାୟ, ରାଜ୍ୟ ଯୁବ ବିଜେଡି ସାଧାରଣ ସମ୍ପାଦକ ଏଲିନା ଦାସ, ଖୋର୍ଦ୍ଧା ବିଧାୟକ ଜିତୁ ମିତ୍ର ଏବଂ ଏହି ଟୁର୍ଣ୍ଣାମେଣ୍ଟର ମୁଖ୍ୟ ଆୟୋଜକ ତଥା ବେଗୁନିଆ ବିଧାୟକ ରାଜେନ୍ଦ୍ର କୁମାର ସାହୁ ପ୍ରମୁଖ ଉଦଘାଟନ କରିଥିଲେ । ବିଜୁବାବୁଙ୍କ ଫୋଟୋ ଚିତ୍ରରେ ମାଲ୍ୟାର୍ପଣ କରି ପୁରସ୍କାର ଉପରୁ ପରଦା ହଟାଇଥିଲେ ।
ଖୋର୍ଦ୍ଧାରେ ଆରମ୍ଭ ହେବାକୁ ଥିବା ଏହି ଟୁର୍ଣ୍ଣାମେଣ୍ଟରେ କନ୍ଧମାଳ, ଗଞ୍ଜାମ, ପୁରୀ, ଭୁବନେଶ୍ୱର , ଖୋର୍ଦ୍ଧା, ନୟାଗଡ ପ୍ରଭୂତି ୬ଟି ଜିଲ୍ଲାର ଖେଳାଳି ଖେଳିବେ । ତେବେ ଏହି ଅବସରରେ ଏକ ରଙ୍ଗାରଙ୍ଗ କାର୍ଯ୍ୟକ୍ରମର ଆୟୋଜନ କରାଯାଇଥିଲା । ହ୍ୟୁମାନ ସାଗରଙ୍କ ଟିମ ସଙ୍ଗୀତ ପରିବେଷଣ କରିଥିଲେ । ଖୋର୍ଦ୍ଧାରେ ଏହି ମ୍ୟାଚକୁ ଶାନ୍ତି ଶୃଙ୍ଖଳାର ଆୟୋଜନ କରିବାକୁ ସମସ୍ତଙ୍କ ସହଯୋଗ କାମନା କରିଥିଲେ ବିଧାୟକ ଜିତୁ ମିତ୍ର । ୭ ଦିନ ଧରି ଖେଳାଯିବାକୁ ଥିବା ଏହି ବିଜୁ ପ୍ରିମିୟର ଲିଗର ଉଦଜାପନ ଉତ୍ସବ ଆସନ୍ତା ୨୪ ତାରିଖରେ ହେବାକୁ ଯାଉଛି ।
