ଏନଏମ୍ଏ ଷଡ଼ଯନ୍ତ୍ର ନେଇ କେନ୍ଦ୍ର ଉପରେ ବର୍ଷିଲେ ବିଜୟ ମହାପାତ୍ର
ଭୁବନେଶ୍ୱର: ବିଜେପି ନେତାଙ୍କ ବିଜେପି ସରକାରଙ୍କୁ ଟାର୍ଗେଟ । କେନ୍ଦ୍ର ସରକାରଙ୍କ ଉପରେ ବର୍ଷିଛନ୍ତି ବରିଷ୍ଠ ବିଜେପି ନେତା ବିଜୟ ମହାପାତ୍ର । ଶ୍ରୀମନ୍ଦିର ବିରୋଧରେ କେନ୍ଦ୍ର ସରକାରଙ୍କ ଚକ୍ରାନ୍ତ ସନ୍ଦେହ କରି ନ୍ୟାସନାଲ ମନ୍ୟୁମେଣ୍ଟ ଅଥରିଟିର କାର୍ଯ୍ୟକଳାପ ବିରୋଧରେ ତଦନ୍ତ ଦାବି କରିଛନ୍ତି ବିଜୟ । ରାଜ୍ୟ ବିଜେପିର ଏହି ବରିଷ୍ଠ ନେତା କେନ୍ଦ୍ର ବିଜେପିକୁ ଘେରିବା ପରେ ବ୍ୟାକଫୁଟକୁ ଆସିଛି ଦଳ ।
ହେଲେ ମୁହଁ ଟାଣ କରି ଆରୋପ ପ୍ରତ୍ୟାରୋପ ରାଜନୀତିରେ ବ୍ୟସ୍ତ ବିଜେପି । ପ୍ରଥମେ ଆଇନ କରିବାକୁ ପରାମର୍ଶ ମାଗିବା ଓ ପରେ ପ୍ରତ୍ୟାହର କରିବା ନାଟକ ବିରୋଧରେ ବର୍ଷିଛନ୍ତି ବିଜେପି ଏହି ହେଭିଓ୍ବେଟ । କାହା ଇଙ୍ଗିତରେ ଏପରି ସ୍ପର୍ଶକାତର ଡ୍ରାଫଟ ପ୍ରସ୍ତାବ ଆଣାଯାଇଥିଲା ବୋଲି ସେ ପ୍ରଶ୍ନ କରିଛନ୍ତି । ଏନଏମଏ ଅଧ୍ୟକ୍ଷଙ୍କ ଅଜାଣତରେ ହୋଇଥିବା କଥା ଉପରେ ବି ବିଜୟଙ୍କ ବିଶ୍ବାସ ନାହିଁ । ଏହି ଘଟଣାର ତଦନ୍ତ ଦାବି କରି କେନ୍ଦ୍ର ବିଜେପିକୁ କାଠଗଡ଼ାକୁ ଟାଣିଛନ୍ତି ବିଜୟ ।
କେନ୍ଦ୍ର ସରକାରଙ୍କ ତ୍ରୁଟିକୁ ରାଜ୍ୟ ବିଜେପି ସାଂସଦ ଅନୁଭବ କରି କେନ୍ଦ୍ର ପର୍ଯ୍ୟଟନ ମନ୍ତ୍ରୀଙ୍କୁ ଭେଟିଥିଲେ । ପ୍ରସ୍ତାବ ପ୍ରତ୍ୟାହର ବି ହେଲା । ହେଲେ ଏଯାଏ କେନ୍ଦ୍ରର ଓକିଲାତି କରିବା ବନ୍ଦ କରି ନାହିଁ ରାଜ୍ୟ ବିଜେପି । ଏନଏମଏର ତ୍ରୁଟି ପାଇଁ ରାଜ୍ୟ ସରକାରଙ୍କ ଅଧିକାରୀଙ୍କୁ ଦାୟୀ କରି ଘଟଣାକୁ ଭିନ୍ନ ମୋଡ଼ ଦେବାକୁ ଚେଷ୍ଟା କରିଛନ୍ତି ରାଜ୍ୟ ବିଜେପି ନେତା । ଯାହାକୁ କଟାକ୍ଷ କରିଛି ବିଜେଡି ।
