ବଢ଼ିଲା ପେପର ଲିକ୍ ଅଡ଼ୁଆ: ଇସ୍ତଫା ଦେଲେ ବିଜେପି ବିଧାୟକ
ପାଟଣା: ବଢ଼ିଲା ବିହାର ୟୁପିଟିଇଟି ପେପର୍ ଲିକ୍ ଅଡୁଆ । ପ୍ରଶ୍ନପତ୍ର ଲିକ୍ ମାମଲାରେ ଇସ୍ତଫା ଦେଇଛନ୍ତି ବିହାର ବିଜେପି ବିଧାୟିକା ରଶ୍ମୀ ବର୍ମା । ଘଟଣାରେ ଭାଇ ଗିରଫ ହେବା ପରେ ଇସ୍ତଫା ଦେଇଛନ୍ତି ରଶ୍ମୀ । ନର୍କତିଆଗଞ୍ଜ ବିଧାନସଭା ନିର୍ବାଚନ ମଣ୍ଡଳୀରୁ ପ୍ରତିନିଧିତ୍ୱ କରୁଥିବା ରଶ୍ମୀ ନିଜର ଇସ୍ତଫା ପତ୍ର ବାଚସ୍ପତି ବିଜୟ କୁମାର ସିହ୍ନାଙ୍କୁ ପ୍ରଦାନ କରିଛନ୍ତି ।
ବହୁଚର୍ଚ୍ଚିତ ଉତ୍ତରପ୍ରଦେଶ ଟିଚର୍ସ ଏଲିଜିବିଲିଟି ଟେଷ୍ଟର ପ୍ରଶ୍ନପତ୍ର ଲିକ୍ ହେବା ଘଟଣାରେ ରଶ୍ମୀଙ୍କ ଭାଇ ଅନୂପ ପ୍ରସାଦଙ୍କୁ ଗିରଫ କରିଥିଲା ଉତ୍ତରପ୍ରଦେଶ ଏସଟିଏଫ । ଦିଲ୍ଲୀରେ ଅନୂପଙ୍କ ଏକ ପ୍ରିଣ୍ଟିଂ ପ୍ରେସ ରହିଛି । ପ୍ରଶ୍ନପତ୍ର ଲିକ୍ ଘଟଣାରେ ଭାଇଙ୍କ ଗିରଫ ପରେ ରଶ୍ମୀ କହିଥିଲେ, ତାଙ୍କ ସହ ଏହି ଘଟଣାର ସମ୍ପର୍କ ନାହିଁ । ହେଲେ କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧି ଭଦ୍ରା ପ୍ରଶ୍ନପତ୍ର ଲିକ୍ ମାମଲାରେ ବିଧାୟିକା ରଶ୍ମୀ ଓ ଭାଇ ଅନୂପଙ୍କ ଲିଙ୍କ୍ ପ୍ରକାଶ କରିବା ପରେ ଘଟଣାର ମୋଡ ବଦଳି ଯାଇଥିଲା ।
