ଯେଉଁମାନେ ମଦ୍ୟପାନ କରନ୍ତି ସେମାନେ ଭାରତୀୟ ନୁହଁନ୍ତି ମହାପାପୀ !

ପାଟନା: ବିହାରରେ ମଦ ନିଷେଧାଦେଶ କିପରି ସଫଳ ହେବ ସେନେଇ କ୍ରମାଗତ ଭାବରେ ନୂଆ ନୂଆ ପ୍ରୟାସ ଜାରି ରହିଛି । ବୁଧବାର ଦିନ ବିହାର ସରକାର ଏହି ନିଷେଧ ଆଇନରେ ସଂଶୋଧନ କରିଛନ୍ତି । ବିହାର ବିଧାନସଭାରେ ଏହି ବିଲ୍ ଉପରେ ଆଲୋଚନା କରାଯାଇଛି । ଏହି ସମୟରେ ମୁଖ୍ୟମନ୍ତ୍ରୀ ନୀତୀଶ କୁମାର କହିଛନ୍ତି ଯେ ବିଷାକ୍ତ ମଦ୍ୟପାନ ଯୋଗୁଁ ମୃତ୍ୟୁବରଣ କରିଥିବା ଲୋକମାନଙ୍କୁ କୌଣସି ସହାନୁଭୂତି ମିଳିବ ନାହିଁ । ସେ ଆହୁରି ମଧ୍ୟ କହିଛନ୍ତି ଯେ, ଯେଉଁମାନେ ଜାତିର ପିତା ବାପୁଙ୍କ ଭାବନାକୁ ବିଶ୍ୱାସ କରନ୍ତି ନାହିଁ, ସେମାନେ ଭାରତୀୟ ନୁହଁନ୍ତି । ସେମାନେ ଅଯୋଗ୍ୟ ଆଉ ମହାପାପୀ ।

କଡ଼ା ଆଭିମୁଖ୍ୟ ଗ୍ରହଣ କରି ମୁଖ୍ୟମନ୍ତ୍ରୀ ନୀତୀଶ କୁମାର ଆହୁରି ମଧ୍ୟ କହିଛନ୍ତି ଯେ, ସମଗ୍ର ବିଶ୍ୱରେ ମଦ୍ୟପାନର ପ୍ରଭାବ ବହୁତ ଖରାପ ରହିଛି । ରାଜ୍ୟରେ ମଦ ନିଷେଧ ହେତୁ ଲୋକମାନେ ବର୍ତ୍ତମାନ ପନିପରିବା କିଣୁଛନ୍ତି । ଏହାପୂର୍ବରୁ ରାଜ୍ୟରେ ପନିପରିବା ଉତ୍ପାଦନ ଅଧିକ ନଥିଲା। ଯିଏ ପୂର୍ବରୁ ମଦ୍ୟପାନ କରିବାରେ ଟଙ୍କା ଖର୍ଚ୍ଚ କରୁଥିଲେ ସେ ଆଉ ଅଯଥାରେ ଟଙ୍କା ଖର୍ଚ୍ଚ କରିବେ ନାହିଁ ଏବଂ ତାହା ହିଁ ଉପଯୋଗୀ ହେବ । ସେତେବେଳେ ଦେଖିବେ ସେମାନଙ୍କ ଘରେ କେତେ ଭଲ ଭଲ ରାନ୍ଧଣା ହେବ । ଆଉ ଏହାର ସତ ଘରର ମହିଳାମାନେ ହିଁ କହିବେ ।

शराब पीने वाले ⁦@NitishKumar⁩ के अनुसार हिंदुस्तानी नहीं और वो महापापी और महाअयोग्य और उनके लिए कोई सहानुभूति नहीं ⁦@ndtvindia⁩ ⁦@Anurag_Dwary⁩ pic.twitter.com/bfTB4YU28w

— manish (@manishndtv) March 31, 2022

ବୁଧବାର ଦିନ ମଦ ନିଷେଧାଦେଶ ଏବଂ ଉତ୍ପାଦ ଶୁଳ୍କ ସଂଶୋଧନ ବିଲ୍ ୨୦୨୨କୁ ଧ୍ୱନୀ ମତ ଦ୍ୱାରା ପାରିତ କରାଯାଇଛି । ଯାହା ଅଧୀନରେ ରାଜ୍ୟରେ ପ୍ରଥମ ଥର ପାଇଁ ମଦ ନିଷେଧାଦେଶ ଆଇନକୁ କଡାକଡି କରାଯାଇଛି । ସଂଶୋଧିତ ଆଇନ୍ ଅନୁଯାୟୀ, ପ୍ରଥମ ଥରରେ ଅପରାଧୀମାନେ ଜରିମାନା ଜମା କରିବା ପରେ ଡ୍ୟୁଟି ମାଜିଷ୍ଟ୍ରେଟଙ୍କଠାରୁ ଜାମିନ ପାଇବେ ଏବଂ ଯଦି ଅପରାଧୀ ଜରିମାନା ରାଶି ଜମା କରିବାକୁ ସକ୍ଷମ ନୁହଁନ୍ତି ତେବେ ସେମାନେ ମାସେ ପର୍ଯ୍ୟନ୍ତ ଜେଲ ଦଣ୍ଡ ଭୋଗିବେ । ଏହି ଆଇନ ଅନୁଯାୟୀ, ଯେଉଁମାନେ ମଦ ନିଷେଧାଦେଶ ଆଇନ ଉଲ୍ଲଂଘନ କରି ପୋଲିସ ଦ୍ୱାରା ଧରାପଡ଼ିବେ,ସେହି ଅଭିଯୁକ୍ତକୁ ମଦ ପ୍ରଦାନ କରୁଥିବା ବ୍ୟକ୍ତିଙ୍କ ନାମ କହିବାକୁ ପଡିବ ।

ନୀତିଶ କୁମାର ସରକାର, ବିହାରରେ ମଦ ନିଷେଧାଦେଶ ଏବଂ ଉତ୍ପାଦ ଅଧିନୀୟମ ଅନୁଯାୟୀ ଏପ୍ରିଲ ୨୦୧୬ରେ ରାଜ୍ୟରେ ମଦ ନିଷେଧାଦେଶ ଲାଗୁ କରିଥିଲେ । ଏହି ନିଷେଧାଦେଶ ପରଠାରୁ ବହୁ ସଂଖ୍ୟକ ଲୋକ କେବଳ ମଦ୍ୟପାନ କରି ଜେଲରେ ଅଛନ୍ତି । ତେବେ ଅଧିକାଂଶ ନିଷେଧାଦେଶ ଉଲ୍ଲଂଘନକାରୀ ଆର୍ଥିକ ଦୃଷ୍ଟିରୁ ଦୁର୍ବଳ ଏବଂ ଗରିବ ଶ୍ରେଣୀର ଲୋକ ହୋଇଥ୍ବା ଜଣାପଡ଼ିଛି । ଭାରତର ପ୍ରଧାନ ବିଚାରପତି ଏନଭି ରମଣ ଗତ ବର୍ଷ କହିଥିଲେ ଯେ ୨୦୧୬ ରେ ବିହାର ସରକାରଙ୍କ ନିଷେଧାଦେଶ ଭଳି ନିଷ୍ପତ୍ତି କୋର୍ଟ ଉପରେ ଏକ ବଡ଼ ବୋଝ ହୋଇଛି ।

ସେ କହିଥିଲେ ଯେ ତିନି ଲକ୍ଷ ମାମଲା କୋର୍ଟରେ ବିଚାରାଧୀନ ରହିଛି । ପ୍ରଧାନ ବିଚାରପତି କହିଥିଲେ ଯେ ଲୋକମାନେ ଦୀର୍ଘ ଦିନ ଧରି ନ୍ୟାୟକୁ ଅପେକ୍ଷା କରି ରହିଛନ୍ତି ଏବଂ ବର୍ତ୍ତମାନ ମଦ ନିଷେଧାଦେଶ ଉଲ୍ଲଂଘନ ସହ ଜଡିତ ଅତ୍ୟଧିକ ମାମଲା କୋର୍ଟ ଉପରେ ଅତିରିକ୍ତ ବୋଝ ପକାଉଛି ।