ବିହାର ବିଧାନସଭା ନିର୍ବାଚନ: ଜନମତ ସର୍ଭେରେ ଏନଡିଏକୁ ବହୁମତ
ନନ୍ଦିଘୋଷ ବ୍ୟୁରୋ: ସରିଲା ବିହାର ବିଧାନସଭା ପାଇଁ ମତଦାନ । ଆଜି ଦ୍ବିତୀୟ ପର୍ଯ୍ୟାୟରେ ୧୨୨ଟି ଆସନ ପାଇଁ ହୋଇଥିଲା ମତଦାନ । ଭୋଟିଂ ସରିବା ପରେ ଆସିଛି ଏକଜିଟ ପୋଲ । ବିଭିନ୍ନ ଜନମତ ସର୍ଭେ ପକ୍ଷରୁ ହୋଇଥିବା ଅନୁସନ୍ଧାନରୁ ଏନଡିଏ ବହୁମତ ପାଉଥିବା ଦର୍ଶାଯାଇଛି ।
ମାଟ୍ରିଜ ଆଇଏଏନସ୍ ସର୍ଭେ ରିପୋର୍ଟରେ ଏନଡିଏକୁ ମିଳିଛି ସର୍ବାଧିକ ଆସନ । ମୋଟ ୨୪୩ ଆସନରୁ ଏନଡିଏ ମେଣ୍ଟକୁ ୧୪୭ରୁ ୧୬୭ ଆସନ ମିଳିଛି । ମହାମେଣ୍ଟକୁ ୭୦ରୁ ୯୦ ଆସନ ଦିଆଯାଇଛି । ଅନ୍ୟାନ୍ୟକୁ ୨ରୁ ୬ଟି ଆସନ ମିଳିଛି । ସେହିପରି ଚାଣକ୍ୟ ଏକଜିଟ ପୋଲରେ ଏନଡିଏକୁ ବହୁମତ ମିଳିଛି । ଏନଡିଏ ମେଣ୍ଟକୁ ୧୩୦ରୁ ୧୩୮ ଆସନ ଦେଇଛି । ମହାଗଠବନ୍ଧନକୁ ୧୦୦ରୁ ୧୦୮ ଆସନ ମିଳିଛି । ଅନ୍ୟାନ୍ୟକୁ ୩ରୁ ୬ ଆସନ ମିଳିଛି । ସେହିପରି ପୋଲ ଡାଏରି ସର୍ଭେରେ ମଧ୍ୟ ଏନଡିଏକୁ ବହୁମତ ମିଳିଛି । ଏନଡିଏକୁ ୧୮୪ରୁ ୨୦୯ ଆସନ ମିଳିଛି । ମହାଗଠବନ୍ଧନକୁ ୩୨ରୁ ୪୯ ଆସନ ମିଳିଛି । ଅନ୍ୟାନ୍ୟକୁ ୧ରୁ ୫ ଆସନ ଦିଆଟାଇଛି ।
ପିପୁଲ୍ସ ପଲ୍ସ ସଂସ୍ଥା ପକ୍ଷରୁ କରଯାଇଥିବା ସର୍ଭେରେ ଏନଡିଏ ମେଣ୍ଟକୁ ୧୩୩ରୁ ୧୫୯ ଆସନ ମିଳିଛି । ମହାମେଣ୍ଟକୁ ୭୫ରୁ ୧୦୧ ଆସନ ଦେଇଛି । ଅନ୍ୟାନ୍ୟଙ୍କୁ ୨ରୁ ୮ ଆସନ ମିଳିଛି । ପିମାର୍କ ସର୍ଭେରେ ମଧ୍ୟ ଏନଡିଏକୁ ବହୁମତ ଦିଆଯାଇଛି । ଏନଡିଏକୁ ୧୪୨ରୁ ୧୬୨ ଆସନ, ମହାଗଠବନ୍ଧନକୁ ୮୦ରୁ ୯୮ ଓ ଅନ୍ୟାନ୍ୟକୁ ୦ରୁ ୩ ଆସନ ଦିଆଟାଇଛି ।
ସନ୍ଧ୍ୟା ୬ଟା ସୁଦ୍ଧା ବିହାରରେ ମୋଟ ୬୭.୧୪ ପ୍ରତିଶତ ମତଦାନ ହୋଇଛି । ଦ୍ଵିତୀୟ ପର୍ଯ୍ୟାୟରେ ମୋଟ ଭୋଟର ଥିଲେ ୩ କୋଟି ୭୦ ଲକ୍ଷ ଭୋଟର । ଇଭିଏମରେ ସିଲ୍ ହୋଇଛି ୧୩୦୨ ପ୍ରାର୍ଥୀଙ୍କ ଭାଗ୍ୟ । ଦ୍ଵିତୀୟ ପର୍ଯ୍ୟାୟରେ ବିହାରରେ ୧୨୨ ଆସନରେ ଅନୁଷ୍ଠିତ ହୋଇଛି ଭୋଟ ଗ୍ରହଣ । ୨୦ ଜିଲ୍ଲାର ୧୨୨ ଆସନରେ ରହିଛନ୍ତି ଅନେକ ହେଭିୱେଟ । ଗୟା ଟାଉନ, ସାସାରାମ ଓ ଚଇନପୁରରେ ସର୍ବାଧିକ ୨୨ ଲେଖାଏଁ ପ୍ରାର୍ଥୀ ଲଢୁଥିଲେ । ତ୍ରିବେଣୀଗଞ୍ଜ, ଲଉରିଆ ଓ ସୁଗାଉଲିରେ ସର୍ବନିମ୍ନ ୫ ଜଣ ଲେଖାଏଁ ପ୍ରାର୍ଥୀ ରହିଛନ୍ତି । ଗତ ୬ ତାରିଖରେ ପ୍ରଥମ ପର୍ଯ୍ୟାୟରେ ୧୨୧ ଆସନରେ ଭୋଟଗ୍ରହଣ ହୋଇଥିଲା । ଭୋଟ ପାଇଁ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଥିଲା । ଭାରତ-ନେପାଳ ସୀମାରେ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିଲା ।
