ନିର୍ବାଚନର କେଇ ଘଣ୍ଟା ପୂର୍ବରୁ ପୁଷ୍ପମ ପ୍ରିୟାଙ୍କ ନିକଟରେ ପହଞ୍ଚିଲା ପୋଲିସ୍, ଆଉ ତା’ ପରେ…

ପାଟନା: କରୋନା କାଳରେ ବିହାର ନିର୍ବାଚନ ହେବ କି ନାହିଁ, ସେ ନେଇ ସନ୍ଦେହ ରହିଥିଲା । ରାଜନୈତିକ ଦଳମାନେ କିପରି ରଣନୀତି ପ୍ରସ୍ତୁତ କରିବେ, ତାହା ମଧ୍ୟ ଜାଣି ପାରୁ ନ ଥିଲେ । ହେଲେ ଏହି ସମୟରେ ବିହାରରେ ଚର୍ଚ୍ଚିତ ଏକ ବିଜ୍ଞାପନ । ଯାହା ସବୁ ଖବର କାଗଜର ପ୍ରଥମ ପୃଷ୍ଠାରେ ଦିଆଯାଇଥିଲା । ଏଥିରେ ଦିଶୁ ଥିବା ଜଣେ କଳାରଙ୍ଗର ପୋଷାକ ପିନ୍ଧୁଥିବା ମହିଳା ନିଜକୁ ନୀତିଶଙ୍କ ବିକଳ୍ପ ବୋଲି ଘୋଷଣା କରିଥିଲେ । ନିଜକୁ ମୁଖ୍ୟମନ୍ତ୍ରୀ ପ୍ରାର୍ଥୀ ଭାବେ ଘୋଷଣା କରି ବିହାର ପଲିଟିକ୍ସକୁ ଲମ୍ଫ ମାରିଥିଲେ ।

ଦିନ ଗଡିବା ସହ ଗଣମାଧ୍ୟମରେ ପରିଚିତ ହେଲେ ମହିଳା ଜଣଙ୍କ । ଯାହାଙ୍କ ନାମ ପୁଷ୍ପମ ପ୍ରିୟା । ଦଳ ପ୍ଲୁରାଲ୍ସ ପାର୍ଟି । ଜାତି, ଧର୍ମ, ଅଞ୍ଚଳର ରାଜନୀତି ନୁହେଁ । ଅର୍ଥନୀତି ଏବଂ ବ୍ୟବସ୍ଥାଗତ ସଂସ୍ଥାର ରାଜନୀତି । ହେଲେ ବିହାରରେ କେତେ ଫଳପ୍ରଦ ହେବ ଏହି ରାଜନୀତି । ସେ ଯାହା ବି ହେଉ ୨୦୨୦ର ବିହାର ରାଜନୀତିରେ ଗ୍ଲାମର ଆଣିଛନ୍ତି ପୁଷ୍ପମ ।

ପ୍ରଥମ ପର୍ଯ୍ୟାୟ ନିର୍ବାଚନକୁ କେଇ ଘଣ୍ଟା ବାକି ରହିଛି । ହେଲେ ତାହା ପୂର୍ବରୁ ପାଟନା ପୋଲିସ ହଠାତ ପହଞ୍ଚିଥିଲା ପୁଷ୍ପମଙ୍କ ନିକଟରେ । ଆଉ କରିଥିଲା ତାଙ୍କୁ ଗିରଫ । ପୁଷ୍ପମ ବିହାରରେ ନିର୍ବାଚନ ପ୍ରକ୍ରିୟାକୁ ନେଇ ଅସନ୍ତୁଷ୍ଟ ଥିଲେ । ଅବାଧ ନିର୍ବାଚନ ପରିଚାଳନା ପାଇଁ ରାଜ୍ୟରେ ତୁରନ୍ତ ରାଷ୍ଟ୍ରପତି ଶାସନ ଲାଗୁ ପାଇଁ ଦାବି କରିଥିଲେ । ଆଉ ଏହି ଦାବିକୁ ଜଣାଇବା ପାଇଁ ରାଜଭବନ ଅଭିମୁଖେ ବାହାରିଥିଲେ । ଏହି ସମୟରେ ତାଙ୍କୁ ଗିରଫ କରାଯାଇଥିଲା ।