ଆଫଗାନିସ୍ତାନରୁ ସୈନ୍ୟ ପ୍ରତ୍ୟାବର୍ତ୍ତନ ପରେ ଜୋ ବାଇଡେନଙ୍କ ସମ୍ବୋଧନ, ‘ଆମେରିକାକୁ କ୍ଷତି ପହଞ୍ଚାଇଲେ ଛାଡ଼ିବୁନି’
ୱାଶିଂଟନ୍: ୨ ଦଶନ୍ଧି ପରେ ଆଫଗାନିସ୍ତାନରୁ ଫେରିଛି ଆମେରିକା ସେନା । ସୈନ୍ୟ ଫେରିବା ପରେ ରାଷ୍ଟ୍ରପତି ଜୋ ବାଇଡେନ୍ କହିଛନ୍ତି, ଯିଏ ଆମେରିକାକୁ କ୍ଷତି ପହଞ୍ଚାଇବାକୁ ଚାହିଁବ ତା’କୁ ତା’ର ମୂଲ୍ୟ ଦେବାକୁ ପଡ଼ିବ । ସୈନ୍ୟ ପ୍ରତ୍ୟାହାର ନିଷ୍ପତ୍ତି ସମ୍ପୂର୍ଣ୍ଣ ଠିକ୍ ବୋଲି କହିବା ସହ ଯବାନଙ୍କ ସାହସିକତାକୁ ପ୍ରଶଂସା କରିଛନ୍ତି ।
ଆମେରିକା ଅବା ତା’ର ସହଯୋଗୀଙ୍କୁ ଆତଙ୍କବାଦ କାର୍ଯ୍ୟରେ ଲିପ୍ତ ହୋଇ କ୍ଷତି ପହଞ୍ଚାଇବାକୁ ଚାହୁଁଥିବା ରାଷ୍ଟ୍ରକୁ ବାଇଡେନ୍ ଚେତାବନୀ ଦେଇଛନ୍ତି । କହିଛନ୍ତି, ଆମେରିକା କେବେ ଆରମ କରିବ ନାହିଁ । ଆମେ କ୍ଷମା କରିବୁ ନାହିଁ, ଭୁଲିବୁ ନାହିଁ । ଆମେ ଶିକାର କରିବୁ ଏବଂ ତା’ର ମୂଲ୍ୟ ଦେବାକୁ ପଡ଼ିବ ।
ଆଫାଗାନିସ୍ତାନରୁ ଉଦ୍ଧାର ପ୍ରକ୍ରିୟା ସଫଳ ହୋଇଥିବା କହିଛନ୍ତି ଆମେରିକା ରାଷ୍ଟ୍ରପତି । ଏହା ଆମେରିକା ସେନାର ସାହାସ ଓ ସାମର୍ଥ୍ୟ ଯୋଗୁଁ ସମ୍ଭବ ହୋଇଛି । ସେନାର ଯବାନ ଯୁଦ୍ଧ ମିଶନରେ ନୁହେଁ ବରଂ ଦୟା ମିଶନରେ ସାମିଲ୍ ଥିଲେ । ଯବାନ ଅନ୍ୟମାନଙ୍କ ସେବାରେ ନିଜ ଜୀବନକୁ ବିପଦରେ ପକାଇଛନ୍ତି । ଇତିହାସରେ କୌଣସି ଦେଶ କେବେ ଏଭଳି କରିନି, ଯାହା କେବଳ ଆମେରିକା କରି ଦେଖାଇଛି ।
ଆଫଗାନିସ୍ତାନରୁ ସେନା ପ୍ରତ୍ୟାହାର ସମସ୍ତଙ୍କୁ ସୁପାରିସରେ କରାଯାଇଛି । କିଛି ଲୋକ କହୁଛନ୍ତି, ଆମକୁ ଏହା ଶୀଘ୍ର କରିବାର ଥିଲା । ଏଥିରେ ମୁଁ ଅସହମତ ବୋଲି କହିଛନ୍ତି ବାଇଡେନ୍ । ଯଦି ଏହା ପୂର୍ବରୁ ହୋଇଥାନ୍ତା ତରବରିଆ ଭାବେ ଗୃହଯୁଦ୍ଧର ରୂପ ନେଇଥାନ୍ତା । ମାଟିରେ ଅନୁପସ୍ଥିତ ରହି ମଧ୍ୟ ଆଫଗାନିସ୍ତାନ ଓ ଅନ୍ୟ ଦେଶରେ ଆତଙ୍କବାଦ ବିରୋଧରେ ଆମେରିକା ଲଢ଼େଇ ଜାରି ରଖିବ ।
