ପକ୍ଷୀ ପ୍ରେମରେ ଦମ୍ପତ୍ତି, ଘରେ ରଖିଛନ୍ତି ୪୦ରୁ ଉର୍ଦ୍ଧ୍ବ ପ୍ରଜାତିର ପକ୍ଷୀ

ଭୁବନେଶ୍ୱର: ପକ୍ଷୀ ପ୍ରେମରେ ପତି-ପତ୍ନୀ। ବିଲୁପ୍ତ ପ୍ରାୟ ପକ୍ଷୀମାନଙ୍କ ବ୍ରିଡ କରି ଗବେଷଣା। ଫାର୍ମରେ ୨୦ରୁ ଉର୍ଦ୍ଧ୍ବ ଦେଶର ୪୦ ରୁ ଉର୍ଦ୍ଧ୍ବ ପ୍ରଜାତିର ପକ୍ଷୀ ପାଳନ କରିଛନ୍ତି। ପକ୍ଷୀଙ୍କ କିଚିରି ମିଚିର ଶଦ୍ଦରେ କୋଳାହଳମୟ ପରିବେଶ। ରଙ୍ଗ ବେରଙ୍ଗର ବିଦେଶୀ ଦାମୀ ପକ୍ଷୀ। ଏହା କୌଣସି ଚିଡିଖାନାର ଦୃଶ୍ୟ ନୁହଁ । ଇଏ ହେଉଛି ଭୁବନେଶ୍ବର ରସୁଲଗଡ଼ କେନାଲ ରୋଡ଼ରେ ଥିବା ଶ୍ୟାମସୁନ୍ଦର ମିଶ୍ରଙ୍କ ଫାର୍ମ ହାଉସ୍ ।

ଉଚ୍ଚଶିକ୍ଷିତ ଶ୍ୟାମସୁନ୍ଦର ବାପାଙ୍କ ଅମଳରୁ ପକ୍ଷୀ ପ୍ରେମରେ ପଡିଯାଇଛନ୍ତି । ଘରେ ୪୫ ପ୍ରକାର ପ୍ରଜାତିର ପକ୍ଷୀ ରଖିଛନ୍ତି । ଆଫ୍ରିକାର ସବୁଠାରୁ ଛୋଟ ମାକଓ୍ବା ସହ ରେଡ୍ ମାକ୍ସ କର୍ଣ୍ଣୁର, ଅଲିଭ ଅର୍ଣ୍ଣେଟ ଲରି, ଜାଡାଇନ ପ୍ୟାରେଟ, ପାଏଡ ସ୍ବାଇଁସନ ଲରୀ, ଚାର୍ଟରିଙ୍ଗ ଲରୀ, ବ୍ଳାକକ୍ୟାପ ଲରୀ, ଭାଏଲଟ ଲରୀ, କ୍ୟାଡିନେଟ, ଡୁଭେନ ବଡ ଲରୀ, ୟୋଲ ବି ଲରୀ, ହାଁନସ ମାକାୱା, ଏଲିକର୍ଟସ ପ୍ୟାରେଟ, କ୍ରିମସନ ଭେଲିଡ କର୍ଣ୍ଣୁର ଭଳି ବିଦେଶୀ ପକ୍ଷୀ ରଖିଛନ୍ତି । ୪୦ ହଜାର ଟଙ୍କାରୁ ୨୦ ଲକ୍ଷ ଟଙ୍କା ପର୍ଯ୍ୟନ୍ତ ପକ୍ଷୀ ରଖିଥିବା ବେଳେ କାଟେଲିନା ମାକାଓ୍ବା ଓ ସ୍କାରେଲଟ ମାକଓ୍ବା ମୂଲ୍ୟ ୨୦ ଲକ୍ଷ ଟଙ୍କା।

ବିଦେଶୀ ପକ୍ଷୀଙ୍କ ବ୍ରିଡ୍ କରାଇବା ସହ ସେମାନଙ୍କୁ ନିଜପିଲା ଭଳି ପାଳନ କରୁଛନ୍ତି ଶ୍ୟାମସୁନ୍ଦର। ବ୍ରିଡ ଓ ସ୍ବାସ୍ଥ୍ୟଗତ ସମସ୍ୟାର ଚିକିତ୍ସା ପାଇଁ ସାମଗ୍ରୀ ମଧ୍ୟ ରଖିଛନ୍ତି। ବର୍ତ୍ତମାନ ତାଙ୍କ ପାଖରେ ଏକକାଳୀନ ୪୦ରୁ ଉର୍ଦ୍ଧ ପ୍ରଜାତିର ପ୍ରାୟ ୧ ହଜାରରୁ ଅଧିକ ବିଦେଶୀ ପକ୍ଷୀ ଅଛନ୍ତି। ସେମାନଙ୍କୁ ବିଭିନ୍ନ ପ୍ରକାରର ପରିବା, ମଞ୍ଜି ସହ ମାଣ୍ଡିଆ, ଫ୍ଲାକ୍‌ସିଡସ୍, ଓଟ୍‌ସ, ପକ୍‌କ୍ସିଟ୍ ଆଦି ଖାଇବାକୁ ଦିଅନ୍ତି।