ଅନୁଦାନ ଦାବିରେ ରାସ୍ତାକୁ ଓହ୍ଲାଇଲେ ବିଭିନ୍ନ ଅନୁଦାନପ୍ରାପ୍ତ କଲେଜରେ ନିଯୁକ୍ତ ଶିକ୍ଷକ ଓ ଅଣଶିକ୍ଷକ

ଭୁବନେଶ୍ବର : ହକ ପାଇଁ ରାସ୍ତାରେ ଶିକ୍ଷକ । ଜୁନ ୨୦୦୮ରୁ ଡିସେମ୍ବର ୨୦୧୩ ମଧ୍ୟରେ ବିଭିନ୍ନ ଅନୁଦାନପ୍ରାପ୍ତ କଲେଜରେ ନିଯୁକ୍ତ ଶିକ୍ଷକ ଓ ଅଣଶିକ୍ଷକମାନେ ଅନୁଦାନ ଦାବିରେ ରାସ୍ତାକୁ ଓହ୍ଲାଇଛନ୍ତି । ୨୦୨୪ ନଭେମ୍ବରରେ ଏମାନେ ଆନ୍ଦୋଳନ କଲାବେଳେ ଉଚ୍ଚଶିକ୍ଷା ମନ୍ତ୍ରୀ ସରକାରୀ ଅନୁଦାନ ଦେବାକୁ ପ୍ରତିଶ୍ରୁତି ଦେଇଥିଲେ। ହେଲେ ମନ୍ତ୍ରୀଙ୍କ ପ୍ରତିଶୃତି ପାଣିର ଗାର ହୋଇଯିବାରୁ ପୁଣି ଥରେ ଏହି ବର୍ଗରେ ଥିବା ଅଧ୍ୟାପକ ଓ ଅଣଶିକ୍ଷକମାନେ ରାସ୍ତାକୁ ଓହ୍ଲାଇଛନ୍ତି। ଶହେ ଦିନରେ ସବୁ ସମସ୍ୟାର ସମାଧାନ କହି ସରକାରକୁ ଦୁଇଶହ ଦିନ ପୂରିଥିବା ବେଳେ ଆମ କଥା ବୁଝିବାକୁ ସମୟ ନାହିଁ। ବିକଶିତ ଓଡ଼ିଶାର ସ୍ଲୋଗାନ ଦେଉଥିବା ସରକାର ଆମ କଥା ବୁଝନ୍ତୁ । ଆମେମାନେ ଛାତ୍ରଛାତ୍ରୀଙ୍କ ଭବିଷ୍ୟତ ଗଢୁଥିବା ବେଳେ ଆମ ଛୁଆପିଲାଙ୍କ କଥା କିଏ ବୁଝିବ ବୋଲି ପ୍ରଶ୍ନ କରିଛନ୍ତି । ମୁଖ୍ୟମନ୍ତ୍ରୀ ଜଣେ ଶିକ୍ଷକ ହୋଇଥିଲେ ବି ଆମମାନଙ୍କ ଆର୍ଥିକ ଦୂରବସ୍ଥା କଥା କିପରି ବୁଝୁନାହାନ୍ତି ବୋଲି ଅଧ୍ୟାପକ ମାନେ ପ୍ରଶ୍ନ କରିଛନ୍ତି । ଦୁଇ ତିନି ହଜାର ଟଙ୍କାରେ ପରିବାର କେମିତି ଚାଲୁଛି ସରକାର ଜାଣିବା ଦରକାର। ସରକାର ତୁରନ୍ତ ସରକାରୀ ଅନୁଦାନ ନ ଦେଲେ ଆଗକୁ ଆତ୍ମାହୁତି ଦେବାକୁ ବାଧ୍ୟ ହେବୁ ବୋଲି ଚେତାବନୀ ଦେଇଛି ସଙ୍ଘ।