ପାର୍କ ନୁହେଁ ପୋଲିସ ଷ୍ଟେସନ୍ ! ଦେଖିଲେ ବିଶ୍ୱାସ ହେଉନି…
1 min read
ଭୁବନେଶ୍ୱର: କମିଶନରେଟ ପୋଲିସର କ୍ଳିନ କ୍ୟାମ୍ପସ ଅଭିଯାନ । ବଦଳିଲା ଥାନା ପରିବେଶ । ଭୁବନେଶ୍ୱରରେ ବଭିନ୍ନ ଥାନାରେ ପାର୍କର ଭ୍ରମ । ଫୁଲର ଗାଲିଚା ସାଙ୍ଗକୁ କୃତ୍ରିମ ଝରଣା । ସାଧାରଣରେ ଥାନା ନାଁ ଶୁଣିଲେ ଲୋକ ମାନେ ଭୟଭୀତ ହୋଇଥାନ୍ତି । ଲୋକଙ୍କ ମନରେ ପୋଲିସ ପ୍ରତି ଥିବା ଧାରଣା ଓ ଭୟକୁ ଦୂର କରିବା ମୁଖ୍ୟ ଲକ୍ଷ୍ୟ । ମୋ ସରକାର ଆସିଲା ପରେ ପ୍ରତି ଥାନାର ଚିତ୍ର ସହ ଲୋକଙ୍କ ମନର ଧାରଣା ବଦଳିବାରେ ଲାଗିଛି । ପୋଲିସ ଲୋକଙ୍କୁ ଦୁର୍ବ୍ୟବହାର ନୁହେଁ, ପୋଲିସ ବନ୍ଧୁ ଭଳି କାର୍ଯ୍ୟ କରୁଛି ।
ପୋଲିସ୍ ଥାନାରେ ଏବେ ଚୋରା ବାଇକ ଗଦା ନୁହେଁ, ଫୁଲର ବଗିଚା ଦେଖିବାକୁ ମିଳୁଛି । ଥାନା କାନ୍ଥରେ ଝଲସୁଛି ଐତିହ୍ୟ ଓ ସଂସ୍କୃତିର ଚିତ୍ର । ପାହଡ଼ ଉପରୁ ଝରି ଆସୁଛି ପାଣି । କୁଳୁ କୁଳୁ ଝରଣାର ଶବ୍ଦ ସାଙ୍ଗକୁ ବୁଦ୍ଧଙ୍କ ଶାନ୍ତି ସ୍ତୁପ । ଯାହା କି କୌଣସି ପାର୍କ କି ପର୍ଯ୍ୟଟନ ସ୍ଥଳିର ଠାରୁ କମ୍ ନୁହେଁ ।
ଭୁବନେଶ୍ୱର କମିଶନରେଟ ପୋଲିସର ସର୍ବ ପୁରାତନ ଚନ୍ଦକା ଥାନା । ଖାକି ହାତରେ ବନ୍ଧୁକ କି ରୋଲ ବାଡି ନୁହେଁ । ସାଧରଣ ମଣିଷ ପରି ଥାନା ବାବୁ ଫୁଲ ଗଛରେ ପାଣି ଦେବା ସହ ଘାସ ଉପାଡୁଛନ୍ତି । ଥାନା କ୍ୟାମ୍ପସ ଭିତରେ ଘାସର ଗାଲିଚା ସାଙ୍ଗକୁ ରଙ୍ଗ ବେରଙ୍ଗର ଫୁଲର ସମ୍ଭାର । ପିପୁଲ-ଫ୍ରେଣ୍ଡଲି ପୋଲିସ ସେବା ଦେବାକୁ ଏହେଉଛି ଥାନର ପ୍ରୟାସ ।
କେବଳ ଚନ୍ଦକା ନୁହେଁ ଭୁବନେଶ୍ୱର ୟୁପିଡିର ବିଭିନ୍ନ ଥାନାରେ ଏଭଳି କ୍ଳିନ କ୍ୟାମ୍ପସ ଦେଖିବାକୁ ମିଳିଛି । ସେହିଭଳି ଏୟାରଫିଲ୍ଡ ଥାନା କାନ୍ଥ କହୁଛି ଓଡିଶାର କଳା ସଂସ୍କୃତିର କାହାଣୀ । କ୍ୟାମ୍ପସ ଭିତରେ ମନ୍ଦିର ସାଙ୍ଗକୁ ମନୋରମ ବଗିଚା ମନ ମୋହୁଛି । ଷ୍ଟାଫ୍ ଫିଟ୍ ରହିବା ପାଇଁ ଥାନା ଭିତରେ ରହିଛି ଜିମ୍ । ରାଜ୍ୟ ତଥା ରାଜ୍ୟ ବାହରର ରଙ୍ଗବେରଙ୍ଗର ଫୁଲ ଲାଗିଛି । ସେହିଭଳି ଧଉଳି ଥାନା କାନ୍ଥରେ ଦେଖିବାକୁ ମିଳିଛି ଓଡିଶାର ପଟ୍ଟଚିତ୍ର, ଐତିହ୍ୟ କଳାକୃତି, ଝୋଟି ସାଙ୍ଗକୁ ମନ୍ଦିରର ଚିତ୍ର । କ୍ୟାପିଟାଲ ଥାନାର ପରିସରରେ ମଧ୍ୟ ସୃଷ୍ଟି କରାଯାଇଛି ମନୋରମ ପରିବେଶ ।
