ପେଟ୍ରୋଲ ପମ୍ପ ବିସ୍ଫୋରଣ ମାମଲା: ଘଟଣାସ୍ଥଳରେ କେନ୍ଦ୍ର ପେଟ୍ରୋଲ ମନ୍ତ୍ରାଳୟର ୪ ଜଣିଆ ସ୍ୱତନ୍ତ୍ର ଟିମ୍
ଭୁବନେଶ୍ୱର: ଭୁବନେଶ୍ୱର ରାଜଭବନ ପେଟ୍ରୋଲ ପମ୍ପ ବିସ୍ପୋରଣ ଘଟଣା । ପେଟ୍ରୋଲ ପମ୍ପରେ କେନ୍ଦ୍ର ପେଟ୍ରୋଲ ମନ୍ତ୍ରାଳୟର ୪ ଜଣିଆ ସ୍ୱତନ୍ତ୍ର ଟିମ୍ ତଦନ୍ତ କରୁଛି । ଏପଟେ ସ୍ୱତନ୍ତ୍ର ଟିମ୍ ପକ୍ଷରୁ ବିସ୍ପୋରଣର କାରଣ ଖୋଜା ଚାଲିଥିବା ବେଳେ କ୍ୟାପିଟାଲ ଥାନା ପୋଲିସ ବି ତଦନ୍ତ ଜାରି ରଖିଛି । ଭୂତଳ ଗ୍ୟାସ ଚାମ୍ବର ବିସ୍ପୋରଣ ହେବା ଅତି ଆଶ୍ଚର୍ଯ୍ୟଜନକ ବୋଲି ମତ ରଖିଛନ୍ତି ତଦନ୍ତକାରୀ ଟିମ୍ ।
ସୂଚନାଯୋଗ୍ୟ, ଅକ୍ଟୋବର ୭ ତାରିଖରେ ଭୁବନେଶ୍ୱର ରାଜଭବନ ପାଖ ପେଟ୍ରୋଲ ପମ୍ପରେ ବିସ୍ପୋରଣ ଘଟିଥିଲା । ଏହି ଘଟଣାରେ ଜଣକର ମୃତ୍ୟୁ ହୋଇଥିବା ବେଳେ ପ୍ରାୟ ୧୦ ଜଣ ଗୁରୁତର ହୋଇଥିଲେ । ବିସ୍ଫୋରଣର ମାତ୍ରା ଏତେ ଅଧିକ ଥିଲା ଯେ, ରାଜଭବନର କାଚ ଭାଙ୍ଗିବା ସହ ଆଖପାଖ ଅଞ୍ଚଳରେ ଲୋକଙ୍କ ଘର ଏବଂ ବସ୍ତିରେ ମଧ୍ୟ ପ୍ରଭାବ ଦେଖାଯାଇଥିଲା ।
ବିସ୍ଫୋରଣର ଖବରପାଇ ଘଟଣାସ୍ଥଳରେ ସାଇଣ୍ଟିଫିକ୍ ଟିମ୍, ପୋଲିସ ଫୋର୍ସ, ବଡ଼ ବଡ଼ ପୋଲିସ ଅଧିକାରୀ ଏମିତିକି ଆଇଓସିଏଲ୍ର ସ୍ୱତନ୍ତ୍ର ଟେକ୍ନିକାଲ ଟିମ୍ ପହଞ୍ଚିଥିଲେ । ସ୍ଥାନୀୟ ଲୋକଙ୍କ ସୂଚନା ଅନୁଯାୟୀ, ପ୍ରଥମେ ଗ୍ୟାସ୍ ଲିକ୍ ହୋଇ ସେଥିରେ ଅଗ୍ନିକାଣ୍ଡ ଘଟିଥିଲା ପରେ ଏହା ବିସ୍ଫୋରଣ ରୂପ ନେଇଥିଲା ।
