ଭୁବନେଶ୍ବର: ଭୁବନେଶ୍ବର ଆଇଗିଣିଆ ୧୬ ନମ୍ବର ଜାତୀୟ ରାଜପଥରେ ଓଭର ବ୍ରିଜ୍ ଦବିବା ଘଟଣାରେ NHAI କୁ ଦାୟୀ କରାଯାଇଛି। ଏଥିରେ ନିମ୍ନମାନର କାମ ହୋଇଥିବା ଅଭିଯୋଗ ହୋଇଛି। ଆଜି ବିଏମସି ମେୟର ସୁଲୋଚନା ଦାସ ଘଟଣାସ୍ଥଳ ପରିଦର୍ଶନ କରି କହିଛନ୍ତି, ବ୍ରିଜ ନିର୍ମାଣର ମାତ୍ର ୬ ମାସରେ ଦବିବା ଆଶ୍ଚର୍ଯ୍ଯର କଥା। ବ୍ୟସ୍ତ ବହୁଳ ରାସ୍ତାର ଏଭଳି ଅବସ୍ଥା ମୃତ୍ୟୁକୁ ନିମନ୍ତ୍ରଣ କରୁଛି। ଟେକ୍ନିକାଲ ଟିମ୍ ଏହି ଓଭର ବ୍ରିଜ ସହିତ ସମସ୍ତ ନିର୍ମାଣଧୀନ ବ୍ରିଜ ଯାଞ୍ଚ କରନ୍ତୁ ବୋଲି ଦାବି କରିଛନ୍ତି ସୁଲୋଚନା ଦାସ। ରାସ୍ତା ଦବିବାର କାରଣ ଜାଣିବା ନିହାତି ଦରକାର। ନଚେତ୍ ବିହାର ଭଲି ଅବସ୍ଥା ଓଡ଼ିଶାରେ ମଧ୍ୟ ହେବ ବୋଲି ସେ ଆଶଙ୍କା କରିଛନ୍ତି।
ସେପଟେ NHAI ର ଆଞ୍ଚଳିକ ଅଧିକାରୀ ବୀରେନ୍ଦ୍ର ସିଂହ କହିଛନ୍ତି, ଓଭରବ୍ରିଜ ଜଳବନ୍ଦୀ ହେବା ଦ୍ବାରା ସିପେଜ୍ ହୋଇ ରାସ୍ତା ଦବିଛି। ଯାଞ୍ଚ କରିବାର ଦାୟିତ୍ଵ ପ୍ରକଳ୍ପ ନିର୍ଦ୍ଦେଶକଙ୍କୁ ଦିଆଯାଇଛି। କେବଳ ଆଇଗିଣିଆ ନୁହେଁ, ଅନ୍ଯ ବ୍ରିଜରେ ମଧ୍ଯ ଜଳବନ୍ଦୀ ସମୟରେ ଯାଞ୍ଚ କରି ତଦାରଖ ଓ ମରାମତି କରିବାକୁ କୁହାଯାଇଛି। ଯଦି ନିମ୍ନର କାମ ହୋଇଥିବା ଜଣା ପଡ଼େ, ତେବେ କାର୍ଯ୍ଯାନୁଷ୍ଠାନ ହେବ।
