ଭୁବନେଶ୍ୱର : ନିଶା ପାଇଁ ବୁଲୁଛି ହତିଆର, ଚାଲୁଛି ଭୁଜାଲି । ମହିଳାଙ୍କୁ ଢାଲ କରି ଚାଲୁଛି ନିଶା ସିଣ୍ଡିକେଟ । ବସ୍ତିରେ ବେଧଡକ ଅପରାଧ, ବେଫିକର ଅପରାଧୀ । ନାଁ କୁ ମାତ୍ର ବସ୍ତିକୁ ଚାଲ ଅଭିଯାନ । ବବଲୁ ଥିଲେ ଘରର ରୋଜଗାରିଆ ପୁଅ। ମା’, ସ୍ତ୍ରୀଙ୍କ ସହ ଦୁଇ ଛୁଆଙ୍କ ବୋଝ ତାଙ୍କ ମୁଣ୍ଡରେ ଥିଲା । ହେଲେ ପୂର୍ଵ ଶତ୍ରୁତା, ପରକିୟା ଓ ନିଶା କାରବାର ପାଇଁ ଜିତେନ୍ଦ୍ର ଦାସ ଓରଫ ବବ୍ଲୁଙ୍କ ହୋଇଥିଲା ହତ୍ୟା । ଯାହାକୁ ନେଇ ସ୍ଥାନୀୟ ଲୋକେ ରାସ୍ତାରୋକ କରିବା ସହ ଅପରାଧୀଙ୍କ ଘର ମଧ୍ୟ ଭାଙ୍ଗିଥିଲେ । ହତ୍ୟାକାରୀଙ୍କୁ ମଧ୍ୟ ତୁରନ୍ତ ଧରିବାରେ ସଫଳ ହୋଇଥିଲା ନୟାପଲ୍ଲୀ ପୋଲିସ । କିନ୍ତୁ ଘଟଣାକୁ ଦେଢ଼ମାସ ବିତିନଥିବା ବେଳେ ଏବେ ପୁଣି ଅପରାଧୀ ହାତରେ ଖଣ୍ଡା ଧରି ଆତଙ୍କ ଖେଳାଇଛନ୍ତି । ଆଉ ଗୋଟେ ମର୍ଡର କରିବେ ବୋଲି ଧମକ ଦେଉଛନ୍ତି । ନିଶା ସିଣ୍ଡିକେଟକୁ ବେଧଡକ ଚଳାଇଛନ୍ତି । ଏଭଳି ସ୍ଥିତିରେ ନିଜ ଜୀବନ ପ୍ରତି ବିପଦ ଥିବା କହି ପୋଲିସ ସେବା ଭବନରେ କମିଶନରଙ୍କ ଦ୍ୱାରସ୍ଥ ହୋଇଛନ୍ତି ୟୁନିଟ ୮ ଅଞ୍ଚଳର ବସ୍ତି ବାସିନ୍ଦା ।
ବସ୍ତିରେ ଅପରାଧ ରୋକିବା ସହ ବସ୍ତି ବାସିନ୍ଦାଙ୍କ ମଧ୍ୟରେ ସମନ୍ୱୟ ରଖିବା ପାଇଁ କମିଶରେଟ ପୋଲିସ ଚଳାଇଛି ବସ୍ତିକୁ ଚାଲ ଅଭିଯାନ । କିନ୍ତୁ ଅଧିକାଂଶ ସମୟରେ ବସ୍ତିରେ ହିଁ ଦେଖିବାକୁ ମିଳୁଛି ସଙ୍ଗୀନ ଅପରାଧ । ଆଉ ଏସବୁକୁ ଖୋରାକ ଯୋଗାଉଛି ନିଶା କାରବାର। ମଙ୍ଗଳବାର ଠିକ ସମାନ ଢଙ୍ଗରେ ରାଜଧାନୀର ଛାତି ଉପରେ ହେରୋଇନ କାରବାର କରୁଥିବା ବେଳେ ଗିରଫ ହୋଇଥିଲା ଲେଡି ଡନ୍ ପାନ୍ନା । ମଇଁଶିଖାଲ ବସ୍ତିରେ ଚଢ଼ାଉ ବେଳେ ଅନ୍ନପୂର୍ଣ୍ଣା ବେହେରା ଓରଫ ପାନ୍ନା ଠାରୁ ମିଳିଥିଲା ୪୦ ଲକ୍ଷ ଟଙ୍କାର ଦାମୀ ନିଶା । ମହିଳାଙ୍କୁ ଢାଲ କରି ଲେଡି ଡନ ଚଳାଇଥିଲା ନିଶା ସିଣ୍ଡିକେଟ । ଶୁଣନ୍ତୁ ଏ ସମ୍ପର୍କରେ କଣ କହୁଛନ୍ତି ଅବକାରୀ ସୁପରିନଟେଣ୍ଡେଣ୍ଟ । ବସ୍ତିର ଅଧିକାଂଶ ଅପରାଧ ପଛରେ ରହୁଛି ନିଶା କାରବାର ଲିଙ୍କ । କେତେବେଳେ ନିଶାଶକ୍ତ ଅବସ୍ଥାରେ ରକ୍ତ ବୋହୁଛି ତ ଆଉ କେତବେଳେ ନିଶା ବେପାର ପାଇଁ ମୁଣ୍ଡ ଗଡୁଛି । ଏସବୁକୁ ରୋକିଲେ ହୁଏତ ବସ୍ତି ଅପରାଧରେ ଲାଗିପାରିବ ଲଗାମ ।
