ଆଜି ବି ଠକି ଦେଲେ ମାଡାମ ପଣ୍ଡା, ନିଜେ ହାଜର ନହୋଇ ପ୍ରତିନିଧି ଓ ଓକିଲଙ୍କୁ ପଠାଇଲେ
ଭୁବନେଶ୍ୱର: ରାଜଧାନୀ ଇନ୍ଫୋସିଟି ନାବାଳିକା ଗଣ ଦୁଷ୍କର୍ମ ଘଟଣା । ତଦନ୍ତକୁ ବାଧିତ କରିବାର ସବୁ ଉଦ୍ୟମ ଜାରି ରଖିଛନ୍ତି ଓଟିଭି କର୍ତ୍ତୁପକ୍ଷ । କମିଶନଙ୍କ ପାଖରେ ବ୍ୟକ୍ତିଗତ ଭାବେ ହାଜର ହେବାକୁ ଡରୁଛନ୍ତି ଓଟିଭି ଏମଡି ଜଗି ମଙ୍ଗତ ପଣ୍ଡା । ଯାହାର ଉଦାହରଣ ଆଜି ମଧ୍ୟ ଦେଖିବାକୁ ମିଳିଛି । ଆଜି ରାଜ୍ୟ ଶିଶୁ ଅଧିକାର ସୁରକ୍ଷା ଆୟୋଗଙ୍କ ସମ୍ମୁଖରେ ଜଗିଙ୍କ ହାଜର ହେବାର ଥିଲା । କିନ୍ତୁ ମ୍ୟାଡମ୍ ନିଜେ ଆସିନଥିଲେ । ନିଜ ଓକିଲ ଓ ପ୍ରତିନିଧିଙ୍କୁ ଆୟୋଗଙ୍କ ଆଗରେ ହାଜିର ପକାଇବାକୁ ପଠାଇଥିଲେ । ବାରମ୍ବାର ହାଜିରା ପାଇଁ ନୋଟିସ ଯାଇଥିଲେ ମଧ୍ୟ ତିଳେମାତ୍ର ଖାତିର କରୁନାହାନ୍ତି । ଅହଂକାର ଏବଂ ନିଜ ଯିଦରୁ ଓହରୁନାହାନ୍ତି ଏମ୍ଡି ମାଡାମ ।
ପ୍ରତିନିଧି ଏବଂ ଓକିଲଙ୍କୁ ପଠାଇ ବାରମ୍ବାର କେସ ଦବାଇବାକୁ ଚେଷ୍ଟା କରିଚାଲିଛନ୍ତି । ତେବେ ଗତ ୧୦ ତାରିଖରେ ହାଜର ହେବାକୁ ନୋଟିସ ହୋଇଥିଲେ ମଧ୍ୟ ଆଜି ଓଟିଭି ଏମ୍ଡିଙ୍କ ପ୍ରତିନିଧି ଓ ଓକିଲଙ୍କୁ ପଠାଇ କାମ ସାରିଦେଇଛନ୍ତି । ରାଜ୍ୟ ଶିଶୁ ଅଧିକାର ସୁରକ୍ଷା ଆୟୋଗ ଜଗିଙ୍କୁ ବ୍ୟକ୍ତିଗତ ଭାବରେ ହାଜିର ହୋଇ ଉତ୍ତର ରଖିବା ପାଇଁ କହିଥିଲେ । କିନ୍ତୁ ସେ ଏଥର ମଧ୍ୟ ବେଖାତିର କରି ଆସିନାହାନ୍ତି । ରାଜ୍ୟ ଶିଶୁ ଅଧିକାର ସୁରକ୍ଷା ଆୟୋଗଙ୍କ ପାଖରେ ହାଜିର ହୋଇଛନ୍ତି ଓଟିଭି ଏମ୍ଡିଙ୍କ ପ୍ରତିନିଧି ଓ ଓକିଲ । ଅଭିଯୋଗ କାରିଣୀଙ୍କ ମା’ ବି ହାଜର ହୋଇଛନ୍ତି ।
