ଜବରଦଖଲକାରୀଙ୍କ କବଜାରେ ଭୁବନେଶ୍ୱର, ସଙ୍କୁଚିତ ହେବାରେ ଲାଗିଛି ରାସ୍ତାଘାଟ

ଭୁବନେଶ୍ୱର: ସ୍ମାର୍ଟ ସିଟି ଭୁବନେଶ୍ୱର ବଡ ସମସ୍ୟା ‘‘ଜବରଦଖଲ’’ । ବଢୁଛି ଜବରଦଖଲକାରୀଙ୍କ ଦୌରାତ୍ମ୍ୟ । ଏଠି ରହିଛି ୪ଶହରୁ ଅଧିକ ବସ୍ତି । ଆଗକୁ ସହରାଞ୍ଚଳରେ ରହିବନି ବସ୍ତି । ପ୍ରତିଦିନ ଚାଲିଛି ବସ୍ତି ଉଚ୍ଛେଦ । ହେଲେ ଚିନ୍ତା ବଢାଉଛି ନିଗମ ଅଞ୍ଚଳରେ ଦିନକୁ ଦିନ ବୃଦ୍ଧି ପାଉଥିବା ଜବରଦଖଲକାରୀଙ୍କ ସଂଖ୍ୟା । ରାସ୍ତାଘାଟ କିଛି ମାନୁନାହାନ୍ତି । ସବୁ ସେମାନଙ୍କ ଅକ୍ତିଆରରେ । ସଙ୍କୁଚିତ ହେବାରେ ଲାଗିଛି ରାସ୍ତାଘାଟ । ଭୁବନେଶ୍ୱରର ଶାନ୍ତି ବସ୍ତି ଏଥିରୁ ଅନ୍ୟତମ । ଯାହା ଅଞ୍ଚଳବାସୀଙ୍କ ସମସ୍ୟାକୁ ଦ୍ୱିଗୁଣିତ କରିବାରେ ଲାଗିଛି । ସେପଟେ ଉଚ୍ଛେଦ ପରେ ପରବର୍ତ୍ତି କାର୍ଯ୍ୟାନୁଷ୍ଠାନ ବା ଥଇଥାନର ବ୍ୟବସ୍ଥା ହେଉନଥିବା ଅଭିଯୋଗ କରିଛନ୍ତି ଜବରଦଖଲକାରୀ ।

ରାଜଧାନୀକୁ ଜବରଦଖଲ ମୁକ୍ତ କରିବାକୁ ଉଭୟ ବିଏମସି ଓ ବିଡିଏ ପକ୍ଷରୁ ଗଠନ ହୋଇଛି ସ୍ୱତନ୍ତ୍ର ସ୍କ୍ୱାର୍ଡ । କମିଶନରେଟ୍ ପୋଲିସର ମଧ୍ୟ ନିଆଯାଉଛି ସହଯୋଗ । ବୁଲଡୋଜର ଜରିଆରେ ଭିନ୍ନଭିନ୍ନ ଅଞ୍ଚଳରେ ନିୟମିତ ଜାରି ରହିଛି ଉଚ୍ଛେଦ କାର୍ଯ୍ୟ । ତଥାପି ମାଡି ଆସୁଛନ୍ତି ଜବରଦଖଲକାରୀ । ଯାହାକୁ ସ୍ୱୀକାର ମଧ୍ୟ କରିଛନ୍ତି ଖୋଦ୍ ବିଡିଏ ଏନଫୋର୍ସମେଣ୍ଟ ଅଧିକାରୀ । ସେପଟେ ଏଭଳି ଅଭିଯୋଗକୁ ନେଇ ପ୍ରତିକ୍ରିୟା ରଖିଛନ୍ତି ବିଏମସି କମିଶନର । ଉଚ୍ଛେଦ ସାଙ୍ଗକୁ ନିୟମିତ ଚଢାଉର ଆବଶ୍ୟକତା ରହିଛି । ଜବରଦଖଲ ବୃଦ୍ଧିର ହେଉଛି ପ୍ରମୁଖ କାରଣ । ତେବେ ଏଥିପାଇଁ ବିଭିନ୍ନ ବିଭାଗ ମଧ୍ୟରେ ସମନ୍ୱୟର ଅଭାବକୁ ଦାୟୀ କରାଯାଇଛି ।