ନନ୍ଦିଘୋଷ ବ୍ୟୁରୋ : ଆବୁଧାବିରୁ ଭୁବନେଶ୍ବର ସିଧା ବିମାନ ବନ୍ଦ ହେବାର ଆଶଙ୍କା ଦେଖାଦେଇଛି। ମୁଖ୍ୟମନ୍ତ୍ରୀଙ୍କ ଉଦ୍ୟମ ପରେ ଜୁନ୍ ୧୨ ତାରିଖରୁ ୬ ମାସ ପାଇଁ ଆରମ୍ଭ ହୋଇଥିବା ବିମାନ ସେବା ଆଗକୁ ବଢିବ କି ନାହିଁ ତାହା ସନ୍ଦେହରେ। ଏହାକୁ ନେଇ ଚିନ୍ତାରେ ପ୍ରବାସୀ ଓଡ଼ିଆ। ସିଧା ବିମାନ ଦ୍ବାରା ଓଡ଼ିଶା ଓ ଗଲ୍ଫ ଦେଶ ମଧ୍ୟରେ ବ୍ୟବସାୟ ଓ ସଂସ୍କୃତିର ବିନିମୟ ହେବା ସହ କମ୍ ଦାମରେ କମ୍ ସମୟରେ ଯିବା ଆସିବା ହୋଇପାରୁଛି। ଏଥିପାଇଁ ରାଜ୍ୟ ସରକାର ପ୍ରୋଇଭେଟ ଅପରେଟର ଇଣ୍ଡିଗୋକୁ ବିମାନ ଚଳାଚଳ ପାଇଁ ଆର୍ଥିକ ସହାୟତା ଯୋଗାଉଛନ୍ତି। ସରକାର ଏହି ସହାୟତା ଜାରି ରଖି ସିଧା ବିମାନ ଚଳାଇବାକୁ କେନ୍ଦ୍ରମନ୍ତ୍ରୀଙ୍କ ସହ ମୁଖ୍ୟମନ୍ତ୍ରୀଙ୍କୁ ଅନୁରୋଧ କରିଛନ୍ତି।
ଜୁନ୍ ୧୨, ୨୦୨୫ରେ ଆରମ୍ଭ ହୋଇଥିଲା ଭୁବନେଶ୍ବର-ଆବୁଧାବି ସିଧା ବିମାନ ସେବା। ୬ ମାସ ପାଇଁ ସରକାର ଦେଇଥିଲେ ଭାୟାବିଲିଟି ଗ୍ୟାପ ଫଣ୍ଡ। ଏବେ ଡ଼ିସେମ୍ବର ୧୧ ତାରିଖରୁ ଏହି ସିଧା ବିମାନ ସେବା ବନ୍ଦ ହେବାର ଆଶଙ୍କା ଉପୁଜିଛି। ଏହାକୁ ନେଇ ଚିନ୍ତାରେ ୟୁଏଇରେ ରହୁଥିବା ୧୦ ହଜାର ଓଡ଼ିଆ। ଭୁବନେଶ୍ବର-ଆବୁଧାବି ସିଧା ବିମାନ ଉପରେ ବିହାର, ପଶ୍ଚିମବଙ୍ଗ, ଆନ୍ଧ୍ର ଓ ଓଡ଼ିଶାର ଲୋକେ ନିର୍ଭର କରିଥାନ୍ତି। ସିଧା ବିମାନ ୪ ଘଣ୍ଟା ଲାଗୁଥିବା ବେଳେ ଟିକେଟ ଦର ବି କମ୍ ପଡ଼ୁଛି। ଅପରେଟର ଇଣ୍ଡିଗୋ ଏହି ରୁଟରେ ଲାଭ ନ ହେବା କଥା କହି ବାରମ୍ବାର ବନ୍ଦ କରିଦେବା କଥା କହୁଥିବାରୁ ରାଜ୍ୟ ସରକାର ଭାୟାବିଲିଟି ଗ୍ୟାପ ଫଣ୍ଡ ଯୋଗାଇଛନ୍ତି। ୬ ମାସ ପାଇଁ ଏହା ବଳବତ୍ତର ଥିବା ବେଳେ ଡ଼ିସେମ୍ବର ୧୧ ତାରିଖରୁ ବନ୍ଦ ହେବା ଆଶଙ୍କା ଥିବାରୁ ଏହାକୁ ଚାଲୁ ରଖିବାକୁ ସରକାରଙ୍କୁ ଅନୁରୋଧ କରିଛନ୍ତି ଆବୁଧାବି ପ୍ରବାସୀ ଓଡ଼ିଆ ସମାଜ।
ଆବୁଧାବି, ଦୁବାଇ, ୟୁଏଇ ଭଳି ଗଲ୍ଫ ଦେଶରେ ପ୍ରାୟ ୧୦ ହଜାର ଓଡ଼ିଆ ବସବାସ କରୁଛନ୍ତି। ଓଡ଼ିଶା ମଧ୍ୟରେ ଭାବର ବିନିମୟ ହେଉ କି ସଂସ୍କୃତି, ପରମ୍ପରା କଥା, ପୁଣି ବ୍ୟବସାୟ ପାଇଁ ମଧ୍ୟ ଏହା ରୁଟ ଅେନକ ଗୁରୁତ୍ବ ବହନ କରୁଛି। ସି’ ଫୁଡ଼, ହସ୍ତକଳା, ହସ୍ତଶିଳ୍ପ ଭଳି ଦ୍ରବ୍ୟର ଆଦର ଗଲ୍ଫ ଦେଶରେ ଅନେକ। ପର୍ଯ୍ୟଟନ ସହ ଦ୍ବିପାକ୍ଷିକ ସମ୍ପର୍କ ବୃଦ୍ଧି ପାଇଁ ସିଧା ବିମାନର ଆବଶ୍ୟକତା ରହିଛି। ଆବୁଧାବି ଗଲ୍ଫ ଦେଶର ପ୍ରବେଶ ପଥ ହୋଇଥିବା ବେଳେ ଭୁବନେଶ୍ବରରୁ ସିଧା ବିମାନ ଅେନକ ସହାୟକ ହେଉଛି। ଏହା ସହ ଆବୁଧାବି ବିମାନବନ୍ଦରରେ ୟୁଏସ୍-ଇମିଗ୍ରେସନ କ୍ଲିୟରାନ୍ସର ସୁବିଧା ଥିବାରୁ ସିଧା ବିମାନ ଚଳାଚଳ ଜାରି ରଖିବାକୁ କେନ୍ଦ୍ରମନ୍ତ୍ରୀ, ମୁଖ୍ୟମନ୍ତ୍ରୀ ଓ ବାଣିଜ୍ୟ ପରିବହନ ମନ୍ତ୍ରୀଙ୍କୁ ଚିଠି ଲେଖି ଅନୁରୋଧ କରିଛନ୍ତି ପ୍ରବାସୀ ଓଡ଼ିଆ ସମାଜ।
ଭୁବନେଶ୍ବରରୁ ଆବୁଧାବି ସିଧା ବିମାନ ସପ୍ତାହରେ ୩ ଥର ଇଣ୍ଡିଗୋ ଚଳାଚଳ କରୁଥିବାରୁ ଏଠାରୁ ଆମେରିକା, ୟୁରୋପ ଭଳି ଦେଶକୁ ସିଧା ସଂଯୋଗ ଥିବାରୁ ଯାତ୍ରୀଙ୍କ ପାଇଁ ସୁବିଧା ହେଉଛି। ଦୁବାଇ, ସିଙ୍ଗାପୁର, ବ୍ୟାଙ୍କକକୁ ସିଧା ବିମାନ ଭୁବନେଶ୍ବରରୁ ଚାଲୁଥିବା ବେଳେ ଦେଶ ଭିତରେ ୨୮ଟି ସ୍ଥାନକୁ ସିଧା ବିମାନ ଉଡ଼ୁଛି।
