ଔଷଧ ପାଇଁ ସାଇକେଲରେ ରଣପୁରରୁ ରାଜଧାନୀ, ପୁଅର ଜୀବନ ପାଇଁ ବାପାର ସଂଘର୍ଷ
ନୟାଗଡ଼: ସ୍ନେହ, ସନ୍ତାନ ଓ ସ୍ୱାସ୍ଥ୍ୟ ଭିତରେ ଚାଲିଛି ଅହରହ ସଂଘର୍ଷ । ରଣପୁରର ଜୀବନ ରାଜଧାନୀରେ ବନ୍ଧା ପଡ଼ିଛି । ସାଇକେଲରେ ପ୍ରତି ମାସରେ ଚାଲିଛି ଜୀବନ କିଣା । ଆଉ ଏ ଜୀବନ କିଣା ବିକା ରାସ୍ତାର ଲମ୍ବା ୧୩୫ କିଲୋମିଟର । ଏହା ରାସ୍ତାରେ ଅନେକ ବାଧା ବିଘ୍ନ ଆସେ , ହେଲେ ସବୁ ଅସୁବିଧାକୁ ଭଲପାଇବାର ଭଉଁରୀରେ ଦାବି ଦେଇ ଆଗେଇ ଚାଲେ ବାପା । ପୁଅକୁ ବଞ୍ଚାଇବାର ଏ ହେଉଛି ଗୋଟିଏ ବାପାର ଯୁଦ୍ଧ । ଆଉ ଏ ସଂଘର୍ଷର ଯୁଦ୍ଧରେ ଢ଼ାଲ ହୋଇ ଛିଡ଼ା ହୋଇଛି ବାପା । ମୁହଁରେ ଅଭାବି ଦୁନିଆର ନିରାଶା ଆଉ ଅସହାୟତାର ମେଞ୍ଚାମେଞ୍ଚା ଭସା ବାଦଲ । ତଥାପି ଅସହାୟର ବାଦଲ ଭିତରେ ବାରି ହୋଇପଡ଼ୁଛି ସମ୍ପର୍କର ସମ୍ପୂର୍ଣ୍ଣତା । କାରଣ ବାପା ପୁଅକୁ ବଞ୍ଚାଇବା ପାଇଁ ପ୍ରତି ମାସରେ ୧୩୫ କିଲୋମିଟର ଔଷଧ ପାଇଁ ଯାତ୍ରା କରୁଛି । ଆଉ ସାଇକଲର ଚକା ସହ ଘୁରି ଚାଲିଛି ପୁଅର ଜୀବନ ଚକ୍ର ।
ପୁଅକୁ ୫ ମାସ ହୋଇଥିଲା ବେଳେ ମାଆ ଆରପାରିକୁ ଛାଡ଼ି ଚାଲିଗଲେ । ତାପରେ କିଛି ଦିନ ଭଲରେ ଚାଲିଥିଲା ସଂସାର । କିନ୍ତୁ ଦୁଃଖ ବୋଧେ ସୁଖର ଦୁନିଆକୁ ଯିବାକୁ ପଛରୁ ଟାଣି ଧରିଥିଲା । ମାଆ ଚାଲି ଯିବାର କିଛି ମାସ ପରେ ଜଣାପଡ଼ିଲା ପୁଅ ହୃଦ ରୋଗର ଶିକାର ହୋଇଛି । ଦୁନିଆ କଣ ଜାଣିନଥିବା କୁନି ଜୀବନ ଏବେ ହୃଦ ରୋଗରେ ପିଡ଼ିତ । ଏଭଳି ଏକ ଘଟଣା ଦେଖିବାକୁ ମିଳିଛି ରଣପୁର ବ୍ଲକ୍ ତାଳକଣିର ମାଗୁଣି ବେହେରାଙ୍କ ଜୀବନରେ । ପୁଅର ନା ହେଉଛି ରୁଦ୍ର ବେହେରା । ରୁଦ୍ର ପାଇଁ ରଣପୁରରେ ଔଷଧ ମିଳୁନାହିଁ । ସେଥିପାଇଁ ମାଗୁଣି ପ୍ରତି ମାସରେ ଅଟୋରେ ଭବନେଶ୍ୱର ଆସନ୍ତି ଔଷଧ ପାଇଁ । କିନ୍ତୁ ଅର୍ଥାଭାବ ଅଟୋରେ ଯିବା ବ୍ରେକ୍ ଲଗାଇଲା । ତଥାପି ହାର ମାନିଲେନି ମାଗୁଣି । ଅଟୋ ହେଲାନି ବୋଲି କଣ ମୋ ପୁଅକୁ ଜୀବନ ଯୁଦ୍ଦ ହାରି ଯିବାକୁ ଦେବି । ଏଭଳି କିଛି ଭାବନାକୁ ସାମର୍ଥ୍ୟ କରି ସାଇକେଲେ ବାହାରିଲେ ଭୁବନେଶ୍ୱର । ପ୍ରତି ମାସରେ ଚାଲିଛ ରଣପୁରରୁ ରାଜଧାନୀ ୧୩୫ କିଲୋ ମିଟରର ଯାତ୍ରା ।
ମାଗୁଣିଙ୍କର ୩ଟି ସନ୍ତାନ ଅଛନ୍ତି । ବଡ ପୁଅ ଓ ଝିଅଙ୍କ ପାଠ ପଢା ସହିତ ଘର ଖର୍ଚ୍ଚର ବୋଝ ମାଗୁଣିଙ୍କ ଉପରେ । ଏପଟେ ଶିଶୁଟିର ଜୀବନ ବଞ୍ଚାଇବାକୁ ଅପରେସନ୍ ନିହାତି ଜରୁରୀ । ସରକାରୀ ସ୍ତରରେ କିଛି ସାହାର୍ଯ୍ୟ ସହଯୋଗ ମିଳିଲେ ଶିଶୁଟିର ଜୀବନ ରକ୍ଷା ହୋଇପାରନ୍ତା । ଏଥିପାଇଁ ସରକାରଙ୍କୁ ସାହାର୍ଯ୍ୟ ମାଗିଛନ୍ତି ମାଗୁଣି।
