ଦିଲ୍ଲୀରୁ ଭୋଜପୁରୀ ଗାୟକ ଗିରଫ, ରଖିଥିଲେ ୨୧ କିଲୋ ଗଞ୍ଜେଇ
ନୂଆଦିଲ୍ଲୀ: ପଶ୍ଚିମ ଦିଲ୍ଲୀର ଇନ୍ଦରପୁରୀ ଅଞ୍ଚଳରୁ ଭୋଜପୁରୀ ଗାୟକ ଗିରଫ । ଗାୟକଙ୍କ ଠୁ ୨୧ କିଲୋଗ୍ରାମ ଗଞ୍ଜେଇ ଜବତ କରିଛି ପୋଲିସ । ଗିରଫ ପରେ ଗାୟକଙ୍କ ପରିଚୟ ମିଳିଛି । ଗାୟକ ଜଣକ ବିହାରର ସିୱାନ ଅଞ୍ଚଳର ହୋଇଥିବା ଜଣାପଡିଛି । ଦିଲ୍ଲୀର ନାର୍କୋଟିକ୍ସ ସେଲ୍କୁ ଡ୍ରଗ୍ସ ପେଡଲର୍ଙ୍କ ଖବର ମିଳିଥିଲା ।
ଖବର ପାଇ ନାର୍କୋଟିକ୍ସ ସ୍କ୍ବାଡ ଇନ୍ଦରପୁରୀ ଟୋପାପୁର ଅଞ୍ଚଳରେ ଅଚାନକ ଚଢାଉ କରିଥିଲା । ଡ୍ରଗ୍ସ ପେଡଲରକୁ ଧରିବା ପାଇଁ ଜାଲ ବିଛାଇଥିଲା ପୋଲିସ । ଏହି ଚଢାଉ ବେଳେ ଗାୟକ ବିନୟ ଶର୍ମାକୁ ଗିରଫ କରାଯାଇଛି । ଏନଡିପିଏସ ଆକ୍ଟ ଅନୁସାରେ ବିନୟଙ୍କ ବିରୁଦ୍ଧରେ ମାମଲା ରୁଜୁ ହୋଇଛି ।
ଗାୟକଙ୍କ ନିକଟରେ ଏତେ ମାତ୍ରାରେ କେଉଁଠୁ ଗଞ୍ଜେଇ ଆସିଲା ତାହା ତଦନ୍ତ କରିବ ପୋଲିସ । ତେବେ ଗିରଫ ଗାୟକଙ୍କୁ ପଚରାଉଚୁରା କରୁଛି ପୋଲିସ । ବିନୟ ଶର୍ମା ଜଣେ ଭୋଜପୁରୀ ଗାୟକ ହୋଇଥିବାବେଳେ ୧୦୦ରୁ ଅଧିକ ଗୀତ ଗାଇଛନ୍ତି ।
