ବାହୁଡ଼ା ଯାତ୍ରାରେ ବଡ଼ଦାଣ୍ଡରେ ବାଜିବ ଭଜନ
ପୁରୀ: ବାହୁଡ଼ା ଯାତ୍ରା ନେଇ ନୀଳାଦ୍ରି ଭକ୍ତ ନିବାସରେ ଗୁରୁତ୍ୱପୂର୍ଣ୍ଣ ବୈଠକ ବସିଥିଲା । ବୈଠକ ପରେ ଶ୍ରୀମନ୍ଦିର ପ୍ରଶାସନ ପକ୍ଷରୁ ବାହୁଡ଼ା ଯାତ୍ରା ପାଇଁ ପ୍ରସ୍ତୁତି ନେଇ ସୂଚନା ଦିଆଯାଇଛି । ଖରା ଦୃଷ୍ଟିରୁ ଫାୟାର ଡିପାର୍ଟମେଣ୍ଟ, ପିଏଚଡି ଗାଡ଼ି ପ୍ରସ୍ତୁତ ଅଛି । ରଥରେ ନିୟୋଜିତ ସେବାୟତ ଓ କର୍ମଚାରୀଙ୍କ କୋଭିଡ୍ ଟେଷ୍ଟ ହୋଇଛି । ସମସ୍ତଙ୍କ ରିପୋର୍ଟ ନେଗେଟିଭ୍ ଆସିଛି । ବଡ଼ଦାଣ୍ଡରେ ଭଜନ ସମାରୋହ ନେଇ ନିଷ୍ପତ୍ତି ହୋଇଛି । ନୀତିକାନ୍ତି ସୁରୁଖୁରୁରେ ଚାଲିଛି ।
ସମୟରେ ପହଣ୍ଡି ହେବ, ରଥ ସମୟରେ ସିଂହଦ୍ୱାରରେ ଲାଗିବ ବୋଲି ଜିଲ୍ଲାପାଳ ଆଶାବ୍ୟକ୍ତ କରିଛନ୍ତି । ଆଜି ରାତି ୧୦ଟାରୁ କର୍ଫ୍ୟୁ ଲାଗୁ ହେଉଛି । କର୍ଫ୍ୟୁ ୨ ତାରିଖ ରାତି ୧୦ଟା ଯାଏଁ ବଳବତ୍ତର ରହିବ । ପୁରୀକୁ ସଂଯୋଗ କରୁଥିବା ସମସ୍ତ ରାସ୍ତା ସିଲ୍ ହେବ । ସମସ୍ତେ ଘରେ ରହି ଗୁଣ୍ଡିଚା ଯାତ୍ରା ଭଳି ଟିଭିରେ ବାହୁଡ଼ା ଯାତ୍ରା ଦେଖନ୍ତୁ । ସୁପ୍ରିମକୋର୍ଟଙ୍କ ନିର୍ଦ୍ଦେଶ ମାନିବାକୁ ଜିଲ୍ଲାପାଳ ଅନୁରୋଧ କରିଛନ୍ତି । ରଥ ଗଡ଼ିବା ବେଳେ ପ୍ରଶାସନ ପକ୍ଷରୁ ବଡ଼ଦାଣ୍ଡରେ ଭଜନ ବାଜିବ । ଏନେଇ ବଡ଼ଦାଣ୍ଡର ୫ରୁ ୬ଟି ସ୍ଥାନରେ ଅସ୍ଥାୟୀ କାହାଳୀ ବ୍ୟବସ୍ଥା କରାଯାଇଛି ।
ବାହୁଡ଼ା ଯାତ୍ରା, ସୁନାବେଶ, ଅଧରପଣା ନୀତି ଓ ନୀଳାଦ୍ରିବିଜେ ପାଇଁ ଜିଲ୍ଲାପାଳ ସମସ୍ତଙ୍କ ସହଯୋଗ ଲୋଡ଼ିଛନ୍ତି । କୋଭିଡ୍ କଟକଣା ଭିତରେ ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁଯାୟୀ ଚତୁର୍ଦ୍ଧାମୂର୍ତ୍ତି ଆସନ୍ତାକାଲି ଗୁଣ୍ଡିଚା ମନ୍ଦିରରୁ ଶ୍ରୀମନ୍ଦିର ଅଭିମୁଖେ ବାହୁଡ଼ିଯିବେ । ରଥଯାତ୍ରା ଭଳି ସେବାୟତ ତିନି ରଥକୁ ଟାଣିନେବେ । ସିଂହଦ୍ୱାରରେ ରଥ ପହଞ୍ଚିବା ପରେ ଗୁରୁବାର ରଥରେ ମହାପ୍ରଭୁଙ୍କ ସୁନାବେଶ ହେବ । ଏନେଇ ପ୍ରଶାସନ ପକ୍ଷରୁ ସମସ୍ତ ପ୍ରକାର ପ୍ରସ୍ତୁତି କରାଯାଇଛି ।
