ଗୀତା ଜୟନ୍ତୀରେ ଚାଲିଛି ଗୀତାପାଠ । ବ୍ରାହ୍ମଣଙ୍କ ଉଚ୍ଚାରଣରେ କମ୍ପୁଛି ଚଉଦିଗ । ଗୀତା ଜୟନ୍ତୀ ଅବସରରେ ସୁବର୍ଣ୍ଣପୁର ଜିଲ୍ଲାର ବାନ୍ଧ ଶିଳ୍ପୀ ପ୍ରଫୁଲ୍ଲ ମେହେର ଏକ ୱାଲ ହ୍ୟାଙ୍ଗିଙ୍ଗରେ ଗୀତାର ଶ୍ଲୋକ ନିଖୁଣ ଭାବେ ବୁଣିଛନ୍ତି । ୧୪.୩ ମିଟର ଲମ୍ବର ଏକ ୱାଲ ହ୍ୟାଙ୍ଗିଙ୍ଗରେ ସରୁ ସୂଚାରେ ଭାଗବତର ୧୮ ଅଧ୍ୟାୟକୁ ସଂସ୍କୃତ ଭାଷାରେ ପରିସ୍ଫୁଟନ କରିଛନ୍ତି ।
ଗୀତାର ୧୮ ଅଧ୍ୟାୟର ୭୦୦ ଶ୍ଲୋକକୁ ପ୍ରଫୁଲ୍ଲ ଓ ୨୭ ଜଣ କାରିଗର ୪ ବର୍ଷ ୬ ମାସ ଧରି ବୁଣିଛନ୍ତି । ପ୍ରଫୁଲ୍ଲ ବୀରମହାରାଜପୁର ଅଞ୍ଚଳର ଏକ ବୁଣାକାର ପରିବାରରେ ଜନ୍ମିତ । ପିଲାବେଳୁ ତାଙ୍କର ନିଜର କୌଳିକ ବୃତ୍ତି ବାନ୍ଧକଳା ପ୍ରତି ବେଶ ଆଗ୍ରହ ଥିଲା । ପାଠପଢା ସରିବା ପରେ ସେ ରାଜ୍ୟ ବୟନ ଓ ହସ୍ତତନ୍ତ ବିଭାଗରେ ଚାକିରି କରିଥିଲେ । ସେ ୧୯୯୨ ରେ ନ୍ୟାସନାଲ ମେରିଟ ପୁରସ୍କାର ପାଇଥିଲେ । ଅବସର ପରେ ଏବେ ଏହି ୱାଲ ହ୍ୟାଙ୍ଗିଙ୍ଗରେ ଗୀତାର ଶ୍ଲୋକ ଗୁଡିକ ବୁଣି ପୁଣି ଚର୍ଚ୍ଚାରେ । ଏହି ହ୍ୟାଙ୍ଗିଙ୍ଗଟିକୁ ସ୍ଥାନୀୟ ଜିଲ୍ଲାପାଳ ଲୋକାର୍ପିତ କରିଛନ୍ତି । ବିଭିନ୍ନ ସମୟରେ ଚର୍ଚ୍ଚାରେ ରହେ ଜିଲ୍ଳାର ବାନ୍ଧ ଶିଳ୍ପୀଙ୍କ କଳା କାରିଗରି । ଏବେ ମଧ୍ୟ ଏହି ୱାଲ ହ୍ୟାଙ୍ଗିଙ୍ଗ ବେଶ୍ ଆଦୃତ ହେବ ବୋଲି ଆଶା କରାଯାଉଛି ।
