ବଜାରରେ ଅନେକ ସମୟରେ ନକଲି ଦ୍ରବ୍ୟ ମିଳିବା ଆପଣ ମାନେତ ନିଶ୍ଚୟ ଜାଣିଥିବେ । କେତେବେଳେ ପ୍ଲାଷ୍ଟିକ ଅଣ୍ଡା ତ କେତେବେଳେ ପ୍ଲାଷ୍ଟିକ ଚାଉଳ ପୁଣି କେବେ ମିଳେ ନକଲି ପନିପରିବା । ଗ୍ରାହକ ଏଥିପ୍ରତି ସଜାଗ ହୋଇ ଅସଲି ଏବଂ ନକଲି ଦ୍ରବ୍ୟ ମଧ୍ୟରେ ଫରକ କରିବା ନିହାତି ଆବଶ୍ୟକ । ନହେଲେ ଏହା ଆପଣଙ୍କ ସ୍ୱାସ୍ଥ୍ୟ ପ୍ରତି ହାନିକାରକ ସାବ୍ୟସ୍ତ୍ୟ ହୋଇପାରେ ।
ତେବେ ଅଣ୍ଡା, ଚାଉଳ, ପନିପରିବା ପରେ ଏବେ ନକଲି ଜିରା ମାର୍କେଟରେ ଆସୁଛି । ଆଜ୍ଞା ହଁ, ଏହି ଜିରା ଫୁଲଝାଡୁ, ପଥରଗୁଣ୍ଡ ଏବଂ ଗୁଡ଼ରୁ ପ୍ରସ୍ତୁତ ହେଉଛି । ଅସଲି ଜିରା ଦାମ କିଲୋପ୍ରତି ୪ଶହ ଟଙ୍କା ଥିବାବେଳେ ଏହି ନକଲି ଜିରା ଦାମ କିଲୋପ୍ରତି ୨୦ ଟଙ୍କା ରହିଛି । କେତେକ ଏହାକୁ ସିନ୍ଥେଟିକ୍ ଜିରା କହୁଛନ୍ତି।
ତେବେ ଏହାକୁ ଖାଇବା ଦ୍ୱାରା ନାନା ପ୍ରକାର ଶାରୀରିକ ସମସ୍ୟା ଦେଖାଦେବାରେ ଲାଗିଛି। ଶରୀରର ରୋଗପ୍ରତିରୋଧକ ଶକ୍ତି କମିଯାଇଥାଏ। ତେଣୁ ବଜାରରେ ମିଳୁଥିବା ଜିରା ଅସଲି ନା ନକଲି ତାହା ଜାଣିବା ପାଇଁ ଏହାକୁ କିଛି ସମୟରେ ପାଣିରେ ପକାଇଲେ ଜଣାପଡ଼ିଥାଏ । ଯଦି ପାଣିରେ ପଡ଼ିବାର କିଛି ସମୟ ପରେ ଜିରାର ରଙ୍ଗ ପରିବର୍ତ୍ତନ ହେବା ସହିତ ଏହା ଭାଙ୍ଗିଯାଏ ତେବେ ଜାଣିବେ ଯେ ଏହା ନକଲି ବୋଲି । ତେଣୁ ଜିରା କିଣୁଥିବା ସମୟରେ ସତର୍କତା ଅବଲମ୍ବନ କରନ୍ତୁ ।
