ବହୁ ପ୍ରତୀକ୍ଷିତ ଆଙ୍କୁଲି-ଇଞ୍ଜିନିୟରିଂ ସ୍କୁଲ ରେଳ ଓଭର ବ୍ରିଜ୍ ଉଦଘାଟିତ
1 min read
ବ୍ରହ୍ମପୁର: ବ୍ରହ୍ମପୁର ସହରର ବହୁ ପ୍ରତୀକ୍ଷିତ ରେଳ ଓଭର ବ୍ରିଜ ଆଜି ଉଦଘାଟିତ ହୋଇଯାଇଛି । ଭିଡିଓ କନଫରେନ୍ସିଂ ଜରିଆରେ ଏହାର ଉଦଘାଟନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ବହୁ ପ୍ରତିକ୍ଷିତ ଆଙ୍କୁଲି-ଇଞ୍ଜିନିୟରିଂ ଇଞ୍ଜିନିୟରିଂ ସ୍କୁଲ ଛକ ମଧ୍ୟରେ ୨୭.୪୨ କୋଟି ଟଙ୍କାରେ ଏହାକୁ ନିର୍ମାଣ କରାଯାଇଛି । ଖାଲି ସେତିକି ନୁହେଁ ନିୟନ୍ତ୍ରିତ ବଜାର କମିଟି ଦିଗପହଣ୍ଡିର କପା ପ୍ରକ୍ରିୟାକରଣ କାରଖାନାର ଭିତ୍ତିପ୍ରସ୍ତର ମଧ୍ୟ ସ୍ଥାପିନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏହି ପ୍ରକଳ୍ପରେ ୨ କୋଟି ୨ ଲକ୍ଷ ଟଙ୍କା ବ୍ୟୟ ହେବ ବୋଲି ସୂଚନା ମିଳିଛି । କପା କଳ କାରଖାନା ପ୍ରତିଷ୍ଠା ହେଲେ ଏହା ଅନେକ ଲୋକଙ୍କ ଜୀବିକା ନିର୍ବାହ କରିବା ସହ ଚାଷୀଙ୍କ ପାଇଁ ମଧ୍ୟ ବେଶ୍ ସହାୟକ ହେବ ବୋଲି କୁହାଯାଇଛି । ଦିଗପହଣ୍ଡି ସମେତ ୭ଟି ବ୍ଲକର କପାଚାଷୀ ଉପକୃତ ହେବେ । ପାଖାପାଖି ୨ ଶହ କୁଶଳି ଓ ଅଣକୁଶଳି କାରିଗର ଏଠାରେ ନିଯୁକ୍ତି ପାଇବେ ।
ସେହିଭଳି ଲାଞ୍ଜିପଲ୍ଲୀ ଅଞ୍ଚଳର ଲୋକମାନଙ୍କ ଯିବାଆସିବା ପାଇଁ ଅସୁବିଧା ହେଉଥିଲା । ଶନିବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉଦ୍ଘାଟନ କରିଥିବା ବ୍ରିଜ୍ ଦ୍ୱାରା ଅନେକ ଲୋକଙ୍କ ସମସ୍ୟା ଦୂର ହୋଇଛି । ସ୍ଥାନୀୟ ବାସିନ୍ଦା ତଥା ସାଧାରଣ ଲୋକ ମୁଖ୍ୟମନ୍ତ୍ରୀଙ୍କୁ ଏନେଇ ଧନ୍ୟବାଦ ମଧ୍ୟ ଜଣାଇଛନ୍ତି । ଏହି କାର୍ଯ୍ୟକ୍ରମରେ ସାଂସଦ ଚନ୍ଦ୍ର ଶେଖର ସାହୁ ତଥା ପୂର୍ବତନ ବିଧାୟକ ଡକ୍ଟର ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକ ଓ ଗଞ୍ଜାମ ଜିଲ୍ଲାପାଳ ଉପସ୍ଥିତ ଥିଲେ ।
ଏହି ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି ଯେ, ‘ ବ୍ରହ୍ମପୁରକୁ ଆଧୁନିକ ସହର କରିବାକୁ ଯୋଜନା କରାଯାଉଛି । ଗଞ୍ଜାମରେ କରୋନା ସ୍ଥିତି ସ୍ୱାଭାବିକ ହେଉଛି, କିନ୍ତୁ ବିପଦ ଟଳିନି ।’ ଗଞ୍ଜାମବାସୀଙ୍କୁ ସତର୍କ ଓ ସଚେତନ ରହିବାକୁ ମଧ୍ୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପରାମର୍ଶ ଦେଇଛନ୍ତି ।
