କୋର୍ଟରେ ହାଜର ହେଲେନି ସୁମିତ୍, ନ୍ୟାୟ ମିଳିବା ଯାଏଁ ଘର ବାହାରେ ବସି ରହିବେ କହିଲେ ଡିମ୍ପଲ

ବ୍ରହ୍ମପୁର: ତପସ୍ୱିନୀଙ୍କ ତପସ୍ୟାର ଅନ୍ତ ଘଟିବ କେବେ ? କେବେ ମିଳିବ ନ୍ୟାୟ ? କେବେ ତପସ୍ୱିନୀଙ୍କୁ ଆପଣାଇ ନେବେ ସୁମିତ୍ ? ବ୍ରହ୍ମପୁର ମହାନଗର ଦ୍ୱିତୀୟ ଲାଇନରେ ୬ ଦିନ ହେଲା ଧାରଣାରେ ବସିଛନ୍ତି ତପସ୍ୱିନୀ ଓରଫ୍ ଡିମ୍ପଲ । ବିବାହ-ବିଚ୍ଛେଦ ମାମଲା କୋର୍ଟକୁ ଯାଇଥିବା ବେଳେ ଦୁଇଦିନ ତଳେ ତପସ୍ୱିନୀ ଦାଖଲ କରିଥିବା ପିଟିସନରେ ତ୍ରୁଟି ଥିବାରୁ ଆଜି ନୂଆ ପିଟିସନ୍ ଦାଖଲ କରିଛନ୍ତି । ତେବେ ଆଜି ମଧ୍ୟ କୋର୍ଟରେ କୌଣସି ନିଷ୍କର୍ସ ବାହାରି ନ ପାରିବାରୁ ନିରାଶ ହୋଇଛନ୍ତି ତପସ୍ୱିନୀ ।

ଆଜି ବ୍ରହ୍ମପୁର ଏସଡିଜେଏମ୍ କୋର୍ଟରେ ଡିମ୍ପଲ ହାଜର ହୋଇ ପକ୍ଷ ରଖିଥିବା ବେଳେ ଆସିନଥିଲେ ଡାକ୍ତର ସ୍ୱାମୀ ସୁମିତ୍ ସାହୁ । ଶ୍ୱଶୁର ପ୍ରମୋଦ ସାହୁ କୋର୍ଟରେ ଉପସ୍ଥିତ ରହି ନିଜ ପକ୍ଷ ରଖିଛନ୍ତି । ତେବେ ସୁମିତ୍ କୋର୍ଟରେ ଅନୁପସ୍ଥିତ ରହିବାରୁ ମାମଲା ଆଗକୁ ବଢ଼ି ପାରିନି । ସ୍ୱାମୀଙ୍କ ସହ ରହିବି, ସେ ଯାହା କହିବେ କରିବି ବୋଲି କୋର୍ଟରେ ନିବେଦନ କରିଛନ୍ତି ତପସ୍ୱିନୀ । ତେବେ, ଆଜି କୋର୍ଟଙ୍କ କୌଣସି ରାୟ ଆସିନଥିବାରୁ ପୂର୍ବଭଳି ଶ୍ୱଶୁର ଘରେ ଆଗରେ ବସି ରହିବେ ବୋଲି କହିଛନ୍ତି ସେ ।

ଗତକାଲି ତପସ୍ୱିନୀ କଥାବାର୍ତ୍ତାର ୨ଟି ଅଡିଓ ଗଣମାଧ୍ୟମକୁ ଦେଇଥିଲେ । ଏପରକି ମାର୍ଗଶୀର ମାସର ପ୍ରଥମ ଗୁରୁବାର ଥିବାରୁ ଶାଶୁ ଘରକୁ ଯିବାର ଅନୁମତି ନଥିବାରୁ ବାହାରେ ମାଣ ବସାଇଥିଲେ । ଯୁବତୀ ଜଣକ ବାହା ହେବା ପାଇଁ ଜିଦରେ ଅଟଳ ଥିବାବେଳେ ଗତକାଲି ଡାକ୍ତର ସୁମିତ୍ ଓ ତାଙ୍କ ବାପା ତପସ୍ୱିନୀଙ୍କ ସହ ବାହାଘର ହୋଇଥିବା ନେଇ ସ୍ୱୀକାର କରିଛନ୍ତି ।

ବାହାଘର ପାଇଁ ପୂର୍ବରୁ ସ୍ଥିର ହୋଇଥିଲା । କିନ୍ତୁ ତପସ୍ୱିନୀ ଘରେ ଗଣ୍ଡଗୋଳ କରି ବାହାରି ଯାଇଥିଲେ ବୋଲି ସୁମିତ୍ କହିଛନ୍ତି । ତେବେ ଛାଡ଼ପତ୍ର ପାଇଁ କୋର୍ଟରେ ଆବେଦନ କରାଯାଇଥିବା କହିଛନ୍ତି ସୁମିତ୍ । ଅନ୍ୟପଟେ ସୁମିତଙ୍କ ମା ଓ ଜେଜେମାଆ ବନ୍ଦ ଘରେ ରହୁଛନ୍ତି । ସେମାନଙ୍କ ଦେହ ଖରାପ ହୋଇଥିବାରୁ ସେମାନେ ବାହାରକୁ ଆସି ପାରୁନାହାନ୍ତି ବୋଲି କହିଛନ୍ତି ପରିବାର ଲୋକ ।