ପୁଟିନଙ୍କୁ ଭେଟିବା ପରେ ବେଲାଋଷ ରାଷ୍ଟ୍ରପତି ଅସୁସ୍ଥ

ମସ୍କୋ: ଋଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହ ଭେଟଘାଟ ପରେ ପରେ ବେଲାଋଷ ରାଷ୍ଟ୍ରପତି ଆଲେକଜାଣ୍ଡାର ଲୁକାସେଙ୍କୋ ହୋଇଛନ୍ତି ଗୁରତର । ତାଙ୍କୁ ବିଷ ଦିଆଯାଇଥିବା ନେଇ ଖବର ପ୍ରକାଶ ପାଇଛି । ଦୁଇ ନେତାଙ୍କ ମଧ୍ୟରେ ଘନିଷ୍ଠତା ଥିବାବେଳେ କାହିଁକି ଲୁକାସେଙ୍କୋ ଅସୁସ୍ଥ ହେଲେ ତାହାକୁ ନେଇ ଉଠିଛି ପ୍ରଶ୍ନ ।

ବେଲାଋଷ ବିରୋଧୀ ଦଳ ନେତା ତଥା ଆମେରିକାର ପୂର୍ବତନ ରାଷ୍ଟ୍ରଦୂତ ଭାଲେରି ସେପାକାଲୋ କହିଛନ୍ତି- ପୁଟିନଙ୍କ ସହ ଲୁକାସେଙ୍କୋ ରୁଦ୍ଧଦ୍ବାର ବୈଠକରେ ଉପନୀତ ହୋଇଥିଲେ । ତେବେ ଅକସ୍ମାତ ଲୁକାସେଙ୍କୋ ଅସୁସ୍ଥ ହେବାରୁ ତାଙ୍କୁ ମସ୍କୋସ୍ଥିତ ସେଣ୍ଟ୍ରାଲ କ୍ଲିନିକାଲ ହସ୍ପିଟାଲରେ ଭର୍ତ୍ତି କରାଯାଇଛି। ତାଙ୍କୁ ବିଷ ଦେବା କ୍ଷେତ୍ରରେ କ୍ରେମଲିନର ହାତ ଥିବା ଅଭିଯୋଗକୁ ଖଣ୍ଡନ କରାଯାଇପାରିବ ନାହିଁ ବୋଲି ସେ କହିଛନ୍ତି।

ସେପଟେ ୟୁକ୍ରେନକୁ ଏଟିଏସିଏମଏସ ଦୂରଗାମୀ କ୍ଷେପଣାସ୍ତ୍ର ଯୋଗାଇବା ଲାଗି ଆମେରିକା ଯୋଜନା କରୁଥିବା ସୂଚନା ମିଳିଛି । ୟୁକ୍ରେନ ଯଦି ଏହି ଶକ୍ତିଶାଳୀ ଅସ୍ତ୍ର ପାଇବ ତେବେ ଋଷ ଲାଗି ଏହା କ୍ଷତିକର ସାବ୍ୟସ୍ତ ହେବ ବୋଲି ଆଶଙ୍କା କରାଯାଇଛି । ପୂର୍ବରୁ ୟୁକ୍ରେନକୁ ଆମେରିକା ଏଫ-16 ଯୋଗାଇବାକୁ ଘୋଷଣା କରିଥିବାବେଳେ ଏବେ ଏଟିଏସିଏମଏସ ଦୂରଗାମୀ କ୍ଷେପଣାସ୍ତ୍ର ଯୋଗାଇବାକୁ ଚିନ୍ତା କରୁଛି ।