ତୁରନ୍ତ ବଦଳାନ୍ତୁ ଆପଣଙ୍କ ଫେସବୁକ ପାସୱାର୍ଡ, ଏହି ୨୫ ଆପ ପ୍ରତି ରହିଛି ବଡ଼ ବିପଦ

ନୂଆଦିଲ୍ଲୀ: ସ୍ମାର୍ଟଫୋନ ୟୁଜର୍ସଙ୍କ ପାଇଁ ଭାଇରସ ଯୁକ୍ତ ଆପ୍ ବହୁ ଅସୁବିଧା ସୃଷ୍ଟି କରୁଛି । ଅନ୍ୟପଟେ ଆପଣ ଯଦି ଫେସବୁକ ବ୍ୟବହାରକାରୀ ଏବଂ ଫୋନରେ ଆପଣ ଫେସବୁକ ବ୍ୟବହାର କରନ୍ତି ତେବେ ସାବଧାନ ହୋଇଯାଆନ୍ତୁ । ରିସର୍ଚର ମାନେ ଗୁଗୁଲ ପ୍ଲେ ଷ୍ଟୋରରେ ଥିବା ଏମିତି ୨୫ ବିପଜ୍ଜନକ ଆଣ୍ଡ୍ରଏଡ୍ ଆପ୍ କୁ ଚିହ୍ନଟ କରିଛି ଯାହା ୟୁଜର୍ସଙ୍କ ଫେସବୁକ ପାସୱାର୍ଡକୁ ଚୋରି କରି ଡାଟା ଆକ୍ସେସ କରୁଛି । ଚିନ୍ତାର ବିଷୟ ଏହା ମଧ୍ୟ ଯେ, ଏହି ଆପ ଗୁଡ଼ିକୁ ବିଶ୍ୱବ୍ୟାପି ୨୫ ଲକ୍ଷରୁ ଅଧିକ ଥର ଡାଉନଲୋଡ କରାଯାଇଛି ।

ଆକାଉଣ୍ଟରେ ରଖାଯାଉଛି ପୁରା ନଜର

ସାଇବର ସୁରକ୍ଷା ବିଶେଷଜ୍ଞମାନେ ରିପୋର୍ଟ କରିଛନ୍ତି ଯେ, ଏହି ମାଲେସିଅସ ଆପଗୁଡ଼ିକ ଷ୍ଟେପ୍ କାଉଣ୍ଟର, ୱାଲପେପର କିମ୍ବା ମୋବାଇଲ୍ ଗେମ୍ ଭଳି ଆପ୍ ଭାବରେ ନିଜକୁ ଉପସ୍ଥାପନ କରନ୍ତି | ଏହି ଆସ୍ପ୍ ର କଭର ତଳେ ସୁଦୂର ସ୍ଥାନରେ ବସିଥିବା ହ୍ୟାକର୍ସ ମାନେ ଦୁନିଆର ଯେକୌଣସି କୋଣରେ ନିଜ ଶୀକାରଙ୍କ ଫୋନ୍ ଏବଂ ଫେସବୁକ୍ ଆକାଉଣ୍ଟରେ ତୀକ୍ଷ୍ଣ ନଜର ରଖନ୍ତି ।

ଗୁଗୁଲ ପ୍ଲେ ଷ୍ଟୋରରୁ ହଟାଇଲା ଆପ୍

ଏହି ସପ୍ତାହରେ ଆସିଥିବା ZDNet ର ଏକ ରିପୋର୍ଟ ଅନୁଯାୟୀ ଫ୍ରେଞ୍ଚ ଟେକ୍ ଫର୍ମ Evinaର ସାଇବର ସିକ୍ୟୁରିଟି ଏକ୍ସପର୍ଟ ଏହି ୨୫ ନକଲି ଆପ୍ସର ତଥ୍ୟ ଦେଇଛି । ବିଶେଷଜ୍ଞ ମାନେ କହିଛନ୍ତି ଯେ ଏହି ସବୁ ଆପ୍ ନିଜକୁ ଅସଲି ଆପ କୁହାଇ ୟୁଜର୍ସଙ୍କ ଡାଟା ପ୍ରତି ବଡ଼ ବିପଦ ସୃଷ୍ଟି କରନ୍ତି ।  Evina ର ଆର୍ଲଟ  ପରେ ଗୁଗୁଲ ତୁରନ୍ତ ଆକ୍ସନ ନେଇ ଏହି ଆପ ଗୁଡ଼ିକୁ ବର୍ତ୍ତମାନ ପାଇଁ ପ୍ଲେ ଷ୍ଟୋରରୁ ହଟାଇ ଦେଇଛି ।

ନକଲି ଲଗଇନ୍ ପେଜରୁ କରନ୍ତି ରିପ୍ଲେସ୍

ସାଇବର ସିକ୍ୟୁରିଟି ବିଶେଷଜ୍ଞ କହିଛନ୍ତି ଯେ, ଏହି ଆପ୍ସ ମାଧ୍ୟମରେ ହ୍ୟାକରମାନେ ବ୍ୟବହାରକାରୀଙ୍କ ଫେସବୁକ ୟୁଜର୍ସନେମ ଏବଂ ପାସୱାର୍ଡ ଚୋରି କରୁଛନ୍ତି । ଏହି ଆପ୍ ଡାଉନଲୋଡ୍ କରିବା ପରେ, ମୂଳ ଫେସବୁକ୍ ଆପ୍ ନକଲି ଲଗଇନ୍ ପେଜ୍ ଦ୍ୱାରା ସ୍ଥାନିତ ହୁଏ । ଉପଭୋକ୍ତାମାନେ ସେମାନଙ୍କ ସହିତ ଘଟୁଥିବା ଏହି ଜାଲିଆତି ବିଷୟରେ କିଛି ଜାଣି ପାରନ୍ତି ନାହିଁ ଏବଂ ସେମାନଙ୍କର ଫେସବୁକ୍ ଲଗଇନ୍ କରିଦିଅନ୍ତି ।

ଟଙ୍କା କାରବାରର ବଡ଼ ଖେଳ

ଚୋରି ହୋଇଥିବା ୟୁଜର୍ସନେମ୍ ଏବଂ ପାସୱାର୍ଡ ସହିତ ହ୍ୟାକର୍ସମାନେ କ’ଣ କରନ୍ତି ତାହା ଏପର୍ଯ୍ୟନ୍ତ ଜଣା ପଡିନାହିଁ  । ତଥାପି, ପୂର୍ବରୁ ସମାନ ହ୍ୟାକିଂ ଉପରେ ଆଧାର କରି ଏହା କୁହାଯାଇପାରେ ଯେ ହ୍ୟାକରମାନେ ବ୍ୟବହାରକାରୀଙ୍କ ଏହି ଲଗଇନ୍ ବିବରଣୀକୁ ଡାର୍କ ୱେବରେ ଅନ୍ୟ ସାଇବର ଅପରାଧୀଙ୍କୁ ବିକ୍ରୟ କରି ବିପୁଳ ଅର୍ଥ ଉପାର୍ଜନ କରନ୍ତି ।