ନନ୍ଦିଘୋଷ ବ୍ୟୁରୋ: ବିଡ଼ିଏ ସମ୍ପତ୍ତି ସୁରକ୍ଷାରେ ମହା କେଳେଙ୍କାରୀ… ଆତ୍ମସାତ୍ ହେଉଛି କୋଟି କୋଟି ଟଙ୍କା… କିଛି ଅସାଧୁ କର୍ମଚାରୀଙ୍କ କଳାକାରନାମା ଯୋଗୁଁ ବଦନାମ ହେଉଛି ପୁରା ନଗର ଉନ୍ନୟନ ବିଭାଗ। ୫ଟି ଡ଼ିଭିଜନରେ ୨ ହଜାର ୯ ଶହ ସୁରକ୍ଷା କର୍ମୀଙ୍କୁ ରଖିଛି ବିଡ଼ିଏ। ଭୁବନେଶ୍ବରରେ ଥିବା ବିଡ଼ିଏ ଜାଗା ଓ ବିଲଡ଼ିଙ୍ଗ ଜଗାରଖା ପାଇଁ ଏମାନଙ୍କୁ ନିୟୋଜିତ କରାଯାଇଛି। ଘରୋଇ ସୁରକ୍ଷା କର୍ମୀମାନଙ୍କ ପାଇଁ ବିଡ଼ିଏ ଦେଉଛି ମାସକୁ ପ୍ରାୟ ୫ କୋଟି ଟଙ୍କା ଦରମା । କାଗଜ କଲମରେ ୨ ହଜାର ୯ଶହ ସୁରକ୍ଷା କର୍ମୀ। ହେଲେ ବାସ୍ତବରେ ନିୟୋଜିତ ଅଛନ୍ତି ୩ ଶହରୁ କମ୍। ସୂଚନା ଅଧିକାର ଆଇନ ଅନୁସାରେ ମିଳିଥିବା ତଥ୍ୟ ଆଧାରରେ ଡ଼ିଭିଜନ-୨ରେ ଥିବା କିଛି ଜାଗା ଓ ବିଲଡ଼ିଙ୍ଗରେ ୧୧୪୦ ଜଣ ସୁରକ୍ଷା କର୍ମୀ କାମ କରୁଛନ୍ତି ବୋଲି ବିଡ଼ିଏର ତଥ୍ୟ କହୁଛି। ଭାତ ହାଣ୍ଡିରୁ ଗୋଟିଏ ଚିପିବା ଭଳି ନନ୍ଦିଘୋଷ ଟିଭି ଏହି ତଥ୍ୟ ଆଧାରରେ କିଛି ଜାଗାକୁ ଯାଇ ପରଖିଥିଲା ବାସ୍ତବ ସ୍ଥିତି। ଲକ୍ଷ୍ମୀସାଗର ଅଞ୍ଚଳରେ ବିଡ଼ିଏର ଗୋଟିଏ ବିଲଡ଼ିଙ୍ଗ ସେଣ୍ଟର ଓ ଗୋଟିଏ ସେଣ୍ଟ୍ରାଲ ଷ୍ଟୋର ରହିଛି। ତଥ୍ୟ ଅନୁସାରେ ବିଲଡ଼ିଙ୍ଗ ସେଣ୍ଟରକୁ ଜଗୁଛନ୍ତି ୯୦ ଜଣ ସୁରକ୍ଷା କର୍ମୀ। ତିନୋଟି ସିଫ୍ଟରେ ୩୦ଜଣ ସୁରକ୍ଷା କର୍ମୀ ଜଗୁଛନ୍ତି । ହେଲେ ବାସ୍ତବ ଚିତ୍ର ପୂରା ଅଲଗା ।
ବିଲଡ଼ିଙ୍ଗ ସେଣ୍ଟର ପରେ ନନ୍ଦିଘୋଷ ଟିଭି ପହଞ୍ଚିଥିଲା ସେଣ୍ଟ୍ରାଲ ଷ୍ଟୋରରେ। ଏଠି ବି ସମାନ ଅବସ୍ଥା। ଏଠି ଜଗୁଛନ୍ତି ୧୨୦ ଜଣ ସୁରକ୍ଷା କର୍ମୀ। ଏ- ସିଫ୍ଟରେ ୩୦ ଜଣ, ବି- ସିଫ୍ଟରେ ୩୦ ଏବଂ ସି- ସିଫ୍ଟରେ ୬୦ ଜଣ ଜଗୁଛନ୍ତି ବଣଘେରା ପାଲଟିଥିବା ସେଣ୍ଟ୍ରାଲ ଷ୍ଟୋରକୁ । ଲକ୍ଷ୍ମୀସାଗରରେ ଥିବା ଦୁଇଟି ଯାକ ଜାଗା ଏବେ ପରିତ୍ୟକ୍ତ ଅବସ୍ଥାରେ । ଘରୋଇ ସଂସ୍ଥା ସୈନିକ ସିକ୍ୟୁରିଟିର ୩ ଜଣ ଲେଖାଏଁ ଏଠାରେ କାମ କରୁଛନ୍ତି। ହେଲେ କାଗଜ କହୁଛି ୨୧୦ଜଣ ସୁରକ୍ଷା କର୍ମୀ ଦିନରାତି ଏଠାରେ କାମ କରୁଛନ୍ତି।
ସେହିପରି ବିଡ଼ିଏର ତଥ୍ୟ କହୁଛି ଗାଡ଼କଣ ବିଏସୟୁପି ପ୍ରୋଜେକ୍ଟ ଜଗୁଛନ୍ତି ୯୦ ସୁରକ୍ଷା କର୍ମୀ। ଏଇଠି ବି ପହଞ୍ଚିଥିଲା ଆମ ଟିମ୍ । ବସ୍ତିରେ ରହୁଥିବା ଲୋକମାନଙ୍କ ପାଇଁ ସରକାର ଏଠାରେ ପକ୍କାଘର ଯୋଗାଇ ଦେଇଛନ୍ତି। ହେଲେ ଆମ ଟିମ୍ ଏଠାରେ ରହୁଥିବା ବାସିନ୍ଦାଙ୍କ ସହ ପ୍ରାୟ ଦୁଇଘଣ୍ଟା ରହିଥିଲେ ମଧ୍ୟ ୯୦ ସୁରକ୍ଷା କର୍ମୀଙ୍କ ମଧ୍ୟରୁ କାହାର ବି ଦେଖାନଥିଲା। ବାସ୍ତବରେ ଏଠାରେ ୯୦ ନୁହେଁ, ୩ ଜଣ ସୁରକ୍ଷା କର୍ମୀ ରହୁଛନ୍ତି । ଆବାସ ଯୋଜନାର ଘରେ ରହୁଛନ୍ତି। ସମ୍ପତ୍ତି ଜଗାରଖା କରିବା କେବଳ ବାହାନା। ଏହା ସହ ଗାଡ଼କଣରେ ଥିବା ୨୫ ଏକର ସରକାରୀ ଜମିକୁ ଜଗିଛନ୍ତି ପ୍ରତି ସଫ୍ଟରେ ୬୦ ଜଣ ଲେଖାଏଁ ମୋଟ ୧୮୦ ଜଣ। ହେଲେ ଏଠି ବି ସମାନ ଅବସ୍ଥା । ଜଣେ ହେଲେ ବି ସୁରକ୍ଷା କର୍ମୀ ସେଠାରେ ନଥିଲେ ।
ଏତିକିରେ ସରିନି ବିଡିଏର ଚଞ୍ଚକତା। ସତ୍ୟନଗର ଶାନ୍ତି ନଗର ଆବାସ ଯୋଜନାର ନାଁ ବଦଳି ଏବେ କେଶରୀ ରେସିଡ଼େନ୍ସି ହୋଇସାରିଲାଣି। ହେଲେ ବିଡ଼ିଏ ଖାତାରେ ଥିବା ଶାନ୍ତିନଗର ଆବାସ ଯୋଜନାକୁ ଜଗୁଛନ୍ତି ୩୦୦ ସୁରକ୍ଷା କର୍ମୀ। ବାସ୍ତବ କଥା ହେଲା ଏହି ପ୍ରକଳ୍ପ ପାଇଁ ତିନୋଟି ସିଫ୍ଟରେ ୧୦ରୁ ଅଧିକ ସୁରକ୍ଷା କର୍ମୀ ନାହାନ୍ତି। ଏମିତି ଚାଲିଛି ବିଡ଼ିଏରେ ସୁରକ୍ଷା କର୍ମୀମାନଙ୍କୁ ମିଛରେ ପୋଷିବା କାମ । ହରିଲୁଟ ହେଉଛି କୋଟି କୋଟି ଟଙ୍କା । ଏହାର ସତ୍ୟାସତ୍ୟ ଜାଣିବା ପାଇଁ ବିଡ଼ିଏ ଅଫିସ ଯାଇଥିଲୁ । ହେଲେ ଏଠାରେ କେହି କିଛି କହିବାକୁ ନାରାଜ ।
