ପର୍ଯ୍ୟାୟ କ୍ରମେ ଜବରଦଖଲ ମୁକ୍ତ ହେବ ସ୍ମାର୍ଟ ସିଟି
ଭୁବନେଶ୍ୱର: ରାଜଧାନୀର ଅନ୍ୟତମ ପ୍ରମୁଖ ସମସ୍ୟା ହେଉଛି ଜବରଦଖଲ । ସ୍ମାର୍ଟସିଟିକୁ ଜବରଦଖଲ ମୁକ୍ତ କରିବା ସହିତ ବିକାଶ କାର୍ଯ୍ୟକୁ ତ୍ୱରାନ୍ୱିତ କରିବାକୁ ଅଣ୍ଟା ଭିଡ଼ିଛନ୍ତି ଉଭୟ ବିଡିଏ ଓ ବିଏମସି କର୍ତ୍ତୃପକ୍ଷ । ଏଥିରେ ବିନିଯୋଗ ହେବ କୋଟି କୋଟି ଟଙ୍କା । ଏହି କ୍ରମରେ ବିଡିଏ ପକ୍ଷରୁ ଶୈଳଶ୍ରୀ ବିହାର ଛକରେ ରାସ୍ତା ଉପରେ ନିର୍ମାଣ ହୋଇଥିବା ସାଇ ମନ୍ଦିରର ମୁଖ୍ୟଦ୍ୱାର ଓ ପାଚେରିକୁ ଉଚ୍ଛେଦ କରାଯାଇଛି । ସେହିଭଳି ନନ୍ଦନ ବିହାର ଅଞ୍ଚଳରେ ବିଲଡରଙ୍କ ଦ୍ୱାରା ଠକେଇର ଶିକାର ହୋଇଥିବା ଲୋକଙ୍କ ଅଭିଯୋଗ କ୍ରମେ ଆପାର୍ଟମେଣ୍ଟର ପାଚେରିକୁ ମଧ୍ୟ ଭାଙ୍ଗିଛି ବିଡିଏ ।
ରାସ୍ତା ଉପରେ ନିର୍ମାଣ ହୋଇଥିବା ସାଇ ମନ୍ଦିର ମୁଖ୍ୟଦ୍ୱାରକୁ ନେଇ ଲାଗି ରହିଥିଲା ବିବାଦ । ଏନେଇ ବାରମ୍ବାର ଅଭିଯୋଗ ମଧ୍ୟ ହୋଇଥିଲା । ସେହିଭଳି ନନ୍ଦନ ବିହାରରେ ମଧ୍ୟ ଅନୁରୂପ ଭାବେ ଆପାର୍ଟମେଣ୍ଟରେ ରହୁଥିବା ଲୋକଙ୍କ ଅଭିଯୋଗକୁ ଭିତ୍ତି କରି ଆଜି ହୋଇଥିଲା କାର୍ଯ୍ୟାନୁଷ୍ଠାନ । ତେବେ ବିଡିଏର ପଦକ୍ଷେପକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି ଉଭୟ ସାଇ ମନ୍ଦିର ପରିଚାଳକ ଓ ଆପାର୍ଟମେଣ୍ଟର ଜମି ମାଲିକ ।
ରାସ୍ତାର ପ୍ରଶସ୍ଥିକରଣ ସମୟରେ କେବଳ ଯେ ଜବରଦଖଲ ଉଚ୍ଛେଦ ହେବ ଏହା ନୁହଁ ବରଂ ପୂର୍ବରୁ ରାସ୍ତାର ଉଭୟ ପାର୍ଶ୍ୱରେ ଥିବା ବସଷ୍ଟପ୍ ଗୁଡିକୁ ମଧ୍ୟ ଅନ୍ୟତ୍ର ସ୍ଥାନାନ୍ତର କରାଯିବ ।
