ବୋରିସ ଜନସନଙ୍କୁ ଋଣ ଦେବା ପ୍ରସଙ୍ଗ; ନିଜ ପଦରୁ ଇସ୍ତଫା ଦେଲେ ବିବିସି ଚେୟାରମେନ୍ ରିଚାର୍ଡ

ଲଣ୍ଡନ: ବ୍ରିଟେନର ପୂର୍ବତନ ପ୍ରଧାନମନ୍ତ୍ରୀ ବୋରିସ ଜନସନଙ୍କୁ ଋଣ ପ୍ରସଙ୍ଗ । ନିଜର ଭୂମିକାକୁ ନେଇ ସନ୍ଦେହ ଘେରରେ ଥିବା ବିବିସି ଚେୟାରମେନ ରିଚାର୍ଡ ସାର୍ପ ନିଜ ପଦରୁ ଇସ୍ତଫା ଦେଇଛନ୍ତି । ଋଣ ପ୍ରସଙ୍ଗରେ କର୍ତ୍ତୃପକ୍ଷଙ୍କୁ ସଠିକ୍ ସୂଚନା ଦେବାରେ ବିଫଳ ହୋଇଥିବା ଅଭିଯୋଗ କ୍ରମେ ସେ ଇସ୍ତଫା ଦେଇଥିବା କୁହାଯାଇଛି । ତଦନ୍ତରୁ ସ୍ପଷ୍ଟ ହୋଇଥିଲା- ସେ ଗଭର୍ଣ୍ଣାନ୍ସ କୋଡ୍ ଉଲ୍ଲଂଘନ କରିଛନ୍ତି ଏବଂ ଏହି କାରଣରୁ ସେ ଇସ୍ତଫା ଦେଉଛନ୍ତି ।

ଜନସନ ପ୍ରଧାନମନ୍ତ୍ରୀ ଥିବାବେଳେ ତାଙ୍କୁ ଏକ ଋଣ ପ୍ରଦାନ କ୍ଷେତ୍ରରେ ରିଚାର୍ଡ ସାର୍ପ ସହଯୋଗ କରିଥିବା ଘଟଣାର ତଦନ୍ତ ଲାଗି ବାରିଷ୍ଟର ଆଡାମ ହେପିନଷ୍ଟାଲଙ୍କ ନେତୃତ୍ବରେ ଏକ କମିଟି ଗଠିତ ହୋଇଥିଲା । ପ୍ରାୟ ୮ ଲକ୍ଷ ପାଉଣ୍ଡ ଲୋନ କ୍ଷେତ୍ରରେ ଏକ ଗ୍ୟାରେଣ୍ଟି ଯୋଗାଡ଼ କରିବାର କିଛି ଦିନ ପରେ ରିଚାର୍ଡ ସାର୍ପଙ୍କୁ ଜନସନ ବିବିସି ବୋର୍ଡର ଅଧ୍ୟକ୍ଷ କରାଇଥିଲେ ବୋଲି ଅଭିଯୋଗ ହୋଇଥିଲା ।