ସହକାରୀ ନିର୍ବାହ ଯନ୍ତ୍ରୀ କାର୍ଯ୍ୟାଳୟ କର୍ମଚାରୀଙ୍କ କିରୋସିନି ଢାଳି ଆତ୍ମହତ୍ୟା ଉଦ୍ୟମ
ବାସୁଦେବପୁର: ଜଳସମ୍ପଦ ବିଭାଗର ସହକାରୀ ନିର୍ବାହୀ ଯନ୍ତ୍ରୀଙ୍କ କାର୍ଯ୍ୟାଳୟରେ କାର୍ଯ୍ୟରତ ଏନ୍ଏମ୍ଆର ଦିବାକର ଦାସଙ୍କ ଆତ୍ମହତ୍ୟା ଉଦ୍ୟମ । କିରୋସିନି ଢାଳି ଆତ୍ମହତ୍ୟା ଉଦ୍ୟମ କରିଥିଲେ ଦିବାକର । ପୋଲିସ ପହଞ୍ଚି ତାଙ୍କୁ ଉଦ୍ଧାର କରିଛି । ଶନିବାର ଜଳସମ୍ପଦ ବିଭାଗର ବାଲେଶ୍ୱର ନିର୍ବାହୀ ଯନ୍ତ୍ରୀ କାମ ଦେଖିବାକୁ ବାସୁଦେବପୁର କାର୍ଯ୍ୟାଳୟରେ ପହଞ୍ଚି ସାଇଡ୍ କାମ ସମ୍ପର୍କରେ ଅଲୋଚନା କରୁଥିବା ବେଳେ ପୂର୍ବରୁ ପ୍ରସ୍ତୁତ ଥିବା ଏନ୍ଏମ୍ଆର ଆତ୍ମହତ୍ୟା ଉଦ୍ୟମ କରିଥିଲେ । ଏନ୍ଏମ୍ଆର ଦିବାକର ଦାସ ପାଞ୍ଚ ବର୍ଷ ଦରମା ପାଇନଥିବାରୁ ସେ ଆତ୍ମହତ୍ୟା ଉଦ୍ୟମ କରିଥିବା କହିଛନ୍ତି । ସେ ଆହୁରି କହିଛନ୍ତି ବହୁ ଆଗରୁ ଆମରଣଅନଶନ କରି ଉଚ୍ଚ ପଦସ୍ଥ ଅଧିକାରୀଙ୍କ ଠାରୁ ପ୍ରତିଶ୍ରୁତି ପାଇ ଓହରି ଯାଇଥିଲେ । ତାଙ୍କ ସହିତ ଅନ୍ୟ ଦୁଇ କର୍ମଚାରୀ ଅବସର ନେଲେଣି । ଚାକିରିର ସ୍ଥାୟୀତ୍ୱ ଓ ୫ ବର୍ଷର ଦରମା ପ୍ରଦାନ କରିବାକୁ ଦୃଷ୍ଟି ଆକର୍ଷଣ କରିଥିଲେ । ଅଧିକାରୀ କୌଣସି କଥା ନଶୁଣିବାରୁ ବାଧ୍ୟ ହୋଇ ଆତ୍ମହତ୍ୟାର ଧମକ ଦେଇଥିଲେ । ଆଜି ଠିକ ୧୦ ବେଳେ ଏନ୍ଏମ୍ଆର ଦିବାକର ଦାସ ଏକ କିରୋସିନି ଜାର୍ ଆଣି ଢାଳିବାକୁ ଲାଗିଥିଲେ । ଏହି ସମୟରେ ସେଠାରେ ଉପସ୍ଥିତ ପୋଲିସ ଜାର୍ ସହ ଦିବାକରଙ୍କୁ କାବୁ କରି ଥାନାକୁ ନେଇଯାଇଥିଲେ । ଅପରପକ୍ଷରେ ନିର୍ବାହୀ ଯନ୍ତ୍ରୀ ଜଣଙ୍କ ତାଙ୍କ ଫାଇଲ୍ ପଠାଯାଇଥିବା କହିଛନ୍ତି ।
