ହାଇକୋର୍ଟ ବାର୍ ଆସୋସିଏସନର ଗୁରୁତ୍ୱପୂର୍ଣ୍ଣ ବୈଠକ: ଚୂଡାନ୍ତ ହେବ ପରବର୍ତ୍ତୀ କାର୍ଯ୍ୟପନ୍ଥା
1 min read
ଅଦଲତ ଅବମାନନା ନୋଟିସ୍ ପରେ ତେଜୁଛି ଆଇନଜୀବୀଙ୍କ ଅସନ୍ତୋଷ । ଆଜି ବସିବ ହାଇକୋର୍ଟ ବାର ଆସୋସିଏସନ୍ର ସାଧାରଣ ପରିଷଦର ଜରୁରୀ ବୈଠକ । ଏହି ବୈଠକରେ ସଂଘ ପକ୍ଷରୁ ନିଆଯାଇଥିବା ନିଷ୍ପତ୍ତି ସହ ବିଭିନ୍ନ ପ୍ରସଙ୍ଗରେ ହେବ ଆଲୋଚନା । ଏଥିସହ ରାଜ୍ୟର ବିଭିନ୍ନ ସ୍ଥାନରେ ଚାଲିଥିବା କାର୍ଯ୍ୟବନ୍ଦ ଆନ୍ଦୋଳନକୁ ନେଇ ହୋଇଥିବା ମାମଲାକୁ ନେଇ ବିଚାରବିମର୍ଷ ହେବ । ଗତକାଲି ରାଜ୍ୟସ୍ତରୀୟ ବାର ଆସୋସିଏସନ୍ ବୈଠକରେ ୯୩ଟି ବାର୍ ଆସୋସିଏସନ୍ ଯୋଗଦେଇଥିବା ବେଳେ ୧୩ଟି ଆସୋସିଏସନ୍ ହାଇକୋର୍ଟ ବାର ଆସୋସିଏସନ୍ର ନିଷ୍ପତିକୁ ଲିଖିତ ଭାବେ ସମର୍ଥନ ଜଣାଇଥିଲେ । ବିଭିନ୍ନ ବାର୍ ଆସୋସିଏସନ୍ ସେମାନଙ୍କ ମତ ରଖିଥିବା ବେଳେ ହାଇକୋର୍ଟ ବାରର ନିଷ୍ପତିକୁ ସମସ୍ତେ ସ୍ବାଗତ କରିଥିଲେ ।
ବିଚାରପତି ନିଯୁକ୍ତି କ୍ଷେତ୍ରରେ କଲେଜିୟମ ବ୍ୟବସ୍ଥାକୁ ବିରୋଧ କରି ହାଇକୋର୍ଟ ବାର ଆସୋସିଏସନ୍ ପକ୍ଷରୁ ଅକ୍ଟୋବର ୧୪ରୁ କୋର୍ଟ ବର୍ଜନ ଆରମ୍ଭ କରାଯାଇଥିଲା । ଅନ୍ୟପକ୍ଷରେ ରାଜ୍ୟର ବିଭିନ୍ନ ବାର୍ ଆସୋସିଏସନ୍ ପକ୍ଷରୁ ଚାଲିଥିବା ଆନ୍ଦୋଳନକୁ ନେଇ ହାଇକୋର୍ଟ ନିଜ ଆଡ଼ୁ ଅଦାଲତ ଅବମାନନା ମାମଲା ରୁଜୁ କରିଥିଲେ । ମଙ୍ଗଳବାର ହାଇକୋର୍ଟ ମୁଖ୍ୟ ବିଚାରପତିଙ୍କ ସମେତ ୧୩ଜଣ ବିଚାରପତିଙ୍କୁ ନେଇ ଗଠିତ ପୂର୍ଣ୍ଣାଙ୍ଗ ବେଞ୍ଚ, ଏ ସଂପର୍କତି ମାମଲାର ଶୁଣାଣି କରି ମୁଖ୍ୟ ଶାସନ ସଚିବ, ଗୃହ ସଚିବ, ଆଇନ ସଚିବ, ବାର୍ କାଉନସିଲ ଅଫ ଇଣ୍ଡିଆର ଅଧ୍ୟକ୍ଷ, ହାଇକୋର୍ଟ ବାର ଆସୋସିଏସନ ସଭାପତିଙ୍କ ସମେତ ବିଭିନ୍ନ ବାର ଆସୋସିଏସନ୍କୁ ନୋଟିସ ଜାରି କରିଥିଲେ । ଅକ୍ଟୋବର ୨୧ରେ ହେବ ଏ ମାମଲାର ପରବର୍ତ୍ତୀ ଶୁଣାଣି । ')}
