ପପ୍ ମ୍ୟୁଜିକର ମହାରଥି ବପ୍ପି ଲହରି କାହିଁକି ପିନ୍ଧନ୍ତି ଏତେ ସୁନାଗହଣା?

ମୁମ୍ବାଇ: ବଲିଉଡ କଣ୍ଠଶିଳ୍ପୀ ତଥା କମ୍ପୋଜର ବପ୍ପି ଲହରିଙ୍କୁ କିଏବା ନଜାଣେ । ୫୦୦ରୁ ଅଧିକ ଗୀତ ଗାଇଥିବା ଏହି କଣ୍ଠଶିଳ୍ପୀ ଜଣକ ଜଣେ ଲିଜେଣ୍ଡ୍ ଭାବେ ପରିଚିତ ।

ବଲିଉଡରେ ପପ୍ ମ୍ୟୁଜିକକୁ ସେ ଏକପ୍ରକାର ପରିଚିତ କରାଇଥିଲେ । ତାଙ୍କ ଗୀତ ଗାଇବାର ନିଆରା ଅନ୍ଦାଜ ସବୁବେଳେ ଦର୍ଶକଙ୍କୁ କିମିଆ କରିଥାଏ ।

ବପ୍ପି ଲହରି କେବଳ ତାଙ୍କ ଗୀତ ପାଇଁ ଯେ ଫେମସ୍ ତା’ ନୁହେଁ, ସେ ପିନ୍ଧୁଥିବା ଭାରୀ ମାତ୍ରାର ସୁନା ପାଇଁ ଅଧିକ ସମୟ ଚର୍ଚ୍ଚାରେ ରହିଥାନ୍ତି । ସେ ବଲିଉଡର ଏଭଳି ଜଣେ ସଙ୍ଗୀତକାର ଯିଏକି ସବୁବେଳେ ବିପୁଳ ମାତ୍ରାର ସୁନା ପରିଧାନ କରିଥାନ୍ତି।

ହେଲେ ଖୁବ୍ କମ୍ ଲୋକ ଜାଣିଥିବେ ସେ କାହିଁକି ଏତେ ସୁନାଗହଣା ପିନ୍ଧନ୍ତି?

ଏକ ସାକ୍ଷାତକାରରେ ବପ୍ପି କହିଥିଲେ ଯେ ସେ ହଲିଉଡ କଳାକାର ଏଲବିସ ପ୍ରେସଲିଙ୍କ ଦ୍ୱାରା ଖୁବ୍ ପ୍ରଭାବିତ । ଏଲବିସ ସବୁବେଳେ ସୁନାର ଏକ ଚେନ୍ ପିନ୍ଧିଥାଆନ୍ତି , ଯାହାକୁ ଦେଖି ବପ୍ପି ବି ତାଙ୍କ ପଦାଙ୍କ ଅନୁସରଣ କରିଥିଲେ । ଏହାବ୍ୟତୀତ ସୁନା ତାଙ୍କ ପାଇଁ ଲକି ବୋଲି ସେ ବିଶ୍ୱାସ କରନ୍ତି ।