ବାଙ୍କୀ : ଜହର ପାଲଟିଛି ପିଇବା ପାଣି । ଲୁହାଗୁଣ୍ଡ ମିଶ୍ରିତ ପାଣି ପିଇ ରୋଗାକ୍ରାନ୍ତ ଲୋକେ । କଟକ ଜିଲ୍ଲା ବାଙ୍କୀ ବୈଦେଶ୍ଵର ଗ୍ରାମପଞ୍ଚାୟତର କୋଟ ଗାଁରେ ବ୍ୟାପିବାରେ ଲାଗିଛି କିଡନୀ ରୋଗ । ଦୁଇ ବର୍ଷରେ ଗଲାଣି ସାତ ଜଣଙ୍କ ଜୀବନ । ଏବେବି ସାତ ଜଣ ହେଉଛନ୍ତି ଚିକିତ୍ସିତ । ରୋଗ ଭୟରେ ଗାଁ ଛାଡ଼ିଲେନି ଲୋକେ । ବେଫିକର ପ୍ରଶାସନ । କୋଟ ଗାଁରେ କିଡନୀ ରୋଗ କାୟା ମେଲାଇ ଚାଲିଥିବା ବେଳେ ଡାକ୍ତରୀ ଟିମ ପହଞ୍ଚି ଲୋକଙ୍କ ରକ୍ତ ଓ ପାଣି ନମୁନା ସଂଗ୍ରହ କରି ପରୀକ୍ଷା ପାଇଁ ନେଇଥିଲେ । ହେଲେ ବର୍ତ୍ତମାନ ସୁଦ୍ଧା ରିପୋର୍ଟ ଆସିନାହିଁ । ଗତ ମାସ ୨୦ ତାରିଖରେ କଟକ ବଡ ମେଡିକାଲରେ ଆଉ ଜଣଙ୍କ ମୃତ୍ୟୁ ପରେ ଆତଙ୍କିତ ଲୋକେ ।
କୋଟ ଗାଁରେ ସାଢେ ଚାରି ଶହ ଲୋକ ବସବାସ କରୁଛନ୍ତି । ହେଲେ ଦୁଃଖର ବିଷୟ ଆଜି ସୁଦ୍ଧା ଲୋକଙ୍କୁ ବିଶୁଦ୍ଧ ପାଣି ମିଳି ପାରିଲା ନାହିଁ । ଦୂଷିତ ପାଣି ପିଇ ଲୋକେ କିଡନୀ ରୋଗରେ ଆକ୍ରାନ୍ତ ହେଉଛନ୍ତି । ଏନେଇ ଗ୍ରାମବାସୀ ଅନେକ ଥର ବ୍ଲକରେ ଅଭିଯୋଗ କରିବା ପରେ ଗ୍ରାମ୍ୟ ଜଳଯୋଗାଣ ବିଭାଗ ପକ୍ଷରୁ ଟ୍ୟାଙ୍କର ଯୋଗେ ପାଣି ଯୋଗାଇ ଦିଆଯାଉଛି । ହେଲେ ସ୍ଥିତି ଅନୁଧ୍ୟାନ ପାଇଁ ଗାଁକୁ ଆସୁନାହାନ୍ତି ଜିଲ୍ଲା ସ୍ତରୀୟ ଡାକ୍ତରୀ ଟିମ । ଯାହାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି । କେବେ କୋଟ ଗାଁରେ ଡାକ୍ତରୀ ଟିମ୍ ପହଞ୍ଚିବେ ? କେବେ ଗାଁରେ ବିଶୁଦ୍ଧ ପାନୀୟ ଜଳ ବ୍ୟବସ୍ଥା କରାଯିବ ? ଏହାର କିଏ ଦେବ ଉତ୍ତର ।
ମୁଣ୍ଡ ନେଉଛି କିଡନୀ ରୋଗ, ଦୁଇ ବର୍ଷରେ ଗଲାଣି ସାତ ଜୀବନ
