ନନ୍ଦିଘୋଷ ବ୍ୟୁରୋ: କାହିଁକି ଘଟିଚାଲିଛି ବ୍ୟାଙ୍କ ଫ୍ରଡ ? ଦୈନିକ କାହିଁକି ହଜାର ହଜାର ନିରୀହ ଉପଭୋକ୍ତା ହେଉଛନ୍ତି ସାଇବର ଠକଙ୍କ ଶିକାର। ଏହାରି ପଛରେ ଖୋଦ୍ ବ୍ୟାଙ୍କ କର୍ମଚାରୀ ଓ ତୃତୀୟ ପକ୍ଷ ଭେଣ୍ଡରଙ୍କ ହାତ ରହୁଥିବା ସୂଚନା ମିଳିଛି। ସାଇବର ଜାଲିଆତି ମାମଲାର ତଦନ୍ତ କରୁଥିବା ବିଭିନ୍ନ ସାଇବର ସିକ୍ୟୁରିଟି ସଂସ୍ଥା ଏନେଇ ସୂଚନା ପାଇଛି।
ସାଇବର ଜାଲିଆତି ବିରୋଧରେ ପଦକ୍ଷେପ ନେବା ଲାଗି କିଛି ସପ୍ତାହ ପୂର୍ବେ କେନ୍ଦ୍ର ଗୃହ ମନ୍ତ୍ରାଳୟର ବୈଠକ ବସିଥିଲା। ବିଭିନ୍ନ କେନ୍ଦ୍ରୀୟ ସଂସ୍ଥା ପକ୍ଷରୁ କରାଯାଉଥିବା ଯାଞ୍ଚରୁ ଏହା ଜଣାପଡିଛି ଯେ, ବ୍ଯାଙ୍କର ସମସ୍ତ ଗୁରୁତ୍ବପୂର୍ଣ୍ଣ ତଥ୍ୟାବଳୀ ସମ୍ପର୍କରେ ଜାଣିବା ଲାଗି କର୍ମଚାରୀ ଓ ତୃତୀୟ ପକ୍ଷ ଭେଣ୍ଡରମାନଙ୍କୁ ଅନୁମତି ଦେବା ଯୋଗୁ ସାଇବର ଫ୍ରଡ ସଂଖ୍ୟା ଅଧିକ ଘଟିବାରେ ଲାଗିଛି। ଜଣେ ବରିଷ୍ଠ ସରକାରୀ କର୍ମକର୍ତ୍ତାଙ୍କ କହିବା କଥା, ବ୍ୟାଙ୍କର ଅତି ଗୋପନୀୟ ତଥ୍ଯାବଳୀକୁ କର୍ମଚାରୀ ଓ ଆଉଟସୋର୍ସିଂ ଷ୍ଟାଫ ସହଜରେ ଜାଣିପାରୁଥିବାରୁ ଏହାର ଫାଇଦା ନେଉଛନ୍ତି ସାଇବର କ୍ରିମିନାଲ।
ବଡ଼କଥା ହେଉଛି ଜାତୀୟ ସାଇବରକ୍ରାଇମ ରିପୋର୍ଟିଂ ପୋର୍ଟାଲରେ ଦର୍ଶାଯାଇଥିବା ଜାଲ୍ ଆକାଉଣ୍ଟଗୁଡିକ ମଧ୍ଯରୁ ୬୦ରୁ ୭୦ ପ୍ରତିଶତ ଆକାଉଣ୍ଟଗୁଡିକ ବିରୋଧରେ ବ୍ୟାଙ୍କ ପଦକ୍ଷେପ ନେଉ ନଥିବା ଅଭିଯୋଗ ହେଉଛି। ବ୍ୟାଙ୍କ ନିରାପତ୍ତା କ୍ଷେତ୍ରରେ ବ୍ୟାପକ ତ୍ରୁଟି ଯୋଗୁ ଜାଲିଆତି ସଂଖ୍ୟା ବୃଦ୍ଧି ପାଉଛି ବୋଲି କହିଛନ୍ତି ବିଭିନ୍ନ ଆର୍ଥିକ ଗୁଇନ୍ଦା ସଂସ୍ଥା।
