ମୋଦିଙ୍କ ଗସ୍ତ ପରେ ବାଂଲାଦେଶରେ ବ୍ୟାପକ ହିଂସା, ହିନ୍ଦୁ ମନ୍ଦିର ଉପରେ ଆକ୍ରମଣ

ଢାକା: ପ୍ରଧାନମନ୍ତ୍ରୀ ମୋଦିଙ୍କ ବାଂଲାଦେଶ ଗସ୍ତ ପରେ ବ୍ୟାପକ ହିଂସା ଦେଖିବାକୁ ମିଳିଛି । କଟ୍ଟର ଇସଲାମିକ୍ ଗ୍ରୁପ୍ ହିନ୍ଦୁ ମନ୍ଦିର ଉପରେ ଆକ୍ରମଣ କରିଛନ୍ତି । ରବିବାର ବିକ୍ଷୋଭକାରୀ ପୂର୍ବ ବାଂଲାଦେଶରେ ଏକ ଟ୍ରେନରେ ମଧ୍ୟ ନିଆଁ ଲଗାଇ ଦେଇଛନ୍ତି । ସୂଚନା ଅନୁସାରେ, ମୋଦିଙ୍କ ଗସ୍ତ ସହ ପୂରା ବାଂଲାଦେଶ ଅଶାନ୍ତ ହୋଇ ପଡ଼ିଛି ।

ଇସଲାମିକ୍ ଗୋଷ୍ଠୀ ବିରୋଧ ବେଳେ ପୋଲିସ୍ ସହ ମୁହାଁମୁହିଁ ହୋଇଥିଲେ । ଏଥିରେ ପ୍ରାୟ ୧୦ ଜଣଙ୍କ ମୃତ୍ୟୁ ହୋଇଛି । ମୋଦି ଗସ୍ତରୁ ଫେରିବା ପରେ ପୁଣି ତୀବ୍ର ଉତ୍ତେଜନା ପ୍ରକାଶ ପାଇଛି । ମୋଦି ବାଂଲାଦେଶର ୫୦ ତମ ସ୍ୱତନ୍ତ୍ରତା ଦିବସରେ ଯୋଗ ଦେବାକୁ ଯାଇଥିଲେ ।

ହିନ୍ଦୁତ୍ୱ ବହୁଳ ଭାରତରେ ଅଳ୍ପସଂଖ୍ୟକ ମୁସଲମାନଙ୍କ ପ୍ରତି ମୋଦ ଭେଦଭାବ ସୃଷ୍ଟି କରୁଥିବା ଅଭିଯୋଗ କରି ବାଂଲାଦେଶର ଇସଲାମିକ୍ ଗୋଷ୍ଠୀ ହିଂସା ସୃଷ୍ଟି କରିଥିଲେ । ଶୁକ୍ରବାର ସୃଷ୍ଟି ହୋଇଥିବା ହିଂସା ରବିବାର ବିସ୍ଫୋରଣର ରୂପ ନେଇଛି । ହେପାଜତ-ଇ-ଇସଲାମ୍ ଗୋଷ୍ଠୀ ପୂର୍ବ ବ୍ରହ୍ମନବାରିଆରେ ଏକ ଟ୍ରେନ୍ ଜାଳି ଦେଇଛନ୍ତି । ଏଥିରେ ପ୍ରାୟ ୧୦ ଜଣ ଆହତ ହୋଇଛନ୍ତି ।

ଅନେକ ସରକାରୀ କାର୍ଯ୍ୟାଳୟରେ ନିଆଁ ଲଗାଇ ଦେଇଛନ୍ତି ବିକ୍ଷୋଭକାରୀ । ସହରରେ ଥିବା ଏକାଧିକ ହିନ୍ଦୁ ମନ୍ଦିରରେ ମଧ୍ୟ ଭଙ୍ଗାରୁଜା ହୋଇଛି । ରାଜସାହିରେ ଆନ୍ଦୋଳନକାରୀ ୨ଟି ବସ୍ ଜାଳି ଦେଇଥିବାବେଳେ ନାରାୟଣଗଞ୍ଜରେ ପୋଲିସ ଉପରକୁ ପଥର ମାଡ଼ କରିଛନ୍ତି ।